Delio Anzaqeci Mouzinho: Hau lakon iha jogu ne'e maibe hau manan esperensia

Iha inisiu fulan Abril tinan 2026, joven boxista timor-oan, Delio Anzaqeci Mouzinho ho idade 26 anos, tama iha ring boxe profisionál iha Austrália ba dala uluk. Nia hasoru boxista professional australianu, Callum Peters, ne'ebé iha esperiénsia barak. Nia lakon jogu iha jogu ida ne'e no nia hatete "Hau lakon iha jogu ne'e, maibe hau manan esperensia".

Lisaun Husi Ring Boxe

Imajina ring boxe ida iha Austrália. Ema lubun hakilar ho maka'as, lampu sira iha fatin ne'e lakan ho nabilan. No iha sikun ida hamriik joven ida husi Timor-Leste, dook husi uma maibe lori hela esperansa husi nasaun tomak iha nia kabas.

Ida ne'e mak Delio Anzaqeci Mouzinho, joven 26 anos husi Timor-Leste, sente bainhira nia hasoru boxista profesional Australiano, Callum Peters, iha inisiau fulan Abril 2026. Jogu ne'ebe asiste diretamente husi Timor-oan balun iha Australia no barak haree husi online. Iha jogu ne'e Delio lakon iha ronde segundu.

Ba Delio, lakon ida ne'e halo nia laran triste tebes" Hau sente triste tebes no mos familia Timor laran tomak. Derrota ne'e afeta ema barak. Maibe ida ne'e la hamate ita nia espritu maibe atyu hadia liu tan ita iha futuru".

Ba atleta barak, krítika hafoin derrota bele halakon konfiansa. Maibé neineik bele fo perpetiva seluk - nune'e mos ho Delio ne'ebe hatetet katak "Momentu ne'eba hau prepara-an diak tebes. Premeriu Callum ema ida ne'ebe manan jogu internasional, nune'e ida ne'e oportunidade diak ba hau, lakon ka manan ne'e desizaun makas. Importante maka hau bele reprezenta ita nia rain".

Nia hatutan tan katak bainhira nia joga hasoru Callum, nia realiza nia nia-an no nivel ne'ebe mak nia iha, maibe nia kontente ho oportunidade. Nia admiti katak nia presija formasaun barak liután, dixiplina barak liután, no estratéjia di'ak liután iha futuru. "Nia ema ida ne'ebe mak esperensia tebes. Liu husi jogu ne'e, hau bele aprende barak liu tan"

 

Delio Anzaqeci Mouzinho, monu iha segundu ronde de kompetisaun hasoru boxista Australianu, Callum Peters iha inisiu fulan Abril 2026 Credit: Delio Anzaqeci Mouzinho, Boxista Timor-Leste

Ha'u lakon jogu, maibé ha'u manán esperiénsia husi ne'e

Delio Anzaqeci Mouzinho - Boxista Timor-Leste

Lia fuan ida ne'e emphaze mos husi, Troy Huckstepp, treinadór boxe australianu ida ne'ebé serbisu besik ho Delio no fo ona treinamentu balun ba Delio no maluk boxista timor-oan sira seluk iha pasadu. Nia haree Delio iha potensiál no nia mos haree lakuna ne'ebe presija hadia iha futuru.

Delio ho Troy hamutuk iha Press Conference ne'ebe halao iha Sydney antes joga iha Wollongong Credit: Troy Huckstepp

Troy " Hau hatene jogu ne'e difisil los, nia performance diak oituan. Maibe hau mos haree katak nia bele hadia ida ne'e. Nia bele hadia nia defesa no taktiku".

Nia hatutan katak, maske Delio lakon, nia iha korajen, dixiplina, no prontu atu aprende.

Jogu ne'e difisil los, Iha Australia boxista sira seluk tauk hasoru Callum

Troy Huckstepp - Treinador Boxe iha Australia

Oinsa ida ne'e hahu

Delio, mai husi munisipiu Lautem, husi familia ne'ebe suporta nia husi nia kiik kedan. Nia hahu nia jornada iha boxing, bainhira nia sei eskola iha Lautem. Nia haktuir katak " Hau uluk boot ona mak hetan treinamentu. Iha Lautem, ami iha fatin boxing ida ne'ebe fo treinamentu ba joven sira, no hau sempre haree sira treino boxing. Loron ida bainhira udan, treinador boxing nia bolu hau no hau hatete ba nia, hau mos hakarak treinu. Husi ne'eba kedan hau komesa treinu ho nia. ida ne'e akontese iha tinan 2019. Boxing hanesan desportu ida ne'e motiva hau ho hau nia familia".

Hahu husi ne'e, Delio tuir ona kompetisaun boxing nasional no mos turnament internasional bainhira nia kompete ho boxista Uzbekistan nian, Alisher Ismailov, iha tinan 2025. Nia manan iha kompetisaun sira ne'e hotu no bainhira oportunidade atu mai kompete iha Australia, nia hakarak tebes atu mai no koko nia forsa iha ne'e.

Delio, boxista timor-oan hasoru malu ho boxista husi Uzbekistan, Alisher, iha tinan 2025 Credit: Delio Anzaqeci Mouzinho - Boxista Timor-Leste

Delio hato'o nia sente bele hetan orguluhu tebes bele mai tuir kompetisaun iha Australia "Ha’u sente orgullu tebes bele mai no halo boxe iha Austrália. Ida nee Primeira Vez ba timor-oan atu tuir kompetisaun iha nee depois de Timor ukun-an".

Nia mos hatene katak joga iha Australia hanesan avansada diferensia tebes. Delio " Diferensa ne'e boot tebes - Austrália hanesan nasaun avansadu. Ha'u joga ona iha Indonézia no sira seluk maibé iha diferensa boot. Maibé ha'u sente Onra no orgullu tanba ha'u bele joga iha ne'ebá".

Delio hamutuk ho nia kolega Australiano nain rua ne'ebe suporta nia durante jogu iha Wollongong fulan Abril 2026 Credit: Troy Huckstepp

Troy Huckstepp ne'ebe hanesan mos treinador ba Delio iha inisiu iha Timor no mos lori nia mai Australia iha 2022 hodi hasoru boxista amador sira haktuir katak " Antes Delio mai Austrália tuir eventu profisionál, ha’u hatene katak nia iha progresu di’ak tebes. Ha'u hatene katak nia boxista di'ak ida. Hau hanoin Delio iha oportunidade tanba nia tuku makas, se sorte iha nia bele manan".

Nia hatete katak, jogu ne'ebe halao iha Austrália la'ós de'it revela Delio nia promesa — maibé mós dezafiu sira ne'ebé reál tebes ne'ebé dezenvolvimentu boxe nian iha Timor-Leste hasoru. Nia mos haree katak presija hadia liu tan atleta sira hanesan Delio sira nia forsa.

Troy "Programa boxe iha Timor presiza dezenvolvimentu ba amadora no profisional. Atu sai boxista ne’ebé di’ak, sira presiza kompetisaun maka’as iha nivel rua ne’e hotu. Nu’udar ema amadora, sei iha kompetisaun iha rai laran, bele aprende buat barak, téknika, tátika no bele prepara hodi partisipa iha eventu profisionál sira. Maibé atu sai boxista profisionál mós importante tanba sira iha oportunidade atu hetan rendimentu no bele atrai joven sira seluk atu tuir boxista.

Nia mos hakarak tebes atu kontinua apoiu boxista Timor-oan sira iha futuru atu nune'e sira bele mai kompeta iha Australia no mos rai seluk.

Mensajen no Agradesementu

Hanesan joven Timor-oan ne'ebe iha responsabilidade ba nasaun no mos ba nia maluk Timor-oan sira seluk, Delio, hakarak fahe mos nia mensajen ba joven sira iha Timor-Leste mak ne’e: 

Laos ema hotu bele reprezenta ita nia rain. Atu reprezenta ita nia rain, ita tenke treinu makas, fokus, disiplina ho diak, hatudu ba mundu katak Timor mos bele

Delio Anzacqeci Mouzinho - Boxista Timor-Leste

Se ita-boot hakarak reprezenta ita-boot nia nasaun, ita-boot tenke prontu ba dezafiu sira, krítika sira, no momentu susar sira.

Nia hato'o mos nia agradesementu ba kompanya sira ne'ebe suporta nian hanesan, Caltech Group Timor-Leste, Origin Timor, no sira seluk. Nia hatene katak jornada sira ne'e hotu posivel tanba sira nia tulun.

Delio, boxista Timor-oan, hasai foto hamutuk ho nain ba kompanya Caltech Group Timor-Leste. Nia hetan konfiansa no suporta husi kompanya ida ne'e durante nia joga iha Australia. Credit: Delio Anzacqeci Mouzinho - Boxista Timor-Leste

Nune'e mos hato'o nia agradasementu ba Timor-oan sira hotu iha Timor no iha rai liur ba sira hotu nia suporta.

"Hau nia obrigada barak ba Timor-oan sira hotu iha rai liur no mos rai laran, ne'ebe mak duarnte ne'e suporta ami liu hisi material no orasaun. Espera katak liu husi derrota ida ne'e, hau sei hadia liu tan iha futuru. Hau husu nafatin imi nia suporta no apoiu iha futuru mai ita sei hadia buat barak"

 

Delio, boxista Timor-oan hamutuk ho Timor-oan sira hela iha Australia ne'ebe mai fo suporta ba nia durante kompetisaun jogu hasoru boxista Australianu, Callum Peters, iha Wollongong Credit: Troy Huckstepp