O se tamaitai talavou ua faaigoaina lana itulau Social media ia Jasmin Eats ua silia ma le miliona tagata ua latou maimoaina ana ata e tofoina ai meaai eseese mai soo se atunuu o le lalolagi e aofia ai Samoa.
Jasmin Eats ma lana faalauiloa i taumafa Samoa i luga o lana Polokalame.Ua silia ma le miliona ma ona tupu i latou e fiafia ma maimoaina ana ata video i luga o le tik tok instagram ma le facebook.Sa fanau o ia i Egelani ma e fitu tausaga ua siitia mai i Brisbane a o lea ua nofo i Watson Bay i Sini.
Sa amata mai lona fiafia e taumafa soo se meaai atunuu i nai tausaga talu ai ma e le'i toe tepa i tua ma faaauau ai lava.E iai lana uo Samoa e fiafia i meaai na ia faasoa atu e asiasi i se faleoloa e faatau ai taumafa Samoa ma le pasefika.O iina na amata fiafia ai loa i pai ma kekepuaa,palusami,taro oka ma le sapasui ma isi meaai Samoa.
Sa vave faamavae mai lana galuega Marketing lea sa maua ai lona tikeri mai le iunivesite.Sa iai foi le taimi na galue o se waiter i se faleaiga ae tuu uma lona malosi i le tofoina o taumafa a atunuu o le lalolagi.Sa matuai fiafia ina ua faatoa tofo i le luau mamoe ma le oka aua e ese mai taumafa a atunuu papalagi.Sa ia faamatala i le taimi muamua o laiititi sa tofo ai i le fe'e BBQ ma fiafia tele iai.
O loo fia asiasi fo'i Jasmin eats i Samoa i le lumanai ma atili faatele lona malamalama i tagata,aganuu ma taumafa faasamoa.Sa ia faailoa fo'i e le'o taumafai foi e suia lona naunau i meaai Samoa ma atunuu eseese aua o loo matua fiafia lana au matamata i lana ala ata i luga o le tik tok ma isi auaunaga.
