ਸਮਾਜ-ਸੇਵੀ ਸੰਸਥਾ ਆਸਟ੍ਰੇਲੀਅਨ ਸਿੱਖ ਸਪੋਰਟ ਦੇ ਸੇਵਾਦਾਰਾਂ ਨੇ ਰਾਤ ਦੇ ਹਨੇਰੇ ਵਿੱਚ 700 ਕਿਲੋਮੀਟਰ ਤੋਂ ਵੀ ਵੱਧ ਦਾ ਸਫਰ ਤਹਿ ਕਰਦਿਆਂ ਕੈਨਬਰਾ ਲਾਗੇ ਬ੍ਰੇਡਵੁੱਡ ਇਲਾਕੇ ਵਿੱਚ 350 ਬਕਸੇ ਭੋਜਨ ਅਤੇ ਪਾਣੀ ਪਹੁੰਚਾਉਂਦਿਆਂ ਸੇਵਾ-ਭਾਵਨਾ ਦੀ ਇੱਕ ਵੱਖਰੀ ਮਿਸਾਲ ਪੇਸ਼ ਕੀਤੀ ਹੈ।
ਸਿੱਖ ਸਪੋਰਟ ਵਲੰਟੀਅਰ ਸ਼ੁੱਕਰਵਾਰ ਰਾਤ 11 ਵਜੇ ਮੈਲਬੌਰਨ ਤੋਂ ਚੱਲਕੇ, ਸੈਂਕੜੇ ਕਿਲੋਗ੍ਰਾਮ ਸੁੱਕਾ ਦੁੱਧ, ਪਾਸਟਾ, ਸੀਰੀਅਲ, ਮੂਸਲੀ ਬਾਰਾਂ, ਪਾਣੀ ਅਤੇ ਹੋਰ ਘਰੇਲੂ ਜ਼ਰੂਰੀ ਚੀਜ਼ਾਂ ਲੈਕੇ ਅੱਗ ਨਾਲ ਪ੍ਰਭਾਵਿਤ ਲੋਕਾਂ ਕੋਲ਼ ਪਹੁੰਚੇ ਸਨ।
ਸਿੱਖ ਸਪੋਰਟ ਦੇ ਪ੍ਰਧਾਨ ਮਨਪ੍ਰੀਤ ਸਿੰਘ ਸਪਰਾ ਨੇ ਐਸ ਬੀ ਐਸ ਪੰਜਾਬੀ ਨੂੰ ਦੱਸਿਆ ਕਿ ਸੇਵਾ ਦੀ ਇਹ ਪ੍ਰੇਰਨਾ ਉਹਨਾਂ ਨੂੰ ਸਿੱਖੀ ਸਿਧਾਂਤਾਂ ਤੋਂ ਮਿਲੀ ਹੈ ਜਿਸ ਤਹਿਤ ਉਹਨਾਂ ਦੀ ਸੰਸਥਾ ਲੋੜਵੰਦਾਂ ਦੀ ਮਦਦ ਲਈ ਸਦਾ ਤਤਪਰ ਰਹਿੰਦੀ ਹੈ।
"ਆਸਟ੍ਰੇਲੀਅਨ ਹੋਣ ਦੇ ਨਾਤੇ ਸਾਡਾ ਪਹਿਲਾ ਫਰਜ਼ ਆਸਟ੍ਰੇਲੀਅਨ ਲੋਕਾਂ ਦੀ ਮਦਦ ਕਰਨਾ ਅਤੇ ਉਹਨਾਂ ਦੀ ਸੁੱਖ ਲੋੜ੍ਹਨਾ ਹੈ। ਅਸੀਂ ਇਹ ਸੁਨੇਹਾ ਦੇਣਾ ਚਾਹੁੰਦੇ ਹਾਂ ਕਿ ਲੋੜ ਪੈਣ ਉਤੇ ਸਿੱਖ ਭਾਈਚਾਰਾ ਆਸਟ੍ਰੇਲੀਅਨ ਲੋਕਾਂ ਨਾਲ਼ ਮੋਢੇ ਨਾਲ਼ ਮੋਢਾ ਜੋੜਕੇ ਖੜਨ ਲਈ ਤਿਆਰ ਹੈ।"
ਸ਼੍ਰੀ ਸਪਰਾ ਨੇ ਦੱਸਿਆ ਕਿ ਸਿੱਖ ਸਪੋਰਟ ਦੀ ਟੀਮ ਸਿਰਫ ਆਸਟ੍ਰੇਲੀਆ ਹੀ ਨਹੀਂ ਬਲਕਿ ਦੁਨੀਆ ਦੇ ਹੋਰ ਹਿੱਸਿਆਂ, ਖਾਸ ਤੌਰ 'ਤੇ ਭਾਰਤ ਵਿੱਚ ਵੀ ਸੇਵਾਂਵਾਂ ਪ੍ਰਦਾਨ ਕਰਦੀ ਹੈ।
ਉਹਨਾਂ ਸਾਰੇ ਸੇਵਾਦਾਰਾਂ ਦਾ ਧੰਨਵਾਦ ਕੀਤਾ ਹੈ ਜਿੰਨਾ ਤਨਦੇਹੀ ਨਾਲ਼ ਇਹ ਜਿੰਮੇਵਾਰੀ ਨਿਭਾਉਣ ਲਈ ਸਮੇਂ ਦਾ ਦਸਵੰਦ ਕੱਢਣ ਦੇ ਨਾਲ਼-ਨਾਲ਼ ਮਾਇਕ ਸਹਾਇਤਾ ਵੀ ਕੀਤੀ।
“ਅਸੀਂ ਸਮੁਚੇ ਭਾਈਚਾਰੇ ਦੇ ਧੰਨਵਾਦੀ ਹਾਂ, ਇਥੋਂ ਤੱਕ ਕਿ ਸਮਾਨ ਦੀ ਢੋਆ-ਢੁਆਈ ਲਈ ਵੀ ਸਾਨੂੰ ਟਰੱਕ ਦੀ ਸੇਵਾ ਮਿਲੀ ਜਿਸ ਲਈ ਸਾਡੀ ਟੀਮ ਸ਼ੁਕਰਗੁਜ਼ਾਰ ਹੈ।"
ਹੋਰ ਜਾਣਕਾਰੀ ਲਈ, ਇੰਟਰਵਿਊ ਸੁਨਣ ਲਈ ਉੱਪਰ ਦਿੱਤੇ ਆਡੀਓ ਲਿੰਕ ਉੱਤੇ ਕ੍ਲਿਕ ਕਰੋ.....
Listen to SBS Punjabi Monday to Friday at 9 pm. Follow us on Facebook and Twitter.
