Tautua mo Samoa e auala i le lakapi a fanau

O le atina'eina o le lakapi iuni i alo ma fanau a Samoa i New South Wales, o se taumafaiga o loo silasila iai le Afioga Tagaloa Dan Tavita ma le komiti a le NSW Samoa Rugby Juniors, e le na o le lakapi, ae a'oa'oina ai le gagana ma nisi o tu ma aganu'u a Samoa.

Le peresitene o le NSW Samoan Rugby Juniors, le Afioga Tagaloa Dan Tavita. (Image by Usufono Ioane/SBS Samoan).

I se talanoaga ma le Afioga Tagaloa Dan Tavita i le aso o le tauvaga a 'au mai Samoa ma Fiti i St Mary's i Sini, na ia ta'ua ai le 'autu o le fa'amoemoe ina ia fesoasoani i alo ma fanau i le atina'eina o le taleni i le ta'aloga lakapi iuni.

Ae na saunoa fo'i Tagaloa, e le na o le lakapi le 'auga o le fa'amoemoe.

Mo nis o le fanau, o se auala lenei e maua ai le mafutaga ma isi tupulaga talavou Samoa e ta'a'alo fa'atasi ai i le lakapi, ae mafuta ai fo'i ma maua avano o faigauo ma isi tamaiti Samoa.

O le NSW Samoan Rugby Juniors e amata mai i le 12 tausaga le matutua, ma e o'o i le 300 tupulaga o fanau a Samoa o loo auai iai.

O loo iai le fa'amoemoe o 'au mai le Under-12's e tau i le Under-18's o le a tauva i le ta'amilosaga mo le Pacific Cup ma isi 'au a tupulaga talavou a le Pasefika i le malae i Whalan i le Aso 29 ma le Aso 30 o le masina nei o Novema.

Mo nisi talafou ma ripoti, fa'afofoga i le SBS Samoan i le 'upega tafa'ilagi poo le SBS Radio app, pe asiasi i le Facebook SBS Samoan