அமெரிக்காவில் வாழும் Munir Zanial, ஒரு மலேசியர். Spirit AeroSystems என்ற நிறுவனத்தில் விண்வெளி பொறியியலாளாராகக் கடமையாற்றுபவர். மலேசியாவின் 60வது சுதந்திர தினத்தை அவரது சக மலேசிய நண்பர்களுடன் கொண்டாடுவதற்காக அவர் வேலை பார்க்கும் நிறுவனத்தின் தொழிற்சங்கமான Spirit Boeing Employees Association (SBEA) உரிமையிலுள்ள ஒரு மைதானத்தை வாடகைக்கு எடுத்தார். அங்கே மலேசியக் கொடியைப் பறக்க விட்டு தனது இந்திய-மலேசிய நண்பர்களுடன் சுதந்திர தினத்தைக் கொண்டாடினார்.
ஆனால், மலேசிய தேசியக் கொடியில் அமெரிக்க கொடியில் இருக்கும் அதே நிறங்களும், அதைப் போன்ற வரிகளும் அவரை சிக்கலில் மாட்டும் என்று அவர் எண்ணியிருக்க மாட்டார்.
அமெரிக்க தேசியக் கொடியில் IS சின்னத்தைப் பதித்து Munir Zanial பறக்க விட்டார் என்று அவரை அமெரிக்க புலனாய்வுத்துறை FBIயிடம் யாரோ புகார் செய்துவிட, அவர் விசாரணைக்குள்ளாக்கப்பட்டார்.
ஒரு மாதத்தின் பின், அவர் மேல் எந்தத் தவறும் இல்லை என்று FBI கூறியிருந்தாலும், அந்த நிகழ்ச்சியைத் தொடர்ந்து, Spirit Boeing Employees Association (SBEA) தமது உரிமையிலுள்ள மைதானத்தை Munir Zanial வாடகைக்கு எடுக்க மறுப்புத் தெரிவித்தது.
இது குறித்து, அமெரிக்க மனித உரிமைகள் அமைப்பான The American Civil Liberties Union (ACLU), வழக்குத் தொடுத்துள்ளது. Spirit Boeing Employees Association (SBEA) இன அடிப்படையில் மட்டுமல்ல மத அடிப்படையிலும் பாகுபாடு காட்டுகிறது என்று குற்றம் சாட்டப்பட்டுள்ளது.
