Ol vois blong olgeta sapota blong Vanuatu United FC i stron tumas.
Sapos yumi blong Vanuatu i stap farawe nomo, futbol i stap long hat oltaem.
Wan blong olgeta we i bin stap wajem kem ia hemi Kaltamat Kalontano (nara nem blong hem hemi 'Karl"). Wetem gel blem Phelima, tufala i bin jat wetem mifala long saed blong kem mo tim ia mo long saed blong wanem i minim se blong olgeta we i stap long Ostrelia nao.
"Mifala i hapi tumas lo Pro League ia...wan klab blo yumi we hemi Vanuatu Chiefs. Mi wan fan lo futbol from mi tu mi bin plei futbol."
"Tete mi sud wok be mi talem lo bos blo mi se 'mi dei of'; evri kem blo Vanuatu [United] bae mi mas dei of, from mi mi fan blo futbol mo mi laekem futbol."
"Futbol ia...hemi no save hapen lo Vanuatu be i save hapen lo wan ples we man Vanuatu tu oli stap lem olsem Melben."
Long haftaem Vanuatu United i bin lidim Solomon Kings 1-0, be kem i bin taet nomo. Long ol sapota ia mi bin mitim Fenedy Masauvakalo, wan gudfala straeka blong Amicale long bifo mo eks kapten blong nasonel tim blong Vanuatu... hemi bin kaenhat enaf blong sharem tingting blong hem.
"Kem bitwin lo Vanuatu mo Solomons hemi taf, tufala tugeta oli plei sem futbol nomo.
"Tim we hemi smat, bae i win. Lo seken haf mi wantem luk ol boe pus ap blo ten minit blo skorem wan moa gol nomo."
Afta long haftaem ia, Vanuatu United i bin folem advaes ia stret. Olgeta tugeta sikis gol i bin ko insaed long gol blong Solomon Kings, be foa blong ol gol ia oli bin sakemaot from ofsaed. Long taem blong faenol wesil sko i 2-0 mo selebresen bitwin long ol pleya mo fan i jas swit tumas.
Kapten Michel Coulon i bin lidim olgeta long kraon mo afta hemi bin klad tumas blong toktok wetem mifala long saed blong risal, sapot mo impak blong OFC Pro League finis.
"Mi hapi tumas lo pefomans blo ol boe, we lo plesia mifala i karem tri paen.
"Mi save se Solomon Kings...tim ia hemi wan blo ol [strongest] tim insaed lo lig."
"i wan bigfala [privilege] olsem we yu bin talem...no Vanuatu United nomo be nasonel tim i pusum plante olsem se yumi kat eksperiens long level olsem ia."
Fowod Azariah Soromon tu i bin sharem tinting blem.
"Ating tim hemi stat sloslo, lo tonamen i kam be ating [long raon ia] ol boe oli pikap lo ol mistek, mifala i bin wok lem...yu save luk risal lo las kem mo kem ia mifala keinem risal we mifala i wantem."
"Tankyu lo ol sapota...yu save luk sam oli skipim wok, oli tekem dei off blo wajem mifala. Hemi twelef man blo mifala."
Mifala i bin askem Azariah se sapos Vanuatu i save holem sam kem long fiuja olsem 2027 o afta long Freswota o Korman, wanem tingting blong hem long saed blong wanem bae i save minim se blong kantri ia.
"Mifala i kam, mifala i tingse bae i kolkol, be mifala i faenem se mifala i save ajas lem...ating bae lo fiuja mi wis se ol bod bae oli tekem sam kem i ko lo Vanuatu blo mifala plei mo [karem] moa sapot bak lo hom."
Hemi naes tumas blong harem ol toktok blong tim ia, be kem ia i blong yumi evriwan, spesali blong ol fan. From hemia nomo, bae mifala sarem laswan tingting blong Karl we hemi bin talem long mifala:
"Ko Vanuatu, ko!"
Folem SBS Bislama long Facebook
