"Festaem mi no rili lukluk lo jurnalism olsem wan patwei ia, be from taem we mi smol mi kat pasen blo toktok abaot ol samting we mi no hapi lem."
"Insaed lo komuniti…mi kroap insaed lo wan hom wetem plante brata. Yu mas traem blo mekem sua se vois blo yu [oli harem]."
Vois blong Lillyrose Welwel hemi wan we plante pipol oli save hem. Hemi bin fes blong storian long plante samting we ABC Pacific i bin ripot long hem: rapa blong Vanuatu, Mantis, we hemi bin winim Pacific Break; ICJ risal long klaimet jenj we Vanuatu i bin lidim mo storian long saed blong etkwek ripsons wetem moa nara stori tu. Mo bifo taem ia hemi bin wok long VBTC mo hemi bin presiden blong Media Association of Vanuatu (MAV).
Hemia wan rod blong wokman we hemi stap long wan top rank ia. Be wanem hemi stampa blong karia ia blem?
"Wan samting we hemi mekem mi wantem kam wan jurnalis…hemi blong mekem sua se i kat akaontabiliti, i kat transperansi lo olgeta disisen we ol man i stap mekem.
"Mo wan samting we i mekem mi mi rili wantem hem blo kivim vois lo ol voisles – ol man we oli no save kat janis blo tokaot abaotem ol samting we i stap fesem olgeta."
Rod blem ia i kat jalenj lem tu.
"Olsem yu mas andastandem tu se samtaem bae ol pipol oli agensem yu lo ol stori blo yu. Bae yu lukim olsem se bae blad presa i kilim yu nomo from, be yu mas kat stron tingting...from hemi blong benefitem ol pipol, yu kivim vois lo olgeta ia we oli nokat janis nating."
Lillyrose Welwel hemi wan woman blong wok long media wetem ABC. Credit: Lillyrose Welwel
"Ating truaot long karia blo mi mi kat plante stori we mi praod lem...
Wan bigfala stori i bin kam long las yia ia. Etkwek we i kasem 7.3 i bin kilim Efate long Disemba.
"Etkwek stori...mifala karem baklas blem, be wan samting we mi praod lem blo lukim se hemi wan samting we i benefit lo komuniti...
"Mifala kontinu blo ripot lo ol stori ia kasem taem we mifala mekem dokumentari ia...wan lo olgeta komon samting we taem we mi toktok wetem evri man, we olgeta lo komuniti hemi bildin kod.
"Mi klad se, [even though] mifala karem baklas lem, naoia oli kat ol konsaltesen...nekis etkwek we bae hemi kam, ol bildin we olgeta bildim i stap lo standad we bae hemi save helpem sefem laef blo ol pipol.
Tingting blong hem afta long etkwek ia i bin kam moa stron long saed blong stret fasin blong mekem wok insaed long media.
"Taem yumi kam blo stori, yumi stap wetem olgeta, yumi harem ol storian blo olgeta. Plante taem oli fraet blo voisem ol tingting blo olgeta, ol wari blo olgeta. Be taem se oli voisem hem, yumi klad blo lukim se i kat wan impak blem."
Nambawan advaed blem blong ko long ol yangfala? Kuriositi i mas stap long hat blong yu. Credit: Lillyrose Welwel
Sapos yu wantem wok long fulap difren kaen storian ia, yu nidim mekem sua se save blong yu i stap.
"Mi mi laekem ridim plante nao buk, mo artikal, riviu...ol opinion artikal.
"Wan samting we i helpem mi hemi mekem risej. Mi wantem save abaot wanem nao ol infomesen."
Be save nomo hemi no enaf blong mekem wok ia. Samtaem i kat ol samting we i kat janis blong stopem yu o mekem hadwok blong yu oltaem.
"Baria blo mi hemi hemia nao, hemi kaljural. Lukluk lo saed blo tradisen, be semak taem tu hemi link wetem tradisen. i nokat [fulap] ol woman oli sapotem yu lo karia blo yu.
"Hemi mekem se blo yu luk ap lo ol rol model we ol woman...i save helpem yu blo kro lo karia blo yu. Samtaem yu mekem samfala mistek, we sapos yu kat ol rol model ia olsem ating bae hemi gud."
Lillyrose hemi wan bisi woman stret, be hemi bin kat smol taem blong ansarem wan las samting ia, se hemi wanem sam samting we hemi tingse i gud blong lanem blong ol yangfala we i wantem kam insaed long wok ia.
"Advaes blo mi se nambawan samting we yu mas kat hemi kuriositi; yu wantem save samting. Yu wantem save samting from wanem?
"Yu mas askem kwesten...sapos yu yu no andastandem wanem yu stap raetem...yu no ekspektem se oli we i stap lisen lo yu oli andastandem.
"Yu mas andastandem festaem wanem yu stap raetem, wanem nao stori ia mo from wanem se hemi importan festaem bifo olgeta i save andastandem."
