གཙོ་གནད།
- གདོད་རིགས་མི་མང་དང་ཋོ་རི་སི་མཚོ་འགག་གླིང་ཕྲན་གྱི་མི་ཚོས་ལོ་ངོ་སྟོང་ཕྲག་མང་པོའི་རིང་གནམ་གཤིས་དང་རིགས་གཞུང་གི་དགའ་སྟོན། སྤྱི་ཚོགས་དང་གཏམ་རྒྱུད་སོགས་ཀྱི་འགྱུར་བ་དང་བསྟུན་ནས་གྱོན་ཆས་དང་རྒྱན་ཆ་བཟོས་ཡོད།
- ཐོག་མའི་མི་རིགས་ཀྱི་གྱོན་ཆས་ཇུས་འགོད་པ་རྣམསཀྱིས་སྤོབས་པ་དང་ལྡན་པའི་ཐོག་ནས་རང་ཉིད་ཀྱི་ལག་རྩལ་དེ་འཛམ་གླིང་ཡོངས་སུ་འགྲེམས་སྟོན་བྱེད་བཞིན་ཡོད།
- ཐོག་མའི་མི་རིགས་ཀྱི་དཔེ་གསར་ཅན་གྱི་གྱོན་ཆས་ཁྲོད་ཐོག་མའི་མི་རིགས་ཀྱི་སྒྱུ་རྩལ་པ་ཚོའི་ལག་རྩལ་ཡང་ཡང་མཉམ་སྤེལ་བྱེད་ཀྱི་ཡོད་ལ་ཁོང་ཚོར་དེ་དག་གི་རིན་པ་ཆེ་མཐོང་སྤྲོད་ཀྱི་ཡོད།
- སྲོལ་རྒྱུན་གྱི་ཤེས་བྱ་ལ་གཞི་བཅོལ་ནས་ཐོག་མའི་མི་རིགས་ཀྱི་ཇུས་འགོད་པ་རྣམས་ཀྱིས་རང་བྱུང་ཁོར་ཡུག་གི་རྒྱུན་གནས་ཀྱི་ལས་དོན་ཐོག་སྣེ་ཁྲིད་བྱེད་ཀྱི་ཡོད།
- དེང་སྐབས་ཐོག་མའི་མི་རིགས་ཀྱི་དཔེ་གསར་གྱོན་ཆས་གང་དུ་མངོན་རྒྱུ་ཡོད་དམ།
- ཐོག་མའི་མི་རིགས་ཀྱི་དཔེ་གསར་གྱི་གྱོན་ཆས་ལ་མི་འདྲ་བའི་ཆ་གང་ཡོད་དམ།
- ཐོག་མའི་མི་རིགས་ཀྱི་དཔེ་གསར་ཅན་གྱི་གྱོན་ཆས་ཇུས་འགོད་དེ་ཁོར་ཡུག་རྒྱུན་གནས་ལ་ཕན་གྱི་ཡོད་དམ།
- ཐོག་མའི་མི་རིགས་ཀྱི་གྱོན་ཆས་ཇུས་འགོད་པ་ཚོའི་ཆེད་ལམ་བུ་བསྐྲུན་པ།
- ཁྱེད་རང་གིས་ཐོག་མའི་མི་རིགས་ཀྱི་ཚོང་རྟགས་ཅན་གྱི་གོན་ཆས་གྱོན་ན་འགྲིག་གམ།
མི་སེར་སྤེལ་ཡུལ་མ་ཆག་པའི་གོང་ལ་ཨོ་སི་ཊོ་ལི་ཡའི་ནང་གི་ཐོག་མའི་མི་རིགས་ཀྱི་མི་ཚོས་རང་ཉིད་ཀྱི་གནམ་གཤིས་དང་། ཁོར་ཡུག འཚོ་བའི་གནས་སྟངས་ལ་འཚམས་པའི་གྱོན་ཆས་འཕེལ་རྒྱས་བཏང་ཡོད། མི་ཚོས་གང་གྱོན་པ་དེས་ཁོང་ཚོ་སུ་ཡིན་པ་དང་། གང་ནས་ཡོང་བ་། འབྲེལ་བ་ཇི་ལྟར་ཡོད་པ་བཅས་མཚོན་ཐུབ།
ཐོག་མའི་མི་རིགས་ཀྱི་ཇུས་འགོད་པ་མང་པོ་ཞིག་གིས་ད་དུང་ཡང་དཔེ་གསར་གྱི་གྱོན་ཆས་ནི་ལོ་རྒྱུས་དང་རིག་གསུང་རྒྱལ་ཁབ་ལ་དུང་སེམས་བཅས་ཉིན་རེའི་འཚོ་བའི་ནང་ནས་མངོན་པར་བྱེད་པའི་བརྒྱུད་ལམ་ཞིག་ཏུ་བརྩི་བཞིན་ཡོད།
དེང་སྐབས་ཐོག་མའི་མི་རིགས་ཀྱི་དཔེ་གསར་གྱོན་ཆས་གང་དུ་མངོན་རྒྱུ་ཡོད་དམ།
ལོ་མང་རིང་གདོད་རིགས་མི་མང་དང་ཋོ་རི་སི་མཚོ་འགག་གླིང་ཕྲན་གྱི་དཔེ་གསར་གྱོན་ཆས་རྣམས་བརྙན་འཕྲིན་བརྒྱུད་ལམ་གཙོ་བོ་ཁག་མཐོང་རྒྱུ་ཧ་ཅང་དཀོན་པོ་ཡིན། ནུབ་ཕྱོགས་པའི་རྣམ་པ་ཅན་གྱི་གྱོན་ཆས་རྣམས་ལས་འགུལ་ཁག་དང་། སློབ་གྲྭ། གཞུང་གི་སྲིད་བྱུས་སོགས་ཀྱི་བརྒྱུད་ནས་དར་ཁྱབ་བཏང་ཡོད། དེའི་བར་གདོད་རིགས་མི་མང་ཚོས་རིག་གཞུང་དང་གྱོན་སྲོལ་རྣམས་རང་གི་སྤྱི་ཚོགས་དང་དུས་སྟོན་ཁག་གི་བརྒྱུད་གསོན་པོར་ཉར་ཡོད།
འདས་པའི་ལོ་བཅུ་ཕྲག་གཅིག་གི་ནང་གཞི་ནས་གནས་སྟངས་དེར་འགྱུར་བ་འགྲོ་འགོ་བཙུགས་ཡོད། ད་ཆ་གདོད་རིགས་མི་མང་གི་གྱོན་ཆས་ཇུས་འགོད་པ་རྣམས་འཛམ་གླིང་ཡོངས་སུ་སྤོབས་པ་དང་ལྡན་པའི་ཐོག་ཚབ་མཚོན་བྱེད་བཞིན་ཡོད།
ཨོ་སི་ཊེ་རེ་ལི་ཡའི་གྱོན་གོས་གཤོམ་སྟོན་གྱི་མདུན་ཕྲག་ལྟ་བུའི་རྒྱལ་ཡོངས་ཀྱི་བྱེད་སྒོ་ཁག་ཏུ་གདོད་རིགས་མི་མང་དང་ཋོ་རི་སི་མཚོ་འགག་གླིང་ཕྲན་གྱི་གྱོན་ཆས་མཐོང་ཐུབ་པ་མ་ཟད། ལོ་རེའི་ཐོག་མའི་མི་རིགས་ཀྱི་གྱོན་ཆས་གཤོམ་སྟོན་་རྒྱལ་ཁབ་ནས་རྒྱན་ཆས་བར་ཞེས་པ་དང་། ཝོག་ལྟ་བུའི་དུས་དེབ་ཆེ་ཁག་གི་མདུན་ཤོག་ཏུ་དུ་འཁོད་པ། ཐོག་མའི་མི་རིགས་ཀྱི་གོས་རྒྱན་དང་ཇུས་འགོད་དང་རྒྱལ་ཡོངས་ཀྱི་ཐོག་མའི་མི་རིགས་ཀྱི་གོས་རྒྱན་གྱི་བྱ་དགའ་ལྟ་བུའི་ལས་འགུལ་ཁག་གིས་ཐོག་མའི་མི་རིགས་ཀྱི་གསར་གཏོད་པ་རྣམས་ལ་རང་དབང་དང་མངོན་གསལ་དོད་པའི་སྡིངས་ཆ་བསྐྲུན་རྒྱུར་རོགས་རམ་བྱས་ཡོད།
དྷུན་གྷུ་ཊེ་དང་ཨ་ན་ཡི་ཝན་གྱི་སྒྱུ་རྩལ་བ་དང་། གདོད་རིགས་ཀྱི་དཔེ་གསར་གྱོན་ཆས་ཞེས་པའི་དྲ་ལམ་སྤྱི་ཚོགས་གསར་འཛུགས་པ་ཡ་ཊུ་ཝི་ཌར་སི་ཧན་ཊེ་ཡིས་སི་ཌི་ནེ་ནང་འཚར་ལོངས་བྱེད་སྐབས་གདོད་རིགས་ཀྱི་ཚབ་མཚོན་ཇི་ལྟར་དཀོན་པོ་ཡོད་པ་དྲན་གསོ་བྱས་ཡོད།
ང་རང་སོ་སོའི་ངོ་བོ་དང་འབྲེལ་བ་བསྐྲུན་འདོད་པ་མ་ཟད་ཕྱོགས་གཞན་ཞིག་ནས་དེང་རབས་ཅན་གྱི་ཐོག་མའི་མི་རིགས་ཀྱི་ངོ་བོ་མངོན་པར་བྱེད་རྒྱུའི་ཐབས་འཚོལ་བཞིན་ཡོད་པས། དཔེ་གསར་གྱོན་ཆས་ནི་དམིགས་ཡུལ་དེ་སྒྲུབ་པའི་ལམ་ཡག་པོ་ཞིག་ཡིན་པ་ཤེས་སོང་།ཡ་ཊུ་ཝི་ཌར་སི་ཧན་ཊི།
ཝ་ཇུ་ཀི་ནུང་གར་གྱོན་ཆས་གཤོམ་སྟོན་པ་དང་། མོབ་ཨིན་ཧྥེ་ཤན་གསར་འཛུགས་པ་ནེ་ཐན་མེག་གོས་ཡིས་ཁོ་རང་ཐོག་མར་གྱོན་ཆས་གཤོམ་སྟོན་བྱེད་སྐབས་རྒྱུན་དུ་ཐོག་མའི་མི་རིགས་གཅིག་པུ་དེ་ཡིན་པ་དྲན་གསོ་བྱས་ཡོད།
ཁོ་པས་ད་ལྟ་དཔེ་གསར་གྱོན་ཆས་བཟོ་ལས་ཀྱི་ཁོངས་སུ་ཐོག་མའི་མི་རིགས་ཀྱི་ལག་རྩལ་ཅན་མང་བ་མཐོང་རྒྱུ་ཡོད་ཅེས་དང་།
“དེ་ནི་ང་ཚོའི་མི་རིགས་ཀྱི་སྒྱུ་རྩལ་ཕྱིར་མངོན་རྒྱུ་བྱུང་བ་དང་དའེི་མཛེས་སྡུག་ལ་རྒྱལ་ཁབ་ཀྱི་བརྩི་མཐོང་ཐོབ་པ་རེད། དེ་ལྟར་ཡོང་རྒྱུ་ངེས་གཏན་ཡིན།” ཞེས་ཟེར།
ཐོག་མའི་མི་རིགས་ཀྱི་དཔེ་གསར་གྱི་གྱོན་ཆས་ལ་མི་འདྲ་བའི་ཆ་གང་ཡོད་དམ།
ཐོག་མའི་མི་རིགས་ཀྱི་ཚོང་རྟགས་མང་པོ་ཞིག་ལོ་རྒྱུས་སམ་ཡང་ན་རྒྱལ་ཁབ་དང་འབྲེལ་བ་ཡོད་པར་བརྗོད་ཀྱི་ཡོད། འདིར་རྒྱལ་ཁབ་ཅེས་པ་ས་ཆ་དང་ཆུ། ནམ་མཁའ། སྤྱི་ཚོགས། དང་རིག་གཞུང་བཅས་ལ་གོ་གི་ཡོད།
ཇུས་འགོད་རྣམས་ས་གནས་ངེས་ཅན་དང་སྐད་ཡིག ཡང་ན་རིག་གཞུང་གི་བརྗོད་གཞི་དང་འབྲེལ་བ་ཡོད།
པར་རིས་ནི་ཐོག་མའི་མི་རིགས་ཀྱི་སྒྱུ་རྩལ་བ་ཚོས་བཟོས་པ་ཡིན་ཞིང་ཁོང་ཚོར་ཆེ་མཐོང་དང་གླ་ཕོགས་སྤྲོད་ཀྱི་ཡོད། ཚོང་རྟགས་མང་པོ་ཞིག་གིས་དལ་པོའི་ངང་ལས་ཀ་བྱས་ནས་ཁོར་ཡུག་སྲུང་སྐྱོབ་དང་སྤུས་ཚད་ལ་དོ་སྣང་བྱེད་ཕྱིར་ལྡེབ་ཚོང་གི་འབོར་ཉུང་ཉུང་བཟོ་གི་ཡོད།
ལན་ཌ་ཞེས་པའི་སྤྲོ་སྐྱིད་ཁང་གི་གྱོན་པའི་ཚོང་རྟགས་ཀྱི་འགན་འཛིན་དང་གསར་གཏོད་པ་ཡུལ་ནོ་ནས་ཡིན་པའི་ལན་ཌ་གྷེ་ཀ་མན་གྷུ་ཡིས་མོ་རང་གི་ཚོང་རྟགས་དེ་རང་གི་རིག་གཞུང་རྣམས་གུ་ཡང་དང་དགའ་བསུ་ངང་བརྒྱུད་སྤེལ་བྱེད་རྒྱུའི་ཆེད་དུ་བསྐྲུན་པ་ཞིག་ཡིན་ཅེས་བརྗོད་ཡོད།
ང་ཚོས་དུས་རྒྱུན་ཁ་དོག་དང་རིག་གཞུང་། སྤྲོ་སྣང་བཅས་ལ་རྒྱབ་སྐྱོར་བྱས་ཏེ་དོན་དངོས་སུ་དཔེ་གསར་གྱི་གྱོན་ཆས་ཀྱི་སྒྱུ་རྩལ་བེད་སྤྱོད་བྱས་ཏེ་ང་ཚོའི་རིགས་གཞུང་ལ་རྒྱུས་ལོན་མེད་པ་ཚོར་ཚོང་རྟགས་འདི་བརྒྱུད་ནས་ཨོ་སི་ཊེ་ལི་ཡའི་ངོ་བོ་དང་རིགས་གཞུང་གི་རྣམ་མང་རང་བཞིན་ལ་འབྲེལ་འདྲིས་ཡོང་རྒྱུར་གུ་ཡང་པའི་དགའ་བསུ་བྱེད་ཀྱི་ཡོད།ལན་ཌ་གྷེ་ཀ་མན་གྷུ།
ཐོག་མ་ནས་ཁོ་མོའི་ཇུས་འགོད་རེ་ལ་དེ་མཐུན་གྱི་གཏམ་རྒྱུད་རེ་ལྡན་ཡོད། མོ་ཆས་དང་སྟོད་གོས་སོགས་ཀྱི་སྟེང་དུ་བཀོད་པའི་རི་མོ་དག་དགའ་དགའ་སྤྲོ་སྤྲོ་ཙམ་མ་ཡིན་པར་རིག་གཞུང་དང་ལོ་རྒྱུས་སམ་སྤྱི་ཚོགས་སྐོར་ལ་གླེང་སློང་བྱེད་རྒྱུའི་གཞིར་གྱུར་ཡོད།
ཐོག་མའི་མི་རིགས་ཀྱི་དཔེ་གསར་ཅན་གྱི་གྱོན་ཆས་ཇུས་འགོད་དེ་ཁོར་ཡུག་རྒྱུན་གནས་ལ་ཕན་གྱི་ཡོད་དམ།
ཐོག་མའི་མི་རིགས་ཀྱི་ཇུས་འགོད་པ་མང་པོས་རང་ཉིད་ཀྱི་ལས་ཀ་དེ་ས་གཞི་དང་རང་བྱུང་གི་ཐོན་ཁུངས་དང་སྔ་མོ་ཞིག་ནས་ཡོད་པའི་འབྲེལ་ལམ་ཞིག་གི་ཆ་ཤས་ཡིན་པར་མཐོང་གི་ཡོད། སྲོལ་རྒྱུན་གྱི་གྱོན་ཆས་བཟོ་སྟངས་ནི་དགོས་མཁོ་ལྟར་བེད་སྤྱོད་བྱེད་པ་དང་། སྲོག་ཆགས་དང་རྩི་ཤིང་ལ་བརྩི་བཀུར་བྱེད་པ། ནམ་དུས་ལ་རྒྱུས་ལོན་ཡོད་པ་བཅས་ལ་གཞི་བཅོལ་ཡོད། དེང་རབས་ཀྱི་གདོད་རིགས་ཇུས་འགོད་པའི་ཚོང་རྟགས་ཁག་གིས་བསམ་བློ་དེ་དག་དེང་སང་གི་དཔེ་གསར་གྱོན་ཆས་ཀྱི་སྒྲོམ་གཞི་དང་བསྟུན་གྱི་ཡོད།
ཡ་ཏུ་ཡིས་ཐོག་མའི་མི་རིགས་ཀྱི་ཤེས་བྱ་དེ་གནམ་གཤིས་འགྱུར་ལྡོག་དང་ཁོར་ཡུག་གི་གཏོར་བཤིག་ལ་གདོང་ལེན་བྱེད་ཐབས་བརྩོན་མཁན་གྱི་བཟོ་ལས་ཁག་ལ་ཧ་ཅང་གལ་ཆེན་ཡིན་པར་ཡིད་ཆེས་བྱེད་ཀྱི་ཡོད། “ཐོག་མའི་མི་རིགས་ཀྱི་ཇུས་འགོད་པ་ཚོས་རང་བྱུང་ཐོན་ཁུངས་ལ་བསམ་བློ་གཏོང་བཞིན་ཁེ་འབབ་ཡོད་པའི་ཚོང་ལས་གཉེར་རྒྱུའི་ཐད་སྣེ་ཁྲིད་བཞིན་པ་རེད" ཅེས་བརྗོད་ཡོད།
ཉོ་མཁན་ཚོར་མཚོན་ན། དེ་ནི་རིག་གཞུང་དང་དོ་འཁུར་དང་ཕུགས་རྒྱུན་རིང་བའི་ཕྱིར་བཟོས་པའི་གྱོན་ཆས་འདེམས་རྒྱུ་དེ་ཡིན།
ཐོག་མའི་མི་རིགས་ཀྱི་གྱོན་ཆས་ཇུས་འགོད་པ་ཚོའི་ཆེད་ལམ་བུ་བསྐྲུན་པ།
གདོད་མའི་མི་རིགས་དང་ཋོ་རེ་སི་མཚོ་འགག་གི་གླིང་ཕྲན་གྱི་མི་རྣམས་ཀྱིས་བདག་གཉེར་བྱེད་བཞིན་པའི་ཚོང་རྟགས་དང་ལས་གྲྭ་མང་པོ་ཞིག་གིས་དཔེ་གསར་གྱོན་ཆས་བཟོ་ཚོང་གི་ཁོར་ཡུག་ཁྱོན་ལ་གླ་ཆ་ཡོད་པའི་ལས་ཀའི་གོ་སྐབས་བསྐྲུན་གྱི་ཡོད། ལན་ཌ་ཡིས་ཁོ་མོའི་ཚོང་རྟགས་བརྒྱུད་ལུང་ཁུག་དང་མཐའ་མཚམས་ཀྱི་ལུང་པ་རྣམས་བཟོ་ཚོང་གི་གནས་ཚད་ཅན་གྱི་གོ་སྐབས་ཁག་ལ་འབྲེལ་མཐུད་བྱེད་ཀྱི་ཡོད། ལས་འཆར་དང་མཉམ་ལས་བརྒྱུད། ཁོ་མོའི་ཚོང་རྟགས་ཀྱིས་གསར་དུ་འབུད་བཞིན་པའི་གྱོན་གོས་གཤོམ་སྟོན་པ་རྣམས་ལ་ཉམས་མྱོང་ཐོབ་རྒྱུར་རོགས་རམ་བྱས་ཏེ་ཁོ་ཚོ་རང་ཉིད་ཀྱི་ལས་རིགས་ནང་འགྲོ་ཐུབ་པ་ཡོང་གི་ཡོད། "ང་ཚོས་ངོ་སྤྲོད་བྱས་པའི་གྱོན་གོས་གཤོམ་སྟོན་པ་མང་པོ་ཞིག་ཨོ་སི་ཊེ་ལི་ཡའི་གཤོམ་སྟོན་པའི་ལས་ཁུངས་སྐད་གྲགས་ཆེ་ཤོས་ཁག་དང་། རྒྱལ་སྤྱིའི་གྱོན་གོས་གཤོམ་སྟོན་ཁག་གི་ནང་འཛུལ་བཞུགས་བྱ་ཐུབ་པ་དང་། དེ་འདྲའི་ལས་འགུལ་ངོ་མཚར་ཅན་མང་པོ་ཞིག་བཀོད་སྒྲིག་བྱས་ཏེ་རང་ཉིད་ཀྱི་རང་དབང་ཅན་གྱི་དཔལ་འབྱོར་གྱི་ཡོང་སྒོ་བསྐྲུན་ཐུབ་ཡོད།
ཡཱ་ཏུ་ཡིས་རྒྱལ་ཡོངས་ཀྱི་ཆ་ནས་གདོད་རིགས་མི་མང་གི་ཚོང་ལས་རྣམས་ནི་རྒྱལ་ཁབ་ཀྱི་དཔལ་འབྱོར་གྱི་ཆ་ཤས་གལ་ཆེན་ཞིག་ཡིན་པས་རྒྱབ་སྐྱོར་བྱེད་དགོས་པར་བརྗོད་ཀྱི་ཡོད། "ང་ཚོར་གདོད་རིགས་མི་མང་གི་བཟོ་ཚོང་གི་སྡེ་་ཞིག་ཡོད་པ་དེ་གྲུབ་འབྲས་ལྡན་པའི་ངང་འཕེལ་རྒྱས་འགྲོ་བཞིན་ཡོད། དེའི་ནང་ཇུས་འགོད་པ་དང་སྒྱུ་རྩལ་པ་མང་པོ་ཞིག་རྒྱལ་ཁབ་མཐའ་ཁུལ་སོགས་ཕྱོགས་ཡོངས་སུ་ལས་ཀ་བྱེད་བཞིན་ཡོད། དེར་བརྟེན་གདོད་རིགས་མི་མང་གི་དཔེ་གསར་གྱོན་ཆས་ཉོས་པ་དེ་ཐོག་མའི་མི་རིགས་ཀྱི་ཚོང་ལས་ལ་རྒྱབ་སྐྱོར་བྱས་པ་ཞིག་ཀྱང་ཡིན།
ཁྱེད་རང་གིས་ཐོག་མའི་མི་རིགས་ཀྱི་ཚོང་རྟགས་ཅན་གྱི་གོན་ཆས་གྱོན་ན་འགྲིག་གམ།
ཐོག་མའི་མི་རིགས་ཀྱི་དཔེ་གསར་གྱོན་ཆས་ཚུལ་བཞིན་གྱོན་ཤེས་རྒྱུར་དཀའ་ངལ་ཡོང་སྲིད་པས་འདིར་སྟབས་བདེ་བའི་ལམ་སྟོན་འགའ་ཡོད།
ཐོག་མའི་མི་རིགས་ཀྱིས་བཟོས་པའི་གྱོན་ཆས་ཀྱི་ཚོང་རྟགས་མང་པོར་"མཐུན་ཕྱོགས་ཀྱིས་སྤྱོད་རིགས།"ཅེས་གསལ་པོར་བཤད་ཡོད། དེའི་དོན་ནི་སུས་ཀྱང་གྱོན་ཆོག་ཟེར་བ་རེད།
འགའ་ཤས་ནི་མཛད་སྒོ་འམ་དམིགས་བསལ་གྱི་རིག་གཞུང་གི་བྱེད་སྒོ་སོགས་ལ་བེད་སྤྱོད་བྱེད་པ་ཁོ་ན་ཡིན་ཞིང་། དེ་དག་ནི་གདོད་རིགས་མི་མང་དང་ཋོ་རི་སི་མཚོ་འགག་གླིང་ཕྲན་གི་མི་རིགས་ཁོ་ན་ལ་ཡིན། དེ་དག་ནི་རྒྱུན་པར་དྲ་ཐོག་གམ་ཚོན་རྟགས་ཐོག་གསལ་པོར་བཀོད་ཡོད།
ཚོང་རྟགས་མང་པོས་དྲ་ཐོག་གམ་ཚོན་རྟགས་ཐོག་ཇུས་འགོད་ཀྱི་རྒྱབ་ལྗོངས་དང་། སྒྱུ་རྩལ་པ། སྤྱི་ཚོགས། དེ་བཞིན་ཇུས་འགོད་ཀྱི་གཏམ་རྒྱུད་སྐོར་གྱི་གནས་ཚུལ་བཀོད་ཡོད།
ཡུ་ཊུ་ཡིས"ངས་བཤད་ན་ཐོག་མའི་མི་རིགས་ཀྱི་ཇུས་འགོད་པ་མང་ཆེ་བས་མི་ཚང་མས་གྱོན་ཐུབ་པའི་གྱོན་ཆས་བཟོ་ཡི་ཡོད་རེད། དེ་ནི་དགའ་འོས་པ་ཞིག་རེད། རྒྱུ་མཚན་ནི་ཐོག་མའི་མི་རིགས་ཀྱི་གཏམ་རྒྱུད་བཤད་ནི་ཨོ་སི་ཊེ་ལི་ཡའི་ངོ་བོའི་གཙོ་བོ་ཡིན་པ་དང་། ང་ཚོའི་རིག་གཞུང་ནི་ཧ་ཅང་གུ་ཡངས་དང་དྲོད་ཁོལ་ལྡན་པ་ཡིན་པས། མི་ཚོས་དེ་ལ་སྤོབས་པ་སྐྱེ་གཞིར་གྱུར་རྒྱུ་དེ་ང་ཚོའི་དམིགས་ཡུལ་ཡིན།་"ཅེས་འགྲེལ་བཤད་བྱས།
ནེ་ཐན་གྱིས་དཔེ་གསར་གོན་ཆས་ནི་གཞིས་སྤོ་བ་གསར་པ་ཚོས་གདོད་རིགས་མང་ཚོགས་ཀྱི་སྤྱི་ཚོགས་དང་འབྲེལ་བ་བྱེད་པའི་དེང་རབས་ཅན་གྱི་དགའ་སྤྲོ་ལྡན་པའི་ཐབས་ལམ་ཞིག་ཏུ་ངོས་འཛིན་བྱེད་ཀྱི་ཡོད། ཐོག་མའི་མི་རིགས་ཀྱི་ཚོང་རྟགས་ཁག་ལས་ཉོ་བ་དང་། ཁོང་ཚོའི་གྱོན་ཆས་གཤོམ་སྟོན་ལ་ལྟ་རུ་འགྲོ་བ། ཡང་ན་སྤྱི་ཚོགས་བརྒྱུད་ལམ་ཁག་ཏུ་ཁོང་ཚོའི་ཇུས་འགོད་པ་ཚོར་རྗེས་འབྲང་བྱེད་པ་བཅས་ཡོངས་རྫོགས་འབྲེལ་ལམ་ཚུགས་པའི་རྒྱལ་སྒོ་ཞིག་ཡིན།
“ཨོ་སི་ཊེ་ལི་ཡའི་རིག་གཞུང་ནང་ཚུད་པའི་ཆ་ཤས་སུ་གྱུར་བའི་གཞི་ཡིན་པ་ལྟར་དེ་ནི་ང་ཚོའི་སྤྱི་ཚོགས་དང་འབྲེལ་བ་བྱེད་པའི་ཐབས་ལམ་ཡག་པོ་ཞིག་རེད།”
ཐོག་མའི་མི་རིགས་ཀྱི་དཔེ་གསར་གྱོན་ཆས་ཀྱིས་ཐ་ན་ང་ཚོས་རྒྱུན་གཏན་དུ་སྤྱོད་བཞིན་པའི་གོན་པ་ཙམ་ཞིག་གིས་མི་རིགས་ཕན་ཚུན་དབར་གུས་བརྩི་དང་འབྲེལ་ལམ་འཛུགས་པའི་ལམ་ཕྲན་གཏོད་ཐུབ་ཀྱི་ཡོད།
ཨོ་སི་ཊེ་ལི་ཡར་གནས་སྤོ་བྱས་རྗེས་རིན་ཐང་ལྡན་པའི་གནས་ཚུལ་དང་ལམ་སྟོན་མང་ཙམ་ཤེས་རྟོགས་བྱེད་པའི་ཆེད་དུ། ཨོ་སི་ཊེ་ལི་ཡ་འགྲེལ་བརྗོད་ཀྱི་ཆེད་སྒྲིག་སྒྲ་བརྙན་ལེ་ཚན་ཁག་ལ་ཉན་པའམ་རྗེས་འབྲང་བྱེད་རོགས།
ཁྱེད་ལ་དྲི་བ་དང་བརྗོད་གཞི་གང་ཞིག་གི་སྐོར་ལ་བསམ་འཆར་ཡོད་ན་ང་ཚོར་ australiaexplained@sbs.com.auལ་གློག་འཕྲིན་གཏོང་རོགས།
