Long plante ples lo Vanuatu i no isi tumas blo ko lem wetem ol kaen samting blo leftemap helt, kipim fres wota blo dring o rispon hariap lo ol saeklon o etkwek.
Naoia HELPR-1 i save mekem kaen wok ia lo evri samples raon lo kantri; lo Tanna, Erromango, Malekula, Makira o Santo. Oli lo sip i save yusum skil mo save blem blo helpem yumi evriwan wetem fulap samting. Naoia i kat sam lo sip we wok blem i lo saed blo spot tu.
Staf blo HELPR-1 stap karem ol samting blo helpem rimot komuniti Credit: HELPR-1
Stat blo HELPR-1
Sip ia i bin kamaot from taem blo rispons lo Covid-19 lo Vanuatu. Oli bin karem ol stik agensem bebet ia lo ol rimot aelan lo 2022.
Afta hemia, ol kavman ministri olsem edukesen, akrikalja, jastis mo yut mo spot i bin mekem akrimen wetem HELPR-1 blo karem ol sevis blem i ko lo 71 eria kaonsil lo sikis provins.
Lo 2023 volibol i bin feswan blo putum samting blo spot insaed lo HELPR-1 wetem Volley 4 Change (V4C) lo Malampa, Torba, Sanma mo Penama.
Naoia lo 2025, kriket i bin folem rod blo hem lo Sanma blong karem ol gudfala samting blo spot lo saed blo helt, nutrisen mo sosal koneksen.
Vanuatu Cricket i bin ko lo ol rimot ples lo Santo wetem HELPR-1 Credit: Jonas Piloe
Spot blong divelopmen lo Vanuatu
Naoia i kat fulap spot we i yusum ol tul blem blo traem mekem ol gudfala samting lo saed blo leftemap ful komuniti blo yumi. Patnesip ia wetem HELPR-1 mo Vanuatu Cricket hemi krowem janis blo kasem ol gol ia.
Dr Basil Leodoro i bin talem se wok blo HELPR-1 i isi blo joenem wetem wok blo ol krup blo spot: "Fisikal mufmen o spot hemi wan stampa tingting bihaen lo helt...mifala tu i save se spot hemi wan wei blo pulum pipol i kam tugeta. Hemi wan veri importan pat blo HELPR-1...lo taem we spot i tekem ples, helt mesej i save ko aot."
Pipol i bin kam tugeta lo taem we sip i stap lo wes kos Santo mo ol samting blo kriket i bin kamaot lo sanbij.
Jamal Vira i bin stap lo Vanuatu Cricket lo rank blo operesen maneja kasem yia ia, hemi bin eksplenem ol samting we spot i save helpem wetem wok blo HELPR-1: "Jenda beis vaelens prokram blo mifala, enkejem ol woman mo man wetem disabiliti...wan positiv mesaj we Vanuatu Cricket hemi save sharem tru long spot. Ol gol blo HELPR-1 mo Vanuatu Cricket tru lo helt mo mental helt...mifala save helpem blo krowem wan helti, sastenabol komuniti."
Fiuja blo olgeta
Vanuatu Cricket i redi blo mekem wan kaen wok ia bakagen wetem HELPR-1 lo Ogis blo yia ia. Oli kat sam gudfala risal lo saed blo bildim koneksen wetem ol lokal tim lo Ostrelia, Niusilan mo plei geim lo Spen tu, mo oli filim se ol grasrut prokram blo sarem spot wetem ol pikinini i save kam antap tu.
HELPR-1 i bin mekem wan niufala patnesip wetem tufala kavman blo Vanuatu mo Ostrelia lo saed blo pem ol wok blem kasem stat blo 2026, mo hemia i save pem blo oli ko lo evri provins lo kantri blo wan nara taem bakagen blong folem ol wok blo bifo o blo mekem niufala wok.
Fiuja blo tufala i lukse i stap lo wan stret rod; hemia wan gudfala samting blo yumi evriwan.
