Tau muaj ib co kev teeb txheeb nrog neeg Australia hauv online ntau tshaj 10,000 tus tau txheeb tau tiasmuaj yuav laug txog ib nrab ntawm tej neeg no raug neeg phem tsim cov xwm txheej cybercrimes rau lawv suav cov kev raug ntxias dag, raug nyiag lawv tej xov xwm thiab raug neeg phem nyiag lawv tej nyiaj.
Tsab ntawv cej luam ntawm lub koom haum Australian Institute of Criminology tau txheeb tau tias muaj tej neeg no ntau tshaj ib tug ntawm tsib tug twg (22 feem pua) ces raug neeg phem nyiag siv lawv tej cim thawj (identity theft), ua ke no los tej neeg kuj raug tej neeg phem ntxias dag txhua txhua ib tug ntawm 10 tus twg (9.5 feem pua).
Muaj ib txhia neeg uas tau mus koom cov kev teeb txheeb no tau qhia tias tej zaum lawv tau them nyiaj los yog tau qhia tej xov xwm tsis tsim nyog qhia rau tej neeg phem uas dab tias yuav muab ib co khoom qub puav pheej rau lawv, los yog yuav faib ib co nyiaj ntau heev rau lawv, los yog yuav tau mus holiday ib qho qhov twg kom lawv pab tej neeg phem.
Tsab ntawv cej luam qhia txog cov cybercrime ntawm teb chaws Australia xyoo 2024 (Cybercrime in Australia 2024 report) los kuj tau qhia tias yeej muaj 27 feem pua ntawm tej neeg ua ib yam dab tsi hauv online ces yeej raug tej neeg phem ua phem rau los sis raug thab zes uas tej xwm txheej no raug teev tias yog cov cybercrime.
Raug teeb meem 'loj tshaj qhov poob nyiaj lawm'
Cov pab pawg neeg uas raug neeg phem tsim teeb meem rau ces yog tej hluas, neeg txum tim, tej zejzog neeg LGBTIQ+ thiab tej neeg puas cev.
Tej neeg txum tim uas tau koom cov kev teeb txheeb no ces yog cov uas yuav raug neeg phem ntau cov tswv yim ua phem rau lawv.
Lub koom haum (Australian Institute of Criminology) no hais tias cov kev teeb txheeb no qhia tias leej twg yog cov uas pheej raug neeg phem tsim teeb meem ntau dua.
Rick Brown uas yog tus lwm coj ntawm lub koom haum no tau hais tias cov kev teeb txheeb no kuj tau qhia tias tsim nyog tej neeg coob tuaj ntxiv yuav tau qhia rau nom tswv paub.
Brown tau hais tias "Yog xam rau qhov dav dav lawm ces yeej tseem muaj tej neeg raug neeg phem tsim teeb meem rau coob li qub, tab sis zoo li tej neeg yeej qhia tej xwm txheej no rau tub ceev xwm los yog ReportCyber paub tsawg heev, thiab yeej muaj tej neeg coob heev uas raug tej teeb meem no yeej raug teeb meem loj heev. Thiab tseem raug teeb meem loj tshaj qhov ua rau lawv poob nyiaj txiaj lawm thiab."
Tsab ntawv cej luam no tau txheeb tau tias tau ua rau tej neeg raug neeg phem tsim teeb meem rau muaj teeb meem rau lawv cov kev koom zejzog thiab muaj teeb meem ua rau lawv tsis taut xais kev noj qab nyob zoo ntau tuaj ntxiv.
Tej neeg uas tau mus koom ov kev teeb txheeb no yeej tua hais tias tej uas lawv raug lwm tus ua phem rau tas mus li thaum lawv mus hauv online ces yog raug neeg ua phem uas hack lawv tej social media account thab zes li pheej xa tej duab liab qab rau lawv.
Tsis tas li ntawd los tej neeg phem pheej sau tej lus phem, tej xo ua kom tej neeg chim thiab tu siab, kom txag muag los yog ua rau lawv mloog tau tias lawv tsis tau txais kev nyab xeeb yog tias tseem txiav tu nrho tsis muaj kev cuam tshuam nrog tej neeg phem uas pheej tsim teeb meem rau yus ntawd.
Yog thaum tham txog tej xwm txheej uas neeg phem tau tsim rau lawv tshiab tshiab tsis ntev los no yog dab tsi, ces yeej muaj tej neeg tau koom cov kev teeb txheeb no yuav laug txog ib nrab (47 feem pua) uas raug neeg phem tsim teeb meem rau tau hais tias yeej muaj kev cuam tshuam nrog ib tug neeg txawv uas lawv tsis paub hauv online.
Tej tswv lagluam me thiab tej lagluam nrab los yeej raug neeg phem tsim teeb meem rau ntau kawg nkaus thiab, thiab tsuas muaj tej tswv lagluam no txog li 25 feem pua thiaj thov kev pab cuam ntawm nom tswv xwb.
Txawm li cas los yeej tsis muaj kev pauv hloov dab tsi rau tej nyiam xam raws tus zauv nrab uas tau them rau tej neeg phem tom qab nrhiav tau rov qab los, tej xwm txheej raug neeg phem nyiag siv tej cim thawj thiab siv tej neeg raug neeg phem dag uas rov qab tau lawv tej nyiaj rov qab los yeej tau muaj ntau ntxiv tuaj nce ntawm 75 feem pua mus ua 82 feem pua lawm.
Brown thiaj tau nqua hu kom tej neeg yuav tau kub siab siv tswv yim los pov puag lawv tus kheej ua ntej thaum lawv mus ua ib yam dab tsi hauv online li yuav tau siv cov password kom twv tau nyuaj thiab yuav tsum nruab tej twj tshiab coj los pab kom yus tau txais kev nyab xeeb, uas tsab ntawv cej luam no txheeb tau tias ''txuas muaj tej neeg tsawg tsawg thiaj kub siab txog xwb uas yog tej yam txaus txhawj xeeb heev li."
Tej neeg ua nyeem zaj xov xwm no muaj peev xwm nrhiav tau kev pab cuam daws kev nyuaj siab ntawm lub koom haum Beyond Blue tus xov tooj 1300 22 4636. Thiab yog xav tau xov xwm kom ntxaws ntxiv ces txheeb tau ntawm beyondblue.org.au. Hos lub koom haumEmbrace Multicultural Mental Health ces muaj cov kev pab cuam daws kev nyuaj siab rau tej neeg coj ntseeg ntau yam kab lis kev cai thiab hais ntau hom lus.
