Ntsiab lus:
- Muaj ib tsab ntawv cej luam tshiab qhia tias tej neeg them tsev tag lawm yuav muaj yiaj super txaus siv thaum txog hnoob nyoog 67 xyoo uasso tsis ua hauj lwm.
- Muaj ib tug kws paub zoo txog tej nyiaj superannuation hais tias muaj ib pab neeg Australia yeej muaj nyiaj super txaus ua tau lub neej yam tsis txob txhawj thaum so tsis ua hauj lwm lawm tab sis kuj muaj lwm pab neeg uas ntshe tseem yuav ntsib lwm yam teeb meem nyuaj tshaj qub ntxiv.
Raws li tau muaj ib tsab ntawv cej luamt shiab qhia ces tau nce cov nyiaj superannuation ntau tuaj ntxiv rau ib tug neeg Australia twg kom thiaj tau txaus siv rau lub caij so tsis ua hauj lwm lawm rau lub caij uas tseem muaj tej teeb meem nuj nqes siv ua lub neej tsub nias zejtsoom sawv daws.
Tib tug neeg uas them tsev tag hnoob nyoog 67 xyoo yuav tsum npaj kom tau nyiaj txog $595,000 siv rau lub caij so tsis ua hauj lwm lawm mas thiaj muaj peev xwm ua tau lub neej xws teb xws chaw, tab sis tam sim no ces yuav tsum muaj nyiaj txog $630,000 mas thiaj ua tau lub neej yam tsis nco txob txhawj dab tsi, raws li lub koom haum Association of Superannuation Funds of Australia (ASFA) tsab ntawv cej luam tshiab uas tau coj los qhia rau hnub zwj Quag (Tuesday) dhau los tau qhia.
Hos yog ib nkawm niam txiv uas them tsev tag lawm ces yuav tsum npaj kom tau nyiaj ntau ntxiv ntawm $690,000 ua $730,000 mas thiaj muaj peev xwm ua tau lub neej rau lub caij so tsis ua hauj lwm lawm.
Mary Delahunty uas yog tus coj lub koom haum ASFA tau hais tias tos ho tau teev tej nyiaj tshiab no los vim tias tej nqe siv ua lub neej tau kim tuaj ntxiv, thiab tej nyiaj laus (age pension) los kuj tsis xaus siv coj them rau tej nqe siv ua lub neej lawm thiab.
Delahunty tau hais tias "Yeej tau tej nyiaj laus tsis txaus rau tej neeg so tsis ua hauj lwm siv coj los them tej nqe ntau yam li hais tsi ntsees rau siv yuav tej khoom los yog siv tej services ntau yam,"
"Tej nqe khoom ntau yam uas tej neeg so tsis ua hauj lwm siv ntau tshaj plaws los kuj tau nce kim sai tshaj tej nyiaj poob nqe lawm thiab. Txhais tias muag tej nyiaj laus xam raws tej nyiaj poob nqe ces yuav yog ib co chaw leg ntau tshaj qub ntxiv raut tej neeg no tej nyiaj super uas khawv cia siav ntawd."
Raws li lub koom haum Australian Bureau of Statistics (ABS) tej kab theem nyiaj poob nqe uas nws tau qhia ces yeej tau nce ntawm 3.4 feem pua tsaib no lub 11 hlis ntuj los ua 3.8 feem pua tam sim no lawm.
ABS tau txheeb tias tej vaj tse, zaub mov, tej dej haus uas tsis yog dej cawv, tej nqe siv ua kev lom zem thiab tej kab lis kev cai yog tej uas ua rau nyiaj poob nqe ib xyoos twg.
Delahunty los kuj tau teev txog tej kab theem paj uas tau nce tsis ntev los no thiab uas raug coj los siv kwv yees tias tej neeg khwv tau nyiaj npaum li cas los ntawm lawv tej peev txheej nyiaj rau tej neeg muaj cai tau nyiaj laus (age pension) uas tau ua rau rov qab kho dua tej nyiaj super tias tsim nyog muaj ntau npaum li cas siv rau lub caij so tsis ua hauj lwm.
Nws tau hais tias "Yog tham txog tus kab theem paj uas tau nce siab tuaj ntxiv no ces, cov kev txheeb ib tug neeg twg tej nyiaj uas khwv tau ntau tuaj ntxiv txawm khwv tau los ntawm cov kev nqes peev lagluam los zoo li yeej khwv tsis tau dab tsi ntau li, vim rau qhov yuav ua rau lawv tau nyiaj laus (age pension) tsawg lawm. Tej no thiaj ua rau muaj kev pauv hloov ntau dua rau tej neeg so tsis ua hauj lwm tej nyiaj siv li yuav tau tos siv lawv tej nyiaj superannuation xwb tsis yog yuav tos nyiaj pab ntawm Centrelink."
Yus yuav paub tias li cas tias yus muaj nyiaj txaus siv kom ua tau lub neej xws teb xws chaw thaum so tsis ua hauj lwm lawm?
Koj yuav tsum muaj nyiaj superannuation txog li $630,000 mas thaum koj muaj hnoob nyoog 65 xyoo xwb kom yuav tsum muaj nyiaj super txog li $571,000 uas yog yuav tsum khwv kom tau nyiaj hauj lwm ib xyoos twg txog $65,000 ua ntej tsis tau them se mas thiaj yuav kov yeej tej xwm txheej nyiaj poob nqe.
Tsis tas li ntawd los yog ib tug twg muaj hnoob nyoog 30 xyoo ces yuav tsum muaj nyiaj super txog $66,000, yog muaj 40 xyoo ces tsim nyog muaj nyiaj super txog $168,000 thiab yog muaj 50 xyoo ces tsim nyog muaj txog li $296,000.
Txawm tau muaj cov kev pauv hloov rau tej nyiaj super no lawm los, James Koval uas yog tus coj tswj tej ASFA's policy thiab advocacy tau qhia rau SBS News tias tej neeg Australia yeej tseem muaj nyiaj super ntau tshaj qub ntxiv lawm thiab.
Nws tau hais tias "Tej no thiaj yog qee yam kev pauv hloov tseem ceeb ntawm tej nyiaj super uas tau tshwm sim rau ntau xyoo tsis ntev los no,"
"Tej nyiaj super uas tej neeg tsim nyog tau yam tsawg kawg nkaus tam sim no twb tau txog 12 feem pua lawm, thiab tej zaum tej neeg los kuj yuav tau nyiaj super rau ib co xwm txheej uas lawv tsis tau yav tag los thiab piv txwv li yuav tau thaum siv cov parental leave uas so yug/tu me nyuam tshiab.
"Tej no thiaj yog ib cov kev pauv hloov zoo heev uas pab kom tej neeg tau nyiaj super ntau tuaj ntxiv thaum lawv so tsis ua hauj lwm lawm."
Koval tau hais tias tej nyiaj khwv tau los ntawm cov nyiaj superanuaton kuj yog ib co khwv tau ntau rau ntau xyoo tsis ntev los no ces thiaj ua rau tej neeg muaj nyiaj super ntau tuaj ntxiv thiab.
"Txhais tau tias ib tug twg uas muaj hnoob nyoog 30 xyoo tam sim no uas muaj nyiaj super $30,000 yuav muaj peev xwm txuag/khws tau nyiaj super txog $645,000 txaus siv thaum lawv so tsis ua hauj lwm, thiab tseem yog tej nyiaj ntau tshaj qhov yus xav tau kom thiaj pab yus ua tau lub neej xws teb xws chaw rau lub caij yus so tsis ua hauj lwm."
Australia tej laus neeg yog cov yuav tsis muaj nyiaj txaus siv ntau tshaj plaws
Txawm tias "yog tej yam zoo" rau Australia tej hluas vim lawv yuav tau nyiaj superannuation ntau tuaj ntxiv rau yav pem suab thaum lawv so tsis ua hauj lwm lawm, los Koval tau hais tias Australia tej laus neeg yog cov yuav ntsib teeb meem tsis zoo yog thaum tau teev dua tej nyiaj tshiab tias tsim nyog muaj npaum li cas thiaj muaj peev xwm ua tau lub neej yam tsis nco txob txhawj thaum so tsis ua hauj lwm lawm.
Nws tau hais tias "Tej neeg Australia uas tab tom so tsis ua hauj lwm tam sim no coob heev ntawd ces lawv tej nyiaj super (superannuation) yog ib feem tseem ceeb heev rau lawv cov kev so tsis ua hauj lwm, tab sis ua ke no los tej nyiaj laus (age pension) kuj yog ib co tseem ceeb rau tej neeg coob heev thiab."
Nws tau hais tias nom tswv los kuj tau kho tej nyiaj laus tshiab ob zaug txij xyoo 2020 thaum tau pib muaj kab mob COVID-19 kis thoob ntuj thiab, txhais tias tej neeg uas nyuam qhuav so tsis ua hauj lwm tsis ntev los no ntshe yuav ntsib teeb meem ntau dua rau tej nqe siv ua lub neej rau lawv tej nyiaj superannuation.
Nws thiaj tau txhawb nqa kom tej neeg Australia uas twb ze ze rau lub caij yuav so tsis ua hauj lwm lawm yuav tau kub siab txog lawv tej superannuation account, txheeb tej kev nqes peev thiab ua tib zoo xyuas kom tau tej nyiaj super uas tej tswv lagluam them rau yus ntawd.
Mloog tau xov xwm tshiab ntawm SBS Hmong, download SBS Adio app thiab caum SBS Hmong Facebook page.
