Kapeneta o le faigamalo a le FAST

E ui ina loka e le malo le tumau le maota fono o le palemene o Samoa, ae na faataunu'u lava le sauniga e faatautoina ai le faigamalo a le Faatuatua i le Atua Samoa ua tasi (FAST) i le Aso Gafua, lea na atoa iai le 45 aso talu ona mae'a palota i le Aso 9 o Aperila.

From left: Laauli Polataivao Schmidt, Olo Fiti Vaai, Leatinuu Wayne Sooialo o le FAST. Source: SBS Samoan Program/Galumalemana Autagavaia Tipi.

E le'i auai iai le Ao o le Malo, ae i se faatonuga mai le fofoga fetalai o le malo le tumau na lokaina ai le faitoto'a o le maota fono, ma faapea ai ona faia le sauniga o le faatautoga o le malo filifilia a le FAST i se fale'ie i lumafale o le palemene.

Ua tula'i mai ai Fiame Naomi Mata'afa i le tofi palemia, ae o Tuala Tevaga Ponifasio i le tofi sui palemia.