“Taem we mi wan smol pikinini, intres blo mi i stat. Mi stap harem ol femas vois lo Radio Vanuatu, oli stap infomen ol pablik wetem storian."
Naoia wan vois we ol pikinini mo narafala i save hem hemi vois blo Moses Cakau Willie.
Wetem fulap eksperiens lo saed blo media wetem VBTC bifo mo naoia lo saed blo frilans mo ranem wan media kampani (Wan Nambanga Productions), hemi wan pat blo media we stret fasin blo wok blem hemi importan tumas lo tingting blem tu.
“Ating wan samting we i bin pulum intres blo mi hemi hao nao yumi save holem ol man lo akaon. Hemi veri importan.”
Moses i bin mekem fulap storian wetem komuniti blo yumi Credit: Moses Cakau Willie
Be wanem stamba blo kroem rod blem lo media?
“[Blong sharem ol] vois blo ol pipol lo rimot ples lo Vanuatu. Ol man we i no kat abiliti blo save mufmuf i ko lo wan ples...be yumi save ko aot, yumi save talem ol storian. Hemia hemi rison blong mi kam wan jernalis.”
Moses i bin stat wetem save blo yusum Photoshop nomo, be afta hemi leftemap save blem lo ol nara kaen samting we yumi nidim lo media: raetem gud ol storian, singaot stron wetem vois blem lo redio mo fulap nara samting. From hemia tu hemi bin kasem janis blo kam wan koresponden lo ABC mo nara media brodkas lo Pacific.
Evri kaen wok i kat smol jalenj i stap insaed lem blo mekem se i no isi tumas oltaem blo mekem ol gudfala samting. Jalenj we i stap i save mekem hat blo hem i kam moa stron.
“i kat sam jalenj insaed lo wok blo yumi we i jalenjem plante man. Yu tingse ‘Mi raetem wan stori nomo o mi tokabaot hemia nomo lo redio, be afta ol man oli kam blo rao lo mi’ hemia i wan pat blo jernalisim nomo.
"Taem we mi stap lo VBTC, yumi kat ol MP we oli kam insaed...blo kilim mifala, we mifala i bin stap lo taem blo eleksen ripot ia.
"Naoia we yumi kat ol loa blo yumi we hemi stron...yumi no sud fraet.”
Afta mi askem lem from wanem sam samting we hemi mekem se wok blem i stanap.
“Mi mi mekem plante riserj. Sapos we mi sutum wan dokiumentari, mi mas ko stadi festaem. Sapos mi no plan, bae mi stap lo wan bigfala problem.”
“Plante man i no save olbaot wanem we mi stap mekem...wetem wan fon nomo, semak samting blo profesonal kamera we i save mekem, wan fon i save mekem.”
Yumi kat plante kaen wok lo media, Moses i bin mekem storian wetem ol difren kaen tul lo ol difren ples Credit: Moses Cakau Willie
Mo wanem nambawan advaes blem?
“Taem we jusum blo kam insaed lo wok ia, yu mas putum ful hat blo yu i kam insaed lem fromse hemi wan ples we yu holem taet komuniti. From komuniti ia bae i kamaot wan nesen.
“Fes samting bifo yu putum pen lo pepa ia, yu mas harem wan stori festaem. Hat blo yu mas konektem wetem stori ia.”
Mitufala finisim stori ia wetem wan smol samting we i stap insaed lo hat blo wok blo Moses Cakau Willie oltaem:
"No fraet."
