کرکٹ کی کپتانی اور فٹ بال کی کوچنگ کا امتزاج لے کر چلنے والے ذیشان اسد سے ایک ملاقات۔
آسٹریلیا کی تارکین وطن کمیونٹی میں پاکستانی نژاد آبادی اٹھارہویں نمبر پر آتی ہے جو پاکستانی آسٹریلینز کو یہاں کی بیرون ملک پیدا ہونے والی آبادی کا 1.3 فیصد بناتی ہے۔ ذیشان اسد بھی پاکستان سے آسٹریلیا مائیگریٹ کر کے آئے اور سڈنی کو اپنا مستقل گھر بنا لیا۔ لیکن پاکستانی جہاں بھی جائیں انکے دل سے اپنے آبائی ملک اور کرکٹ کیلیے محبت کم نہیں ہوتی۔ ایسا ہی ذیشان کے ساتھ ہوا اور آسٹریلیا آ کر کرکٹ کیلیے انکی محبت کو ایک نئی امنگ مل گئی۔ انھوں نے تین سال قبل ایک کرکٹ کلب کا آغاز کیا جسکو وہ کامیابی کے ساتھ چلا رہے ہیں۔
لیکن ذیشان کا ٹیلنٹ صرف کرکٹ تک ہی محدود نہیں بلکہ وہ فٹ بال کوچ بھی ہیں اور بچوں کیلیے ایک فٹ بال اکیڈمی بھی چلا رہے ہیں۔ ان کی فٹ بال اکیڈمی نیو ساوتھ ویلز کے متعدد علاقوں میں مختلف ثقافتی پس منظر رکھنے والے بچوں کو پورا سال ٹریننگ دینے کے ساتھ ساتھ عالمی سطح پر نمائندگی کے مواقع بھی فراہم کرتی ہے۔
