Polokalame lakapi iuni mo fanau i NSW

O le fa'alapotopotoga lakapi mo fanau laiti a Samoa i New South Wales, e le gata i le ta'aloga lakapi iuni, ae a'oa'oina ai fo'i le gagana ma nisi o vaega o le aganu'u i fanau a le atunu'u o loo ola a'e i le setete o New South Wales i Ausetalia.

'Aufili lakapi iuni a tama'ita'i i New South Wales. (Image by SBS/Usufono Ioane Lafoa'i).

I se talanoaga ma le peresitene talu ai o le NSW Samoa Juniors Rugby, le Afioga Tagaloa Dan, na ia fa'amatalaina ai le ‘autū o le fa’amoemoe i le a’oa’oina o fanau e ta’a’alo lakapi iuni, ae maua ai le mafutaga ma isi tamaiti Samoa i le setete, e a’oa’oina ai siva, aganu’u, ma le gagana Samoa.

O le Aso To’ona’i na asiasi atu ai le SBS Samoan i le faia o le talanoaga ma nisi o le fanau o loo i le NSW Samoa Rugby, ma le peresitene le Afioga a Tagaloa Dan, na faia ai le ta’amilosaga a ‘au mai atunu’u o le Pasefika i New South Wales ma se ‘au mai Canberra.

O le to’atele o le fanau teine na fa’atalanoaina, na molimau mai i le aogā ma le fiafia i le ‘auai fa’atasi ma isi tama’ita’i Samoa ua mafana ai fagauō ma fiafia ai i le fa’amalositino ma ta’a’alo fa’atasi i le ‘au a NSW Samoa Rugby.

O le fa’alapotopotoga lakapi lenei na fa’afaileleina nisi o tama ma teine Samoa ua o’o le taumafai i ‘au fa’avaomalo e pei o le Wallabies ma le Manusina.

Mo nisi talafou ma ripoti, fa'afofoga i le SBS Samoan i le 'upega tafa'ilagi poo le SBS Radio app, pe asiasi i le Facebook SBS Samoan.