O matou, na potopoto i le Fonotaga Aoao o le Faavae (National Constitutional Convention) i le 2017, omai mai vaega uma ole itūlagi i saute, matou te faia lenei tautinoga mai le fatu. O ō matou ituaiga o Tagata Apoliki ma Torres Strait na muai avea ma malo na pule (sovereign nation)i le konetineta o Ausetalia ma ona motu tulalata, ma pulea ai i ā matou lava tulafono ma aga. O lenei, sa faia e ō matou tuaā, fua agai i le faatulagana o la matou aganuu, mai lona Afuaga, fua agai i tulafono lē tusitusia mai taimi ua tuanai e lē o toe manatua ni faamaumauga, ma e fua i le faa saienisi i le silia ma le 60afe tausaga talu ai. O lenei pule o se talitonuga faaleagaga: ole sootaga ua augātupulagā i le va o le eleele, po o le tinā faalēnatura, ma Tagata Apoliki ma Torres Strait na amata soifua mai i lea vaitaimi, e tumau pea lo latou sootaga, ma e ao ona iai se aso e toe tuufaatasia ai ma o matou tuaā. O lenei fesoota’iga o le faavae o le umia o le palapala, pe sili atu foi, o le pule. E le’i mafai lava ona faamatu’u atu pe aveesea ma e tumau pea le vaavaalua ma le pule a le Crown. Pe faapefea ona ese seisi faamatalaga? O tagata na umia se eleele mo le 60afe tausaga ma lenei fesoota’iga paia ae lē toe iloa mai ile talaaga o le lalolagi i totonu o le 20 tausaga talu ai nei? Matou te talitonu, o le faia o ni suiga tetele tau le faavae ma fetuunai’ga tau le tamaoaiga, o le a susulu atu ai lenei pule ua autausagā e faapupula atili ai le avea o Ausetalia ma atunuu. I seisi ona tulaga, o matou o tagata aupito sili ona saisaitia i luga o le paneta. E lē o matou o ni tagata e fanau mai ma ni solitulafono. O ā matou fanau ua faaesea mai mai ō latou aiga I ni tulaga lē faamatalatalaina. E lē mafua lea ona ua leai so matou alofa mo i latou. O ō matou talavou ua faamalosia le faanonofo i nofoaga faasala i ni tulaga lē manuia. E tatau ona avea i latou ma ō matou faamoemoega mo le lumanai. O vaega ia o loo faamatala manino ai le mafuaaga o la matou faafitauli. O i tonu o loo taatia ai le tulaga ogaoga o le leai o so matou malosiaga. Ua ō matou sailia ni suiga ile Faavae ina ia faamalosia ai o matou tagata ma toe faasa’o lona tulaga i lo matou lava atunuu. Afai ae iā i matou le malosiaga i lo matou faasinomaga, o le a ola lelei ā matou fanau. O le a ō latou savavali i lalolagi e lua ma o le latou aganuu o le a avea ma a latou meaalofa i lo latou atunuu. Matou te valaau mo le tuuina o se leo o First Nations i le Faavae. O Makaratta o le faatumutumuga lea o la matou finau. O le omai faatasi i le maea ai o ni taimi faigata. O lo’o pueina ai ō matou faamoemoega mo se mafutaga tonu ma talafeagai ma tagata o Ausetalia, ma se lumanai manuia mo ā matou fanau e faavae i le amiotonu ma le maelegā. Matou te sailia se komisi a le Makaratta latou te faatonutonuina se faiga o ni maliega i le va o faigamalō ma First Nations ma le ta’uina o le mea moni e faatatau i lo matou talaaga. I le 1967 na faitauina i matou, i le 2017,ua matou sailia se avanoa e faafofogaina ai i matou. Na tuua e ō matou tuaa le nofoaga na faamautu iai le togālauapiga ma amata la matou feoaiga i lenei atunuu tele. Ua matou valaaulia oe ina ia tatou savavali faatasi ma matou I se gaioiga a Tagata Ausetalia mo se lumanai manuia.
Mo nisi faamatalaga faamolemole asiasi i le upega tafailalgi a le Uluru Dialogue i le www.ulurustatement.org pe imeli I le Indigenous Law Centre, UNSW i le ilc@unsw.edu.au
Ua faia e le SBS ia avanoa le Uluru Statement from the Heart I gagana e 63 ina ia faaauau ai le talanoaga aoao ma Cald komiuniti i a latou lava gagana.
