42 ਸਾਲਾ ਹਰਮਨ* ਲਗਭਗ 11 ਸਾਲਾਂ ਤੋਂ ਸ਼ੂਗਰ ਨਾਲ ਪੀੜਤ ਹੈ ਅਤੇ ਮੰਨਦੀ ਹੈ ਕਿ ਇਸ ਬਿਮਾਰੀ ਨੇ ਉਸਦੀ ਜ਼ਿੰਦਗੀ ਦੀ ਦਿਸ਼ਾ ਹੀ ਬਦਲ ਦਿੱਤੀ ਹੈ। ਪਰਿਵਾਰਕ ਇਤਿਹਾਸ ਨਾ ਹੋਣ ਦੇ ਬਾਵਜੂਦ, ਉਸਨੂੰ ਦੂਜੀ ਗਰਭ ਅਵਸਥਾ ਦੌਰਾਨ ਗਰਭਕਾਲੀ ਸ਼ੂਗਰ ਹੋਈ, ਜੋ ਬਾਅਦ ਵਿੱਚ ਡਾਇਬਟੀਜ਼ ਵਿੱਚ ਬਦਲ ਗਈ। ਹਰਮਨ ਦਾ ਦਾਅਵਾ ਹੈ ਕਿ ਕੰਮਕਾਜੀ ਪ੍ਰਵਾਸੀ ਹੋਣਾ, ਵੀਜ਼ਾ ਸੰਬੰਧੀ ਅਨਿਸ਼ਚਿਤਤਾ ਅਤੇ ਸੱਭਿਆਚਾਰਕ ਪਾਬੰਦੀਆਂ ਇਸ ਬਿਮਾਰੀ ਦੇ ਵਿਕਾਸ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਉਂਦੀਆਂ ਹਨ।
ਅਹਿਜਾ ਦਾਅਵਾ ਕਰਨ ਵਾਲੀ ਹਰਮਨ* ਇਕੱਲੀ ਨਹੀਂ ਹੈ, ਆਸਟ੍ਰੇਲੀਅਨ ਇੰਸਟੀਚਿਊਟ ਆਫ਼ ਹੈਲਥ ਐਂਡ ਵੈਲਫੇਅਰ ਦੇ ਅੰਕੜੇ ਦਰਸਾਉਂਦੇ ਹਨ ਕਿ ਦੱਖਣੀ ਅਤੇ ਮੱਧ ਏਸ਼ੀਆ ਵਿੱਚ ਪੈਦਾ ਹੋਈਆਂ ਔਰਤਾਂ ਵਿੱਚ ਆਸਟ੍ਰੇਲੀਆ 'ਚ ਪੈਦਾ ਹੋਈਆਂ ਔਰਤਾਂ ਦੇ ਮੁਕਾਬਲੇ ਗਰਭਕਾਲੀ (gestational) ਸ਼ੂਗਰ ਹੋਣ ਦੀ ਸੰਭਾਵਨਾ ਦੁੱਗਣੀ ਤੋਂ ਵੱਧ ਹੁੰਦੀ ਹੈ।
ਕੈਨਬਰਾ-ਸਥਿਤ ਡਾਇਬਟੀਜ਼ ਐਜੂਕੇਟਰ ਹਰਦਰਸ਼ਨ ਕੰਗ ਨੇ ਐਸ ਬੀ ਐਸ ਪੰਜਾਬੀ ਨੂੰ ਦੱਸਿਆ, "ਪੰਜਾਬੀ ਭਾਈਚਾਰੇ ਵਿੱਚ ਗਰਭਕਾਲੀ ਸ਼ੂਗਰ ਇੰਨੀ ਆਮ ਹੋ ਚੁੱਕੀ ਹੈ ਕਿ ਸ਼ਾਇਦ ਹੀ ਕੋਈ ਜੋੜਾ ਹੋਵੇ ਜਿਸ ਨੇ ਇਸ ਸਮੱਸਿਆ ਦਾ ਸਾਹਮਣਾ ਨਾ ਕੀਤਾ ਹੋਵੇ।”
ਮੈਲਬਰਨ ਤੋਂ ਡਾਇਟੀਸ਼ੀਅਨ ਗਗਨ ਸੰਧੂ ਦਾ ਮੰਨਣਾ ਹੈ ਕਿ ਦੇਰੀ ਨਾਲ ਜਾਂ ਵੱਡੀ ਉਮਰੇ ਗਰਭ ਧਾਰਨ ਕਰਨਾ ਅਤੇ ਜ਼ਿਆਦਾ ਕੈਲਰੀ ਵਾਲੇ ਦੱਖਣੀ ਏਸ਼ੀਆਈ ਭੋਜਨ ਉੱਤੇ ਨਿਰਭਰਤਾ ਵਰਗੇ ਕਈ ਜੀਵਨ ਸ਼ੈਲੀ ਦੇ ਵਿਕਲਪ ਵੀ ਇਸ ਦੇ ਪਿੱਛੇ ਦੇ ਮੂਲ ਕਾਰਨਾਂ ਵਿਚੋਂ ਹਨ।
ਹਰਮਨ* ਜੋ ਰਵਾਇਤੀ ਅਤੇ ਸ਼ਾਕਾਹਾਰੀ ਭੋਜਨ ਖਾਂਦੀ ਹੈ, ਦਾ ਕਹਿਣਾ ਹੈ ਕਿ ਹੁਣ ਉਹ ਆਪਣੀਆਂ ਤਿੰਨ ਧੀਆਂ ਨੂੰ ਪੂਰੀ ਸਾਵਧਾਨੀ ਨਾਲ ਵੱਡਾ ਕਰ ਰਹੀ ਹੈ।
ਮੈਂ ਆਪਣੀਆਂ ਧੀਆਂ ਨੂੰ ਮਾਸਾਹਾਰੀ ਖਾਣਾ ਦਿੰਦੀ ਹਾਂ, ਭਾਵੇਂ ਇਹ ਸਾਡੇ ਸੱਭਿਆਚਾਰਕ ਨਿਯਮਾਂ ਦੇ ਵਿਰੁੱਧ ਹੈ। ਮੈਂ ਉਨ੍ਹਾਂ ਨੂੰ ਕਹਿੰਦੀ ਹਾਂ ਕਿ ਉਹ ਆਪਣੀ ਸਿਹਤ ਨੂੰ ਪਹਿਲ ਦੇਣ, ਸਾਰਾ ਕੁਝ ਤਾਂ ਹੀ ਮਿਲਦਾ ਹੈ ਜੇ ਸਿਹਤ ਨਾਲ ਹੋਵੇ।ਹਰਮਨ
ਹਰਮਨ ਦਾ ਇਹ ਵੀ ਮਨਣਾ ਹੈ ਕਿ ਉਸਨੇ 'ਕੰਮ ਅਤੇ ਵੀਜ਼ਾ ਦੇ ਤਣਾਅ' ਨੂੰ ਆਪਣੀ ਸਿਹਤ ਨਾਲੋਂ ਵੱਧ ਪਹਿਲ ਦੇ ਕੇ ਗਲਤੀ ਕੀਤੀ ਹੈ।
“ਮੈਂ ਆਪਣੇ ਸ਼ਰੀਰ ਨਾਲ ਵੀ ਧੱਕਾ ਕੀਤਾ ਹੈ। ਅਸੀਂ ਪੰਜਾਬੀ ਮੂਲ ਦੀਆਂ ਔਰਤਾਂ ਅਕਸਰ ਆਪਣੇ ਆਪ ਵੱਲ ਧਿਆਨ ਦੇਣਾ ਭੁੱਲ ਜਾਂਦੀਆਂ ਹਾਂ, ਅਤੇ ਹੁਣ ਮੈਂ ਉਸਦਾ ਨਤੀਜਾ ਭੁਗਤ ਰਹੀ ਹਾਂ।”ਹਰਮਨ
ਹਰਮਨ ਦੀ ਆਪ ਬੀਤੀ ਅਤੇ ਮਾਹਿਰਾਂ ਦੇ ਵਿਚਾਰ ਜਾਨਣ ਲਈ ਇਹ ਪੌਡਕਾਸਟ ਸੁਣੋ:
* ਇਹ ਇਨ੍ਹਾਂ ਦਾ ਅਸਲੀ ਨਾਮ ਨਹੀਂ ਹੈ। ਇਸ ਔਰਤ ਦੀ ਪਛਾਣ ਗੁਪਤ ਰੱਖਣ ਲਈ ਉਨ੍ਹਾਂ ਦਾ ਨਾਮ ਬਦਲਿਆ ਗਿਆ ਹੈ।
🔊 ਸਾਡੇ ਸਾਰੇ ਪੌਡਕਾਸਟ ਇਸ ਲਿੰਕ ਰਾਹੀਂ ਸੁਣੇ ਜਾ ਸਕਦੇ ਹਨ।
📢 ਐਸ ਬੀ ਐਸ ਪੰਜਾਬੀ ਦੁਨੀਆ ਭਰ ਦੀਆਂ ਤਾਜ਼ਾ-ਤਰੀਨ ਖ਼ਬਰਾਂ ਸਮੇਤ ਉਨ੍ਹਾਂ ਕਹਾਣੀਆਂ ਨਾਲ ਜੋੜਦਾ ਹੈ ਜੋ ਆਸਟ੍ਰੇਲੀਆ ਵਿਚਲੇ ਜੀਵਨ ਅਤੇ ਪੰਜਾਬੀ ਬੋਲਣ ਵਾਲੇ ਆਸਟ੍ਰੇਲੀਅਨ ਭਾਈਚਾਰੇ ਲਈ ਅਹਿਮ ਹਨ।
💻 ਸਾਡਾ ਲਾਈਵ ਪ੍ਰੋਗਰਾਮ ਤੁਸੀਂ ਸੋਮਵਾਰ ਤੋਂ ਸ਼ੁੱਕਰਵਾਰ ਸ਼ਾਮ 4 ਵਜੇ SBS ਸਾਊਥ ਏਸ਼ੀਅਨ ਦੇ ਡਿਜੀਟਲ ਰੇਡੀਓ ਉੱਤੇ, ਆਪਣੇ ਟੈਲੀਵਿਜ਼ਨ 'ਤੇ ਚੈਨਲ 305 ਉੱਤੇ, SBS ਆਡੀਓ ਐਪ ਜਾਂ ਸਟ੍ਰੀਮ ਰਾਹੀਂ ਸੁਣ ਸਕਦੇ ਹੋ।
📲 ਹੋਰ ਜਾਣਕਾਰੀ ਲਈ ਸਾਨੂੰ ਵੈਬਸਾਈਟ, ਫੇਸਬੁੱਕ ਅਤੇ ਇੰਸਟਾਗ੍ਰਾਮ 'ਤੇ ਫਾਲੋ ਕਰੋ।
