ඔස්ට්‍රේලියාව තුල ක්‍රියාත්මක වන 3G දුරකථන ජාලා භාවිතයෙන් ඉවත් කිරීමට ප්‍රධාන දුරකථන සැපයුම් සමාගම් කටයුතු කරමින් සිටී. මේ හේතුවෙන් තවදුරටත් 3G තාක්ෂනය භාවිතාවන සන්නිවේදන උපකරණ භාවිතා කරන්නන් අපහසුතාවයට පත්විය හැකි බවට විශ්වාස කෙරේ.
සමහර දුරකථන සාමාන්‍ය ඇමතුම් සඳහා 4G තාක්ෂනය භාවිතා කලද "000" ඇමතීම සඳහා 3G දුරකථන ජාලය භාවිතා කරයි. 3G සේවාව ක්‍රියාවිරහිත වන තෙක් ඔවුන්ගේ දුරකථනය මේ ආකාරයෙන් සකසා ඇති බව පරිශීලකයින්ට නොතේරෙනු ඇත
Telstra සමාගම විසින් තම 3G දුරකථන ජාලය අගෝස්තු 31වෙනිදා අක්‍රීය කිරීමට නියමිත වී තිබේ. Optus සමාගම විසින් තම දුරකථන ජාලය සැප්තැම්බර් මාසයේදී අක්‍රීය කිරීමට නියමිත වේ. මේ අතර TPG සහ Vodafone 3G දුරකථන ජාලය අක්‍රීය කිරීමේ කටයුතු එම සමාගම් විසින් පසුගිය ජනවාරි මාසයේ සිට ආරම්භ කර ඇත.
3G දුරකථන ජාලය ඕස්ට්‍රේලියාවෙන් ඉවත්කිරීම පිළිබඳව තොරතුරු මින් පෙර සිටම ජනතාවට දැනුම් දීමට කටයුතු කර ඇත. කෙසේ උවත් මේ වන විටත් 3G තාක්ෂනය මත ක්‍රියාත්මක වන උපකරණ භාවිතා කරන ඔස්ට්‍රෙලියානුවන්ගේ ප්‍රමාණය 530,000ක් පමණ වන බව සමීක්ෂණ දත්ත වාර්තා කර තිබේ.
මෙවැනි දුරකථන සහ සන්නිවේදන උපකරණ සාමාන්‍ය දුරකථන ඇමතුම් සඳහා 4G තාක්ෂනය භාවිතා කරන අතර ඕස්ට්‍රේලියාවේ හදිසි ඇමතුම් අංකය වන "000" ඇමතීම සඳහා 3G ජාලය භාවිතා කිරීමක් සිදුවේ. Voice over LTE යන තාක්ෂනය භාවිතයට මෙම උපකරණ සකසා නොතිබීම මෙයට හේතුව වී ඇත. බොහෝ විට වෙනත් රටවලින් සහ ව්‍යාජලෙස අනුකරණය කරන ලද ජංගම දුරකථන මෙම තාක්ෂනය රහිතව තිබිය හැක.
මෙහිදී 3G දුරකථන ජාලය අක්‍රීය වූ විගස හදිසි අවශ්‍යතා සඳහා හදිසි ඇමතුම් අංක වෙත ඇමතුම් ලබා ගැනීමට නොහැකි වනු ඇති. මේ පිළිබඳව බොහෝදෙනා නොදැනුවත්ව ජංගම දුරකථන භාවිතාකරන බව වාර්තා වේ. 3G ක්‍රියාවිරහිත වන තෙක් ඔවුන්ගේ දුරකථනය මේ ආකාරයෙන් සකසා ඇති බව පරිශීලකයින්ට නොතේරෙනු ඇත.
ඔස්ට්‍රේලියාව තුල භාවිතාවන මෙවැනි උපකරණ ප්‍රමාණය අප්‍රේල් මාසයේ ලක්ෂ හතරක් වූ අතර මෙම මාසයේදී එම ප්‍රමාණය 520000ක් පමණ වී ඇත. මෙය ඉතා භයානක තත්වයක් බව සන්නිවේදන කටයුතු අමාත්‍ය මිෂෙල් රෝලන්ඩ් පවසා සිටී.
මෙහිදී තම දුරකථනය Voice over LTE තාක්ෂනය භාවිතා කිරීම පිළිබඳව යම් සැකයක් පවතීනම් වහාම තම දුරකථන සේවා සැපයුම් කරු සම්බන්ද කර ඒ පිළිබඳව විමසා සිටිය යුතු බව අමාත්‍යවරිය පවසා සිටියාය. දුරකථන සැපයුම් සමාගම්ද මේ සම්බන්දයෙන් පීඩාවට පත්විය හැකි පාරිභෝගිකයින් සම්බන්ද කරගැනීමට කටයුතු කරමින් සිටී.
Optus සහ Telstra සමාගම් වල පාරිභෝගිකයින්ට 3498 අංකයට “3” ලෙස සඳහන් කෙටි පණිවිඩයක් යැවීමෙන් තම දුරකථනය 3G ජාලය අක්‍රීය වීමෙන් බලපෑමට ලක්වන්නේද යන්න පිළිබඳව තොරතුරු ලබාගැනීමේ හැකියාව පවතී.
මේ අතර මේ නිසා බලපෑමට ලක්වන දුරකතන භාවිතාකරන්නන්ට දුරකථන ඇමතුම් ලබා ගැනීමේදී හඬ පටයක් හරහා දැනුවත් කිරීම් කිරීමට කටයුතු කරන බව Telstra සමාගම පවසා සිටී.
3G ජාලය අක්‍රීය කිරීම සමහර වෛද්‍ය උපකරණ, ගොවිපල යන්ත්‍රෝපකරණ සහ EFTPOS පර්යන්තවලට ද බලපෑ හැකිය.
********************************************************************************
ඕස්ට්‍රේලියාවේ කාලීන තොරතුරු ඇතුලත් SBS සිංහල සේවයේ කෙටි පොඩ්කාස්ට් වලට සවන් දීමට, Apple Podcasts, Google Podcasts, Spotify, හෝ ඔබ කැමති වෙනත් පොඩ්කාස්ට් මාධ්‍යයකට පිවිස SBS සිංහල ලෙස සර්ච් කරන්න.
*********************************************************************************
