O se tamalii na soifua ane i Saina Faleata ma aoga i le tulaga lua a Saina se'e atu ai i le Kolisi a Levaula ma malaga ane e aotauina i Aukilani Niu Sila ma siitia mai ai i Ausetala ua faamanuiaina nei o se uluai Samoa ma se tagata pasefika muamua ua filifilia e avea ma Councillor i le Council a Blacktown.
O le Afioga ia Councillor Aumua Talia Amituanai ua iai nei i faamaumauga o se tamalii muamua Samoa ma le pasefika ua ofi atu i totonu o se Council e avea ma Councillor.O le faaeaina o Aumua na finagalo iai le Mayor a Blacktown ia Brad Bunting talu mai le tele o tausaga o galulue fesoasoani Aumua ma lona alii Afioga Aupaau Maposua ma la latou Fono i la latou faaitulagi ma le vaega faaupufai o le Labour.
O lona tama o le Afioga Tuipalusami Uiese mai Lotofaga Safata ae o lona tina o Pa'upa'u mai Saina Toamua.
O le Afioga Aupaau Maposua o le Peresetene a le Samoan Council Community Services Western Sydney ma o le tele o tausaga e ofo atu lo latou taimi e fesoasoani i galuega fai a le council.O le lua tausaga talu ai na amanaia ai e le Mayor ma lea Fono Faaitulagi i Blacktown le tautua a lenei tamalii a o saili ni sui tamaitai e fai ai se filifiliga.
Saunoa Aumua' o le finagalo o le Afioga i le Mayor ia Brad Bunting,ua lava ma totoe alii i totonu o le Council ae ua moomia ni tamaitai.Sa ia saunoa foi ua tofu atunuu ma o latou sui vagana ai Samoa ma le Pasefika."
Sa faamautuina le avea o lona suafa mo le sailiga tofi ae mulimuli ane ina ua lau le iuga e muamua le suafa o le ua avea ma Mayor ae tulaga lua ai lona tagata mai le toatolu na si'ilima.O le taimi nei ua galue Aumua e le gata i le talia o manaoga o tagata Samoa ma faalapotopotoga aemaise foi isi atumotu o le pasefika i vaega latou te moomia ai le fesoasoani.O fesoasoani uma e tatala mai e le Council ma le malo e pei o fesoasoani tau taaloga lakapi na ia faasino iai le NSW Samoan Senior Rugby Union.O leisi faalapototpotoga e faatauaina le aotauian o aganuu ma siva pasefika o le Elevate Dance Group na ia fesoasoani ai fo'i ma tagata lautele e fia maua se fesoasoani i o latou fanua ma fale.
