Ntsiab lus:
- Raws li Super Members Council tau muaj ib co kev teeb txheeb tsis ntev los no ces lub koom haum no txhawj xeeb heev txog neeg Australia tej nyiaj superannuation.
- 26 feem pua ntawm tej neeg Australia yeej tsis muaj peev xwm qhia tau lawv lub tuam txhab super fund, thiab tseem muaj tej hluas coob txog 28 feem pua hnoob nyoog txij 18 txog 34 yog cov zoo li no thiab.
Koj lub tuam txhab superannuation yog lub tuam txhab dab tsi?
Yeej muaj tej neeg Australia 1 tug ntawm 4 tug twg tsis muaj peev xwm teb tau nqe lus nug no, ces thiaj muaj kev txhawj xeeb txog cov kev tsis kub siab txog lawv tej nyiaj npaj tseg kom tau siv rau lub caij so tsis ua hauj lwm.
Raws li tau muaj ib co kev teeb txheeb tshiab qhia ces muaj 26 feem pua ntawm ib co neeg Australia yeej tsis muaj peev xwm yuav qhia tau tias lawv lub tuam txhab super fund npe hu li cas li, thiab yog tseem hais txog tej neeg Australia hluas hnoob nyoog 18 txog 34 xyoos thiab ces tseem muaj txog 28 feem puas uas tsis muaj peev xwm qhia tau lawv tej tuam txhab super funds tej npe thiab.
Hos tej neeg uas paub npe, ces tsuas muaj txog li 1 feem 3 ntawm tej neeg no thiaj mus txheeb xyuas lawv tej nyiaj super qee zaus los yog tsuas txheeb ib xyoos ib zaug xwb.
Lub koom haum Super Members Council thiaj ceeb toom tias yuav ua rau tej neeg tau nyiaj tsawg siv thaum lawv so tsis ua hauj lwm lawm.
Misha Schubert uas yog tus coj lub koom haum no hais tias: "Yog koj tsis nquag mus txheeb koj tej nyiaj super tas mus li thiab tsis kub siab txog, ces tej zaum yuav ua rau koj poob nyiaj ntau txheeb los sis poob ntau caum txheeb dollars thaum koj so tsis ua hauj lwm lawm."
Ces thiaj yuav ua rau tej neeg ua hauj lwm tsis tau txais txiaj ntsim los ntawm cov kev khwv tau nyiaj ntau tuaj ntxiv rau cov kev coj tej nyiaj no mus nqe peev yog tias lawv tsis txheeb tias seb tej tswv lagluam puas them tej nyiaj no rau lawv, vim rau qhov yog ib cov teeb meem cuam tshuam txog 3.3 million tus neeg uas raug nyiaj ib xyoos twg txog $6 billion diam.
Tej neeg uas tsis muab lawv ntau cov super funds sib sau ua ib phau yuav tau them tej nqe ntau yam.
Raws li lub koom haum no tej qauv qhia ces yuav ua rau tau them nqe 0.1 feem pua ntau dua uas yuav ua rau lawv tau nyiaj tsawg dua txog $14,000 los yog tias ib tug twg tau them tej nqe no kim txog 1 feem pua ces yuav poob nyiaj txog $128,000 thaum so tsis ua hauj lwm lawm.
Schubert tau hasi tias "Yeej muaj tej hluas coob heev xav tias ntseem ntev heev mam li tau so tsis ua hauj lwm lawm, thiab lawv los kuj ua lawv lub neej fab fo tsis khoom los xav txog lawv tej nyiaj super li."
Tej hluas yog cov uas yuav kub siab txog 6 npaug uas los ua ib yam dab tsi coj los pab kom lawv txuag tau nyiaj siv rau thaum so tsis ua hauj lwm lawm yog tias lawv totaub zoo txog lawv tej nyiaj super.
Schubert tau hais tias "Yog koj kub siab npaum li cas txog koj tej nyiaj super, ces koj yuav siv cov kev txiav txim sib zoo raws li cov theem ua koj lub neej los pab kom koj txuag tau nyiaj txaus siv ruaj thaum koj so tsis ua hauj lwm lawm."
Ces thiaj tsim nyog tej neeg ua hauj lwm sawv daws ua tib zoo xyuas kom lawv tej tswv lagluam them tag nrho tej nyiaj super rau lawv, muag tag nrho ntau phau nyiaj super fund sib sau ua ib phau ua ke, thiab ua zoo xyuas kom cov super funds yog cov khwv tau nyiaj zoo tshaj plaws thiab txiav txim seb puas yuav tso nyiaj ntxiv rau tej nyiaj super kom tau nyiaj ntau tuaj ntxiv.
Mloog tau xov xwm tshiab ntawm SBS Hmong, download SBS Adio app thiab caum SBS Hmong Facebook page.
