【職‧夢‧人】藍帶廚師墨爾本學藝過嚮往的生活模式

甫一見面，對Cloudy的印象是貨真價實，樣子跟其在經營的飲食頻道形象沒有偏差，無濾鏡，聲音並無經過特別處理；至於和他同場共演的愛犬喪B則沒有同行，未能確認，早該通知他SBS辦公室是人狗共存的和諧之地。

Cloudy與喪B。 Credit: Cloudy & Song B (AKA Zombie)

「如果冇回流返嚟墨爾本，你會唔會成為一位藍帶廚師呢？」

「我諗就唔會喇！」

當年到墨爾本留學，Cloudy梁詠曦以為「冇啖好食」。

「我有一個印象，就係覺得呢度嘅飲食文化同英國係相似，即係可能都係食啲炸魚薯條呀，然後可能食啲好頹嘅中餐啦之類…」

他說墨爾本原來有好多不同國家菜式可供選擇，大部分都做得好正宗。

「例如韓國菜、泰國菜、意大利菜等，全部都做得好正宗！後來先至發現，原來墨爾本其實係一個文化大熔爐，我諗成個澳洲都係咁，但係墨爾本呢樣嘢就特別強。」

以越南河為例，他說最初並不相信食家蔡瀾的推介，但親身品嚐過，發現果然高質。

在廚房工作雖然忙碌，但當看到製成品時，以及客人吃得開懷，Cloudy 也會非常滿足。 Credit: Cloudy

雖然家人支持學費和生活費，但要同朋友社交娛樂，則需要打工賺錢，於是選了興趣作為工作，就是入廚房，一份人人都認為辛苦，而他卻享受開OT (超時工作)的飲食業。

「做廚房我知道係辛苦嘅，但係無所謂 … 一定會有好多唔同損傷，係辛苦嘅，但係其實係幾好玩，尤其是同一班喺嗰度識嘅廚師一齊去工作。」

畢業之後返香港工作，為了回報父母供書教學，選擇讀本科的職業，並開始廣告工作。

當時亦是社交平台開始流行，他因工作接觸到不同的社交媒體，創建了自己首個平台BigBoyRecipe， 由2015開始於Instagram 上定期分享食譜，並且烹飪心得。

「其實我係由一個廣告行業轉咗去做一個廚師嘅行業，所以當年在飲食業打工嘅經驗，同埋嗰個經歷，我覺得對我嚟講係有幾大幫助。」

不過遇上了瓶頸，為求新突破，Cloudy找新的方向想讀藍帶進發，這亦是他年少夢想，奈何碰上疫情，直到2023年開關，選擇回流墨爾本，才得以入讀藍帶國際廚藝學院（Le Cordon Bleu）。

Cloudy 獲藍帶頒發 Excellence in Culinary Arts 獎項並獲得 3000澳元獎學金。 Credit: Cloudy

回流墨爾本的契機

他對墨爾本熟悉，認為飲食條件非常好。

「我幾鍾意呢一度cafe嘅文化、pastry嘅文化亦都係好強，還有一啲高端嘅餐飲，我覺得喺呢度都係做得非常之有聲有色。」

還有餐飲業的水平和競爭力，他認為墨爾本都是非常之高，雖然阿德雷德都有課程，他還是選擇墨爾本，他曾經生活過的城市。

大家對藍帶廚藝學院都充滿好奇，他解釋，簡單來說其實是傳授商業廚房運作的理論和實踐，學習法國菜，到進階課程再學習管理、廚房的衛生條件等，學院提供一系例的課程選擇，完成整個課程由24至27個月不等。

在餐廳工作最難忘的經歷，是當知道 Matt Damon 也吃過我煮的菜式時，讓我興奮不已。 Credit: Cloudy

職夢之旅

Cloudy 說所經營的頻道初時反應冷淡，可能巳有不少煮食節目，不是太大吸引力，透過摸索，找到香港人做法國菜的亮點，憑著自己的所見所聞，藍帶學院背景，分享高階專業煮食的方向，如法國菜及墨爾本生活，終於找到屬於自己的風格發展。

平常多以法式料理為基礎，創作出「法式油封豬腩」。 Credit: Cloudy

「法式千層薯塊」在網上得到了不少的關注及讚賞，是BigBoyRecipe 最高人氣影片。 Credit: Cloudy

過嚮往的生活模式

完成整個藍帶課程畢業，不是開餐廳就是做大廚，不過Cloudy選擇經營社交平台。

「經營 YouTube 頻道對我嚟講，唔單止係一個分享平台，更係一個實現夢想嘅起點。我嘅目標唔係單純為咗賺錢，而係想將我嘅烹飪知識同熱情同大家分享，同時透過頻道累積人氣同認同感。」

於是他做自己喜歡的事情，過嚮往的生活模式。

一個星期打工兩、三日工做casual 工作，其他時間經營頻道，主力做YouTube，打工為副業，還有當然會研發食譜。

「這種模式的生活絕對係幾理想。」

來墨爾本可以自主過所嚮往的生活，不然就未能做到現在的經營方式。

「香港係比較難嘅，曾經有全職做過頻道，但收入不穩定，在墨爾本就可以打幾日工維持。」

Cloudy 無攜同喪B。 Credit: Ida Cheung

可有其他夢想，唔係飲食都得

他還是講飲講食。

「我都係想做番飲食嘅嘢。」

「長遠嚟講，我希望可以創立自己嘅私房菜品牌，甚至推出自家嘅食物品牌，例如醬料、調味料或者其他特色食品。我相信，透過 YouTube 建立嘅觀眾基礎同口碑，將來可以為我嘅品牌帶來即時嘅號召力同市場支持，幫我實現呢個『職夢』。」

訪問中，他說即使以前做廣告，兜兜轉轉，還是做與飲食平台有關的，因為喜歡飲食這個方向。

「我有諗過將來從事私人廚師（Private Chef）嘅事業，例如到訪客戶家中，為佢哋度身訂做高質素嘅餐飲體驗。」

他曾在香港當過私人廚師，前往3000呎的淺水灣大宅，可是香港有幾多這類大宅給他工作機會？

相比香港，澳洲的私人廚師行業更為成熟，原因與澳洲住宅的廚房空間較大，廚房設備亦更完善，更適合舉辦私人餐飲活動。

他相信墨爾本的環境和資源，為其飲食事業提供了無限的可能，所以選擇了在這裡追逐他的「職夢」！

有關Cloudy 如何開展在墨爾本推廣美食，和分享菜式的逐夢之旅，請聽今集【職‧夢‧人】。

經營 YouTube 頻道對Cloudy 來說，不單是一個分享平台，還是一個實現夢想的起點。 Credit: Ida Cheung

瀏覽更多最新時事資訊，請登上 SBS 廣東話 Facebook 專頁、X 專頁、Instagram 專頁，或訂閱 Telegram 頻道。

SBS 中文堅守《SBS 行為守則》及《SBS 編採指引》，以繁體中文及簡體中文提供公平、公正、準確的新聞報道及時事資訊。SBS 廣東話及 SBS 普通話均已為大眾服務超過 40 年。歡迎在每天早上 9 至 11 時透過 SBS Radio 1 收聽廣東話節目及在每天早上 7 至 9 時收聽普通話節目，或透過 SBS Audio App 手機應用程式收聽直播、節目重溫及其他語音內容。按此進一步了解 SBS 中文。