ሓደ ካብ ቅድመ ኩነት ‘ህዝቢ ትግራይ መሰል ርእሰ ውሳነ ክሳብ ዘካይድ፤’ ሓይልታቶም ኣብ ክልላት ዓፋርን ኣምሓራን ዝሓዙዎ ቦታ ከም ዘይለቁ ጀ/ጻድቃን ገ/ትንሳኤ ተዛሪቡ።

ሓጸርቲ ጸብጻባት፥ ናብ ትግራይ ዘእትዉ መገድታት ክሳብ ዝኽፈቱ፣ ብመንግስቲ ትግራይ ዝተቐመጠ ቅድመኩነት ክሳብ ዝፍጸምን ህዝቢ ትግራይ መሰል ርእሰ ውሳነ ክሳብ ዘካይድን ፤ ሓይልታት ትግራይ ኣብ ክልላት ዓፋርን ኣምሓራን ዝሓዙዎ ቦታ ከም ዘይለቁ ጀነራል ጻድቃን ገብረትንሳኤ ተዛሪቡ። ኣሜሪካን ሱዳን ብሓንሳብ ኣብ ዘሳልጥኦም ውራያት ዕውት ዕዮ ከም ዘሳለጠት ሓላፊት ዓለምለኻዊ ተራድኦ ልምዓት ኣሜሪካ ሳማንታ ፓወር ገሊጻ። ሱዳን ንተጋሩ ስደተኛታት ተቐቢላ ንትብሮ ዘላ ምግያሽ ዘመስገነት እታ ሓላፊት ፤ ሰብኣዊ ረድኤት ብዘይገደብ ክኣቱ ጸቕጢ ንምግባር ምስ ሰብ መዚ መንግስቲ ኢትዮጵያ ክትራኸብ መደብ ከም ዘለዋ እውን ተገሊጹ ኣሎ። ሓዱሽ ሓላፊ ሰብኣዊ ረድኤት ውድብ ሕቡራት ሃገራት ማርቲን ግሪፊትስ ኣብ ትግራይ ዘሎ በሰላ ኩናት 9 ወርሒ ንምዕዛብ መቐለ ኣትዩ። ኣብ ሞንጎ ክልላት ዓፋርን ሶማሊን ዝተወለዐ ጎንጺ ናብ ጁቡቲ ከም ዝለሓመ ተሰሚዑ። ዝብሉ ሓጸርቲ ጸብጻባት ልኡኽና ክቐርብዩ።