ሰራዊት ሱዳን ናብ ግዝኣት ኢትዮጵያ ብዝተዋደደ መገዲ ይኣቱ ኣሎ ክብል ሚንስትሪ ጉዳይ ወፃኢ ኢትዮጵያ ገሊፁ፡፡
እዚ ፍፃመ ዘየዋፅእ ከም ዘይኮነ ብወገን ኢትዮጵያ ብተደጋጋሚ ክግለፅ ዝፀንሐ እዩ ዝበሉ ወሃቢ ቃል እቲ ሚንስትሪ ዝኾኑ ዲና ሙፍቲ ሱዳን ብካልእ ሳልሳይ ኣካል ትድፋእ ከም ዘላ ገሊፆም፡፡ እንተኾነ መንነት እቲ ሳልሳይ ኣካል ኣየልዓሉን፡፡ እቶም ወሃቢ ቃል ብዘሓለፈ እዋን ተመሳሳሊ ዘረባ (ሱዳን ብፀቕጢ ሳልሳይ ኣካል መሬት ኢትዮጵያ ትወርር ኣላ) ምስ በሉ ግብፂ ኣብ ካይሮ ንዝርከብ ኣማባሳደር ኢትዮጵያ ፀዊዓ ብዛዕባ መንነት እቲ ሳልሳይ ኣካል መብርሂ ክወሃባ ከም ዝሓተተትን ኢትዮጵያ ኣብ ጉዳይ ግብፂ ትፍፅሞ ንዓለምለኻዊ ሕጊ ዝጥሕስ ተግባር ጠጠው ክተብል ኣለዋ ከም ዝበለት ይዝከር፡፡ ኢትዮጵያ ብወገና ናይ ዝኾነት ሃገር ሽም ከም ዘየልዓለት ገሊፃ ነይራ፡፡
ሓደ ሚኢቲ ዓመት ዘሕለፈ ውጥጥ ብጉዳይ ዶብ ሱዳንን ኢትዮጵያን መፍትሒ ክግበረሉ ብ1972 ሰለስተ ኮሚቴ ተመስሪቶም ከም ዝነበሩ፣ ኣብ መዋሰንቲ ክልቲአን ሃገራት ዘለዉ መንበሪ ሰባት፣ ናይ ሕርሻ ቦታታትን ሰፈራታታትን ከፃርዩ ተሓሲቡ እኳ እንተነበረ ብዘለዎ ከም ዝተቐመጠ እቶም ወሃቢ ቃል ኣዘኻኺሮም፡፡
ሱዳን ብጉልባብ እቲ ኣብ ትግራይ ዝቕፅል ዘሎ ውግእ ነቲ መሬት ከም ዝሓዘቶ፣ ሰራዊታ ነበርቲ እናከላበተን ንብረት እናዕነወን ናብ ውሽጢ ኢትዮጵያ ብዝተዋደደ ይኣቱ ከም ዘሎ ተዛሪቦም፡፡ ኢትዮጵያ እቲ ወጥሪ ብሰላማዊ መገዲ ክፍታሕ ካብ ምድላይ ዝተበገሰ ብህድኣት ክትሪኦ ከም ዝፀንሐት ዝሓሩ ወሃቢ ቃል ዲና ሙፍቲ እዚ ከም ፍርሒ ክረአ ኣይግባእን እዩ ኢሎም፡፡
