A o sauni atu le Manu Samoa mo le Ipu o le lalolagi i le tausaga fou na maua se avanoa e toe asia ai seisi sui iloga muamua o le au le Afioga Tolumaanave Lio Falaniko o loo aumau i Perth Western Australia o loo galue ai i lana pisinisi o le Lio Falaniko Fitness. Talu ona ritaea o ia mai le lakapi faapolofesa o lana pisinisi i Ausetalia nei o le koleniga o tagata lautele i ana Gyms e lua i Perth ae le gata i lea o ni tama fusu amateurs faapea ni alii fusu faapolofesa e toalima.
O le Afioga ia Tolumaanave Lio Falaniko o se faataitaiga o se tama taalo na fofoa mai lava lana taalo i aoga tulaga lua ma kolisi i Samoa filifilia i le Manu Samoa ma ofi atu ai i kalapu lakapi faapolofesa mo le luasefulu tausaga.O se talavou na muamua fusu i faipelega sa avea ai lona tuaa ma se faiaoga.Sa avea fo'i o ia ma se sui o Samoa i le au volipolo mai lana kalapu iloga a Saleufi faatoa sefulufitu ona tausaga ma le lilo i manatu o loo faatalitali atu le lakapi e momoli atu lana taleni i le Manu Samoa ma ni au faaitumalo tetele i Niu Sila ma Iapani.
O se alii faiaoga i lana Kolisi CCWS poo Pesega e suafa ia 'Seve' na taumulimuli i le volipolo a lio ma anau ai e alu ane faataitai i le lakapi ma faamasani.Na taalo 1st XV Falaniko ma amata taalo Senior A ai mo Vaimoso ma nisi o le Manu Samoa na fesoasoani i le tau aotauina o le taaloga ma ona tulafono.O nisi o uso ua faiilagi le folauga e pei o Malaki Iupeli ae na toe maua atu e Lio Falaniko ana uo Vaimoso ia Tupo Faamasino ma Filitoga Lameta i totonu o le Manu Samoa.
O le Aso Toonai lava na uluai filifilia ai o ia mo Samoa na muai taaalo i le Aso Lulu i le aufili a tama aoga na fetaui ma le aufili a tama aoga a Ausetalia lea na malaga taamilo atu i Samoa.
E le'i toe tepa i tua le loka a le Manu Samoa ae na malaga atu i Niu Sila ma taalo kalapu ia Waitemata,Auckland Marist o ni au sa tumu i sui o le All Blacks faatoa minoi ai loa i lalo i Wellington faasolosolo atu ai Otago ina ua manumalo le Manu Samoa i le Apia park ia Otago 1993."Sa fesili mai le faiaoga a Otago ia Gordon Hunter oute alu atu oute taalo i Otago " O lea vaitaimi na maoae le taaalo a le manu Samoa i le Super 10.
O lona ritaea ai i le tausaga e 2000 na faatoa faaogaina ai loa lana tusipasi tau Fitness training na faia i le Iunivesite a Otago ao taalo mo le Highlanders ma o le taimi nei o loo tautuaina ai le mamalu o tagata lautele i Perth.Ua lua nei tausaga o malolo mai i le faiaoga o le lakapi ae o lana miti ia toe fia vaaia le siitia o le malosi ma le matautia o le Manu Samoa e faapei o latou vaitaimi o taaalo.
