پاکستان کی مویشی منڈیوں کی رونقیں عروج پر

عید قربان قریب آتے ہی مویشیوں کی خریداری کا سلسلہ تیز ہوگیا ہے ۔ شہر قائد کے باہر ناردرن بائی پاس اسکیم 45 کے قریب 1 ہزار ایکڑ رقبے پرمحیط عارضی مویشی منڈی قائم ہو گئی ہے جہاں ملک بھر سے بیوپاری مختلف نسلوں کےخوبصورت اور بھاری بھرکم جانور لے کر پہنچ گئے ہیں۔

اس عارضی مویشی منڈی میں اندورن سندھ اور بلوچستان سے ساڑھے چار ہزار سے زائد اونٹ بھی فروخت کیلیے پہنچا دیئے گئے ہیں۔ آیئے آپ کو بھی اس منڈی کی سیر کرواتے ہیں جہاں حدِ نگاہ تک خوبصورت اور بھاری جسامت والے جانور موجود ہیں۔

مویشی منڈی میں داخل ہوتے ہی سب سے پہلے اس منڈی کی پہچان بیلوں کا وی آئی پی بلاک ہے۔ جس میں ملک بھر سے لائے گئے بھاری بھر کم بیل خریداروں کے انتظار میں دکھائی دیتے ہیں۔ اس بلاک میں ساہیوال، آسٹریلوی اور سبی نسل کے قد آور بیلوں سمیت دیگر کئی نسلوں کے بیل موجود ہیں، ان بیلوں کی قیمت 4 لاکھ سے شروع ہو کر 60 لاکھ تک جاتی ہے۔

آگے بڑھیں تو منڈی میں جہاں سب سے زیادہ رش نظر آتا ہے وہ جنرل بلاکس کا ایریا ہے، جس میں نسبتا کم قیمت کے بیل موجود ہیں جن کی قیمت 1 لاکھ سے 4 لاکھ تک ہے تاہم اس بلاک میں موجود نہ تو بیوپاری خوش دکھائی دیتا نہ ہی جانور کی خریداری کیلیے شہر کے باہر اس منڈی کا رُخ کرنے والا خریدار، دونوں ہی مہنگائی کا رونا رو رہے ہیں۔

بیوہاریوں نے ایس بی ایس اردو سے گفتگو کرتے ہوئے بتایا کہ جانوروں کا چارہ مہنگا ہوگیا ہے، دوسرے شہروں سے جانوروں کی کراچی منتقلی کیلیے انتہائی مہنگے کرائے دیئے اور پھر منڈی میں ہر جانور کی علیحدہ علیحدہ انٹری فیس بھی ادا کی، اب ایسے میں جانور کم قیمت پر کیسے فروخت کر سکتے ہیں ؟

بیوپاریوں کے مطابق منڈی میں ہر چیز خریدنی پڑتی ہے، یہاں سہولیات کم اورفیسوں کی مد میں رقم زیادہ لی جاتی ہے جس کے باعث جانوروں کی قیمت بڑھانے پر مجبور ہیں۔

دوسری طرف خریداری کے لے آنے والے شہری کہتے ہیں منڈی میں اس بار جانوروں کی قیمتیں آسمان سے باتیں کر رہی ہے، بیوپاریوں نے قیمتوں میں خود ساختہ اضافہ کردیا ہے اگر قیمتیں برقرار رہیں تو قربانی کرنا مشکل ہوجائے گا، کچھ شہریوں نے شکوہ کیا کہ وزن کےحساب سے بھی جانور خریدیں تو انہتائی مہنگے داموں مل رہا ہے۔

جنرل بلاک سے ہی متصل بکرا منڈی بھی اپنے جوبن پر ہے جہاں کاموری، راجن پوری، کوڈو ، حیدرآبادی ٹانپرے نسل کے بکرے موجود ہیں۔ بکروں کی قیمت بھی ان کی نسل اور جسماعت کے لحاظ سے طے کی جاتی ہے تاہم منڈی میں 22 ہزار روپے سے لر کر 6 لاکھ روپے تک کا بکرا موجود ہے۔

بیل اور بکرا منڈی سے ایک کلومیٹر کے فاصلے پر اونٹ منڈی بھی لگائی گئی ہے اس بلاک میں تھری، لاڑی اور سندھی نسل کے ساڑھے چار ہزار سے زائد اونٹ فروخت کیلیے دستیاب ہیں ، اونٹوں کی جہاں تک قیمت کی بات ہے تو وہ 2 لاکھ سے شروع کر 15 لاکھ روپے تک جاتی ہے، اونٹ کی نسل اور اس کی جسامت بھی اس کی قیمت پر اثر انداز ہوتی ہے۔

عمر کوٹ سے تعلق رکھنے والے محمد یسین اپنے ساتھ 15 اونٹ کراچی کی مویشی منڈی میں لائے ہیں، یسین کے مطابق اونٹ کی قیمتوں میں ہر سال کی طرح اس سال بھی اضافہ دیکھنے میں آیا ہےتاہم یسین اب تک 3 اونٹ بیچنے میں کامیاب ہو گئے ہیں۔

مویشی منڈی کے ترجمان نوید بیگ کے مطابق 1 لاکھ سے زائد بیل، بکرے ، دنبے اور اونٹ مویشی منڈی لائے گئے ہیں ۔ بیورپاریوں کی سہولت کیلیے منڈی انتظامیہ نے 16 جنرل اور 4 وی آئی پی بلاکس قائم کیے ہیں، نوید بیگ کے مطابق شہر کے حالات کو مدنظر رکھتے ہوئے مویشی منڈی کی سیکورٹی کے فل پروف اقدامات کیے گئے ہیں اس کے ساتھ ساتھ شہریوں اور ملک بھر سے آئے بیوپاریوں کی سہولت کیلیے منڈی کےاندر ہی اے ٹی ایم مشینیں لگا دی گئیں ہیں۔

(رپورٹ: احسان خان)