Ua 18 tausaga o saisaia le tina o Kathleen Folbigg i le fale puipui i le moliaga o lona fasiotia o lana fanau e to'a 4 - o tama e to'a 2 ma teine e to'a 2 - i le taimi na o faitau masina le matutua o pepe.
Ua fa'alua ona apili e Folbigg ona moliaga, ae fa'alua fo'i ona te'ena e le Fa'amasinoga o Fa'ai'uga Toe Iloilo i New South Wales.
Ae i se tusi ua saini 'a'ao iai ni tagata saienisi ma foma'i e to'a 90, ua latou tuleia ai le finauga ua tatau ona fa'asa'oloto le tina o Kathleen Folbigg, ona ua latou maua molimau faa-saienisi e lagolago ai se faai'uga o tamaiti uma nei na maliliu mai mafua'aga faa-natura ae le ona ua fasiotia e lo latou tina.
O le molimau, o se genetic variant e fa'aigoaina o le CALM2 ma na maua i pepe o Sarah ma Laura, ma le tina ia Kathleen Folbigg, ma o le gene lenei e mafua ai le arrhythmia, o se faama'i oso e vave ona oti ai se pepe.
