I tausaga uma e faitau selau miliona tālā e gaoia e tagata ma fa’alapotopotoga solitulafono i faiga e maileina ai tupe ma isi meatotino a tagata lautele.
O le tele o faiga tau fa’asesē nei e auala mai i feso’ota’iga i luga o le ‘upega tafa’ilagi poo le telefoni.
I nisi o taimi e gaoia ai numera o fa’aputuga tupe (bank accounts) poo pepa fa’amaonia e pei o tusifolau ma pepa fanau, ma fa’aaogāina ai i nisi o faiga solitulafono.
Na fa’aalia e se sui o le matagaluega o Consumer Affairs, o se tasi o faiga tau fa’asesē e ‘ai’oi mai ai i se fesoasoani mo se tagata o se ‘āiga o loo maua i se gasegase ma mana’omia vave se tupe.
O nisi o loo sili ona pu’eina i le mailei a le tau fa’asesē, o tagata matutua ma i latou e lē lava le malamalama i le gagana Igilisi.
E tele fo’i ina pu’eina ai tagata o loo aumau i Ausetalia i visa puipuia pe lē o ni tagata nofo mau.
Na fautuaina e le sui o le matagaluega tagata uma ina ia ‘aua ne’i tu’uina ni fa’amatalaga puipuia i seisi i luga o le telefoni poo le ‘upega o feso’ota’iga, ma siaki muamua i le ‘Scam Watch’ pe o se fa’alapotopotoga ua resitaraina i lalo o le tulafono.
Mo nisi talafou ma ripoti, fa'afofoga i le SBS Samoan i le 'upega tafa'ilagi poo le SBS Radio app, pe asiasi i le Facebook SBS Samoan.
