Lo namba 26 Julae lo Brisbane mo namba 2 Ogis lo Melbourne, olgeta we i kat koneksen lo Vanuatu i bin mekem lafet blo Independens ia.
Mifala sharem smol tingting blo oli we i bin stap stori, kakae, danis mo singsing tugeta mo tingabout histri mo fiuja blo kalja blo Vanuatu lo Ostrelia mo wanem independens i minim se insaed lo hat blem.
"Hemi gud tumas ol pipol, ol fren, ol woka i kam tugeta blo selebretem...oli tingabaot taem we kantri blo yumi, Vanuatu, hemi i bin kat independens." James i bin talemaot, hemi bin stap lo Melbourne blo 13 yia finis mo hemi bin wok longtaem wetem olgeta lo saed blo karen blo asparagus lo Gippsland.
Mo lo lafet ia lo Melbourne i kat sam we i bin stap smol taem nomo, olsem Barbara. Tingting blem se:
"Hemi wan gudfala janis blo kam luk ol pipol we yu no bin ekspektem se oli stap lo Ostrelia, sam we yu neva save olgeta bifo...yu kam yu harem gud se bae yu save kam stap tugeta blo selebretem. Hemi wan gudfala taem mo wan gudfala prokram tu.
"Olsem Vanuatu we bae hemi save tekem klaimet jenj i ko kasem highest kort lo wol...[be] imprufmen nomo we mi mi tingse...hemi blo yumi luk moa woman oli mekem desisen lo parlamen
"Wan moa samting tu se i gud blo ol pipol oli luksave had wok blo ol olfala we i bin wok from independens, traem blo holem taet sam blo ol valiu ia."
Joses Kenneth (Raet saed) i lida blo VVC (Vanuatu Victorian Community) Credit: Joses Kenneth/VVC
Wan we i save makem fulap wok blo mekem lafet i kam gud hemi presiden blo Victorian Vanuatu Community (VVC), Joses Kenneth. Hem tu i bin sharem smol taem blo storian afta stat blo ol kakae mo singsing ia:
"Tingting mo fasin blo kalja mo komuniti mi tingse i importen tumas blo ol man oli save...plante pikinini oli bon lo plesia...i importen blo oli save kalja, oli save komuniti mo oli save ol aidentiti olsem lanwis mo ol samting olsem."
Mo mi askem lem - wanem sam samting we hemi helpem olgeta blo kam stron insaed lo kalja blo Vanuatu?
"Ating fasin we yumi mit olsem hemia, yumi toktok Bislama.
"Mi toktok Bislama lo haos wetem waef blo mi, evriwan oli save Bislama mo eniwan we i kam lo haos oli pikimap Bislama tu."
"Ostrelia hemi wan kantri blo diversiti, mi mi bilif stron blo i kat strength lo diversiti...yu kam lo plesia yu respektem ol fasin ol rul moa loa blo Ostrelia be i no minim se yu no save selebretem aidentiti blo yu mo kalja blo yu. Mi mi faenem lo plesia i isi blo yumi kipim aidentiti ia."
Plante yangfala blo Vanuatu lo Brisbane i bin stap tu lo lafet ia Credit: Leah Lowonbu
Lo Brisbane tu i kat fulap pipol i stap, ol PALM woka, olgeta blo South Sea Islander komuniti mo sam oli stadi. Wan we i stap stadi hemi Leah Lowonbu.
"Hemi gud blo mifala stap selebret, be hemi gud tu blo wok lo reflek lo saed blo developmen blo kantri mo ol sisonal woka.
Leah i bin talem se smol lafet ia lo Brisbane i bin mekem se hemi klad tumas.
"i gud blo yumi kat olgeta kaen komuniti aktiviti olsem hemia.
"Vanuatu tugeta yumi stanap."
