近期，香港ViuTV真人騷節目《公司冇逼我跑馬拉松》中，大家或許第一次認識蔡寶欣（Pony Choi）』— 這個笑容燦爛、總帶點古靈精怪的香港藝人。誰會想到，當初只是為了拍攝節目「陪跑」的她，如今竟然成為世界七大馬拉松其中一站—雪梨馬拉松的參賽跑手。
節目改變命運：從零開始愛上長跑
Pony憶述她第一場比賽「香港渣馬10公里」時笑言：「之前從來冇跑過5K以上嘅比賽，拍節目前都唔算鍾意跑步，覺得悶同辛苦。不過拍咗八個月training之後，我真係鍾意咗跑步，仲學識咗堅持。」
她坦言，過去做事容易「三分鐘熱度」，但長跑令佢學識耐性：「有時一個tempo run要喺運動場兜五十個圈，真係好消磨意志。但正因為咁，我先學識咗咩叫『唔放棄』。」
節目結束後，她繼續跑下去，從台北馬、名古屋馬，到紐約馬，每一次踏上賽道，都像是與自己對話的旅程。
Pony形容雪梨馬拉松的路段多斜路，是眾多馬拉松中最吃力的一個。 Credit: 蔡寶欣 PonyChoi Instagram
參與首屆「雪梨馬」：風景最美、賽道亦是最難
今年，她更飛到澳洲參加首屆雪梨馬拉松，亦是她人生第四場全馬。對Pony而言，這不僅是一場比賽，更是一個重要里程碑，因為雪梨今年首次被納入世界七大馬之一。
「我未跑過其他七大馬，但雪梨嘅風景真係世界第一！」她笑著回憶。「一上雪梨橋嗰刻，我已經覺得『嘩！好正！』藍天、海灣、歌劇院……沿途啲觀眾好熱情，成個氣氛好震撼。」
但風景背後，也有挑戰。
「雪梨條路真係唔易，斜路好多，幾乎行幾步就上落坡。跑到後段真係痛苦，但每上一次斜，就提醒自己，有上就有落。」
在汗水裏學會堅持
為了備戰雪梨馬，Pony在香港夏天的酷熱中訓練：「30幾度底下跑三個幾鐘，真係地獄式訓練。幾次想放棄，但最後選擇繼續。」而當她衝過雪梨歌劇院終點的一刻，心裏只得一句：「好犀利啊，自己真係做到了！」
她笑言，原本冇打算挑戰時間，但最後成績比預期好。「原來堅持同努力，真係唔會白費。」
從演藝圈到跑道找到另一個自己
作為藝人，她的生活節奏忙碌，但她學懂了「時間係擠出嚟嘅」這道理。「拍完戲七、八點收工，第二朝六點起身跑，真係攰，但想做到，就一定得。」
她坦言，自己唔係最快，但勝在不斷報名、不斷挑戰。「我唔係最勁嗰個，但我會keep住跑，keep住探索新比賽。呢份堅持，係我最大嘅優勢。」
Pony完成雪梨馬後仍在回味這個旅程，她更盛讚雪梨馬獎牌是最有特色。 Credit: 蔡寶欣 PonyChoi Instagram
下一站：台北 冀再創個人紀錄
雪梨馬結束後，她已經鎖定下一個目標，就是12月的台北馬。「嗰度係我初馬嘅地方，想返去PB（刷新個人最佳時間）。希望喺同一條路上，跑出更好嘅自己。」
「無論你跑唔跑馬拉松，其實人生都有好多時候想放棄。」Pony說。「但當你回頭望，你已經努力咗咁多。再堅持多一次，就可能成功。」
從《公司冇逼我跑馬拉松》到踏上世界每條跑道，Pony一步一步跑出屬於自己的節奏，每一場比賽，不止是對腳力的考驗，更是對信念的磨鍊。
在雪梨的藍天下，她用笑容和汗水，完全表達了最真實的「Real Run」。
收聽完整播客系列
人物誌
瀏覽更多最新時事資訊，請登上 SBS 廣東話 Facebook 專頁、X 專頁、Instagram 專頁，或訂閱 Telegram 頻道。
SBS 中文堅守《SBS 行為守則》等政策，以繁體中文及簡體中文提供公平、公正、準確的新聞報道及時事資訊。SBS 廣東話及 SBS 普通話均已為大眾服務超過 40 年。歡迎在每天早上 9 至 11 時透過 SBS Radio 1 收聽廣東話節目及在每天早上 7 至 9 時收聽普通話節目，或透過 SBS Audio App 手機應用程式收聽直播、節目重溫及其他語音內容。按此進一步了解 SBS 中文。
