གཟེངས་རྟགས་དེར་ལོ་ངོ་ ༦༡ རིང་གི་ལོ་རྒྱུས་ཡོད་པ་དང་། དེ་ཡང་ཐོག་མར་ཏཱ་སི་མ་ནི་ཡའི་མི་ཞིག་ལ་(Australian of the Year) ཞེས་ལོ་འདིའི་ཨོ་སི་ཊོ་ལི་ཡའི་མི་སེར་ཞེས་པའི་གཟེངས་རྟགས་དེ་ཕུལ་ཡོད་འདུག
ཕྱི་ལོ་ ༢༠༢༡ ལོའི་ཨོ་སི་ཊོ་ལི་ཡའི་མི་སེར་ཞེས་པའི་གཟེངས་རྟགས་བཞེས་མཁན་བུད་མེད་བཞི་པོ་ནི་ལོ་ན་ཆེ་ཆུང་འདྲ་མིན་དང་། བྱས་རྗེས་ཀྱི་རྒྱབ་ལྗོངས་འདྲ་མིན་སྣ་ཚོགས་ཡིན་པ་དང་། དེ་ཡང་བུད་མེད་ལོ་ཆུང་ཞིག་གིས་སྲོག་ཉེན་ལས་ཐར་བའི་བཙན་གཡེམ་གྱི་གནད་དོན་ཐད་ཞུ་གཏུགས་ཀྱི་ལས་འགུལ་སྤེལ་བ་དང་། ཨེ་བྷོ་རི་ཇི་ནར་མི་རིགས་ཡིན་པའི་བུད་མེད་ལོ་ལོན་ཞིག་གིས་ཤེས་ཡོན་དང་རིག་གཞུང་རང་དབང་ཐད་ལས་འགུལ་སྤེལ་ཡོད་འདུག
གཞན་ཡང་སྤྱི་ཚོགས་ཁེ་ལས་པའི་བུད་མེད་ཅིག་གིས་བུད་མེད་སྒེར་གྱི་གཙང་སྦྲ་འཕྲོད་བསྟེན་ལ་དགོས་མཁོ་ཅ་དངོས་རོགས་རམ་དང་། དེ་བཞིན་གཞིས་སྤོས་ལ་ཡོང་མཁན་བུད་མེད་ཅིག་གིས་ཁོང་རང་ཉིད་ཀྱི་ཉམས་མྱོངས་ལ་བརྟེན་ནས་གཞིས་སྤོས་ལ་ཡོང་མཁན་བུད་མེད་གཞན་གྱི་དཀའ་ངལ་སེལ་རོགས་གནང་མཁན་དེ་འདྲ་ཆགས་ཡོད་འདུག
ཉེ་ཆར་ཕྱི་ཟླ་ ༡ ཚེས་ ༢༥ རེས་གཟའ་ཟླ་བ་ཉིན་ཨོ་སི་ཊོ་ལི་ཡའི་རྒྱལ་ས་ཁེན་བྷེ་རའི་ནང་ཨོ་སི་ཊོ་ལི་ཡའི་སྲིད་བློན་སི་ཀོ་ཊི་མོ་རེ་སོན་མཆོག་གིས་གཟེངས་རྟགས་ཐོབ་མཁན་དང་། དེ་ཡང་འདི་ལོ་གཟེངས་རྟགས་ཐོབ་མཁན་ཚང་མ་བུད་མེད་ཡིན་པའི་གསལ་བསྒྲགས་གནང་ཡོད་པ་རེད།
དེ་ཡང་སྲིད་བློན་སི་ཀོ་ཊི་མ་རེ་སོན་མཆོག་གིས་བྱ་དགའ་འདི་དག་ནི་ཨོ་སི་ཊོ་ལི་ཡའི་མི་མང་ཚོས་རྒྱལ་ཁབ་དང་། རང་དབང་། ཐུན་མོངས་ཀྱི་ཆེད་དུ་ག་རེ་སྒྲུབ་ཐུབ་ཀྱི་ཡོད་མེད་དང་། ང་ཚོས་མཉམ་དུ་འབད་བརྩོན་བྱས་ནས་གྲུབ་འབྲས་ག་རེ་སོན་ཡོད་མེད་ལོ་འཁོར་དྲན་གསོ་གཏོང་མཁན་ཞིག་ཆགས་ཡོད།
ཕོ་མོ་དབྱེ་བ་མེད་པའི་འབད་བརྩོན་དང་། སློབ་སྦྱོང་། བློས་གཏོང་། ཁོང་ཚོའི་བརྩེ་སེམས་དང་ཁོང་ཚོའི་ཕན་ཚུན་རྒྱབ་སྐྱོར་ལ་བརྟེན་ནས་ཨོ་སི་ཊོ་ལི་ཡ་ཡག་པོ་ཞིག་བསྐྲུན་ཐུབ་ཡོད་པ་དང་། ད་དུང་དེ་ལས་ལྷག་པའི་ཨོ་སི་ཊོ་ལི་ཡ་ཞིག་བསྐྲུན་ཐུབ་ངེས་རེད་ཅེས་གསུངས་འདུག
ཐེངས་འདིར་གཟེངས་རྟགས་བཞེས་མཁན་ Grace Tame ལགས་ཁོང་མོ་ལོ་ན་ ༡༥ ཡིན་སྐབས་ལོ་ན་ ༥༨ ཡིན་པའི་ཁོང་གི་ཨང་རྩིས་དགེ་རྒན་ཞིག་གིས་བཙན་གཡེམ་བཏང་ཡོད་འདུག་པ་དང་། རྗེས་སུ་ཁོང་གི་ནག་ཉེས་ཐེར་འདོན་དང་བཙན་གཡེམ་གཏོང་མཁན་དེ་བཙོན་འཇུག་བྱས་ཡོད་འདུག ཡིན་ན་ཡང་ཏཱ་སི་མ་ནི་ཡའི་ནང་འཁྲིག་སྤྱོད་ཀྱི་ཁྲིམས་འགལ་སྙད་འདོག་ཁ་བཀག་པའི་ཁྲིམས་དེའི་འོག་ནས་བུ་མོ་ Tame ལགས་ཀྱིས་ལོ་ངོ་མང་པོའི་རིང་ཁ་གསང་མ་ཐུབ་པར་ལྷག་ཡོད་འདུག
ད་ལྟའི་ཆར་བུ་མོ་ Tame ལ་སྲོག་ཉེན་ལས་ཐར་པའི་བཙན་གཡེམ་ཕོག་མཁན་ཚོ་ལ་སེམས་ཤུགས་སྤར་བ་དང་། ཁྲིམས་ལུགས་འགྱུར་བ་གཏོང་དགོས་པའི་ལས་འགུལ་སྤེལ་བ་སོགས་ཀྱི་རྒྱུ་མཚན་ལ་བརྟེན་ནས་ཐེངས་འདིར་གཟེངས་རྟགས་དེ་ཐོབ་ཡོད་པ་དང་།
ཁོ་མོས་གཟེངས་རྟགས་དེ་ནི་བཙན་གཡེམ་ཕོག་ནས་སྲོག་ཉེན་ལས་ཐར་མཁན་བྱིས་པ་ཚང་མའི་ཆེད་དུ་ཡིན་སྐོར་འགྲེལ་བརྗོད་གནང་འདུག
བུ་མོ་ Tame ལགས་ཀྱིས། བཙན་གཡེམ་གྱི་དཀའ་ངལ་མྱོངས་ནས་གསོན་པོ་གནས་ཡོད་པའི་ཕྲུ་གུ་ཚོ། བྱ་དགའ་འདི་ནི་ང་ཚོ་ཚང་མའི་ཆེད་དུ་ཡིན་པ་དང་། ཁོང་གིས་ཁོ་རང་གི་ནག་ཉེས་འགྲེལ་བརྗོད་བྱས་ཡོད། དེ་ནི་འཇིགས་སུ་རུང་བ་ཞིག་རེད། དེ་སྔོན་ཁྲིམས་ལུགས་ཀྱིས་རྐྱེན་པས་མི་མང་གི་མདུན་དུ་ང་ཁུ་སིམ་མེར་བསྡད་དགོས་འཁེལ་ཡོད་ཀྱང་ད་ནི་དེ་འདྲ་སྡོད་མི་དགོས་པར་ཁྱེད་ཚོས་ངའི་འབོད་སྒྲ་འདི་ཐོས་ཀྱི་འདུག་གམ་ཅེས་གསུངས་འདུག
ཨོ་སི་ཊོ་ལི་ཡའི་གདོད་མའི་མི་རིགས་ཨ་བྷོ་རི་ཇི་ནའི་བུད་མེད་ལས་འགུལ་བ་དང་། ཤེས་ཡོན་ཅན། སྒྱུར་རྩལ་བ་བཅས་ཡིན་པའི་ལོ་ན་ ༧༣ ཅན་གྱི་བུད་མེད་ཌོ་ཊར་ Dr Miriam-Rose Ungunmerr མིང་གཞན་ Baumann ཨོ་སི་ཊོ་ལི་ཡའི་བྱང་ཕྱོགས་མངའ་སྡེ་ནང་ཨ་བྷོ་རེ་ཇི་ནའི་བུད་མེད་དགེ་རྒན་ཐོག་མ་དང་། ཨོ་སི་ཊོ་ལི་ཡ་མཉམ་འབྲེལ་གཞུང་འཛིན་ཚོགས་པའི་རྒྱལ་ཡོངས་སུ་ཡུལ་དེ་གར་ས་སྐྱེས་རྡོ་སྐྱེས་མི་རིགས་ལྷན་ཚོགས་ཀྱི་འཐུས་མི། དེ་བཞིན་ཕྱི་ལོ་ ༢༠༡༣ ལོར་ཁོ་མོས་ཨ་བྷོ་རི་ཇི་ནལ་གྱི་རིག་གཞུང་དང་ཨོ་སི་ཊོ་ལི་ཡའི་སྤྱི་ཚོགས་དབར་བར་ཐག་ཉེ་རུ་གཏོང་ཐབས་ཀྱི་མཱ་རེམ་རྒྱ་སེར་མེ་ཏོག་ཐེགས་རྩ་ Miriam Rose Foundation ཟེར་བའི་ཐེག་རྩ་ཞིག་བཙུགས་ཡོད་འདུག
ཌོ་ཊར་ Baumann ལགས་ཀྱིས་ཨོ་སི་ཊོ་ལི་ཡའི་མི་མང་ཚོས་ཨ་བྷོ་རི་ཇི་ནལ་གྱི་སྤྱི་ཚོགས་སྐོར་ཤེས་རྟོགས་ཡག་པོ་ཡོང་ཐབས་ཐད་འབད་བརྩོན་གནང་གི་ཡོད་འདུག
གཞན་ཡང་ཨོ་སི་ཊོ་ལི་ཡའི་ལྷོ་ཕྱོགས་མངའ་སྡེ་ནས་ཡིན་པའི་སྨན་དང་སྤྱི་ཚོགས་བཟོ་ལས་ཐོན་སྐྱེད་སྐོར་སློབ་སྦྱོང་གནང་བཞིན་པའི་སློབ་མ་བུ་མོ་ Sobel Marshall ལ་འདི་ལོར་ལོ་འདིའི་ཨོ་སི་ཊོ་ལི་ཡའི་ན་གཞོན་ཞེས་པའི་གཟེངས་རྟགས་དེ་ཐོབ་ཡོད་འདུག
བུ་མོ་ Marshall ལགས་ཀྱིས་ཁོ་མོ་ལོ་ན་ ༡༨ སྐབས་གཞན་དང་མཉམ་འབྲེལ་ཐོག་ནས་ TABOO ཞེས་པའི་འཕྲོད་བསྟེན་ཅ་དངོས་ཐོན་བསྐྱེད་གསར་འཛུགས་གནང་ཡོད་པ་དང་། དེས་འཛམ་བུ་གླིང་གི་བུད་མེད་རྣམས་ལ་གཙང་སྦྲ་འཕྲོད་བསྟེན་ཐད་ཕན་ཐོག་ཆེན་པོ་བྱུང་ཡོད་འདུག
ཡང་གཟེངས་རྟགགས་ཐོབ་མཁན་གཞན་ཞིག་ནི་ཨོ་སི་ཊོ་ལི་ཡའི་ནེའུ་སོ་ཐི་ཝལ་མངའ་སྡེའི་ནང་གནས་སྡོད་བྱས་ཡོད་པའི་ལོ་ན་ ༦༠ ཡིན་པའི་བུད་མེད་
Rosemary Kariuki ལགསཡིན་པ་དང་། ཁོ་མོ་ཕྱི་ལོ་ ༡༩༩༩ ལོར་ Kenya རྒྱལ་ཁབ་ནས་ཨོ་སི་ཊོ་ལི་ཡའི་ནང་བྲོས་བྱོལ་དུ་སླེབས་ཡོད་པ་དང་། ཁོ་མོས་ད་ལྟའི་ཆར་གཞིས་སྤོ་དུ་ཡོང་མཁན་དང་། ལྷག་པར་དུ་ཁོ་རང་གི་སྤྱི་ཚོགས་ནང་བཟའ་ཚང་གི་དཀའ་ངལ་དང་། སྐད་ཡིག་མི་ཤེས་མཁན་བུད་མེད་དཀའ་ངལ་འཕྲད་མཁན་རྣམས་ལ་རོགས་རམ་གནང་གི་ཡོད་འདུག
