Tsoom fwv teb chaws Australia (tsoom fwv Albanese) yuav coj cov tshuaj Jardiane uas sawv daws paub tias yog Empagliflozin coj mus teev zwm nrog cov kev pab yuav tshuaj Pharmaceutical Benefits Scheme (PBS) uas yuav ua rau tej neeg Australia muaj teeb meem mob raum ntau tshaj 65,000 tus yuav tau txais txiaj ntsim los ntawm tus tshuaj no.
Tus tshuaj no ces yog noj coj los apb kom lub raum raug kev puas tsuaj qeeb zog rau ib lub caij twg thiab pab kom lub raum ua tau hauj lwm ntev dua.
Tej neeg uas tau cov concession card siv ces tsuas tau them AUD$7.70 xwb hos tej tsis muaj ces yuav tau them tus nqe tshuaj txog li AUD$31.60. Txawm li cas los txij tim 1 lub 7 hli nuj xyoo tom ntej no (2026) ces yuav muab tus tej nqe tshuaj no txo kom qes zog los ua AUD$25 lawm xwb thiab. Peter Brown uas yog ib tug neeg mob raum thiab yuav tau tos tej tshuaj no siv thiaj hais tias nws zoo siab heev rau tsoom fwv cov kev pab no thiab yuav pab txuag tau nyiaj.
Mark Butler uas yog Australia tus nom teb chaws tswj dej num noj qab haus huv thiab qhia tias:
"Tsaib no ces peb tsuas pub tus tshuaj Jardiance rau ib cov neeg uas mob ib co mob raum twg tsi ntsees siv xwb. Tab sis txij hnub zwj Cag (Saturday) no mus ces peb xav tias yuav muaj tej neeg Australia mob raum txog li 70,000 tus ntxiv yuav yog cov neeg muaj cai los yuav tau tej tshuaj uas yuav pab hloov tau lawv lub neej no siv."
Raws li tej xov xwm tau los ntawm cov kev txheeb Australia tej pej xeem xyoo 2021 ces pom tias muaj ib feem pua (1%) yeej tab tom ua lub neej nyob nrog tus mob raum, los sis muaj ib tug ntawm nees nkaum tus neeg Australia twg uas muaj hnoob nyoog 75 xyoos los yog siab tshaj ntawd yeej raug ntsuam tau tias mob raum.
Ces Mr Butler thiaj hais tias tus kab mob raum no yog ib tug mob ntsiag tos tsis muaj neeg paub txog uas muaj neeg mob coob heev ntawm Australia.
"Peb xav tias muaj neeg Australia txog li 2.5 million tus mob raum, tab sis tsawg dua li 10 feem pua ntawm tej neeg no thiaj paub tias lawv mob raum xwb, vim tsuas paub tej yam ntxwv mob raum thaum twb mob loj txog 90 feem pua uas lub raum twb tsis ua hauj lwm lawm xwb."
Zeskais (Professor) Carol Pollock uas yog tus tuam thawj tswj ntawm lub koom haum Kidney Health Australia thiaj qhia txog qhov tseem ceeb ntawm cov kev mus ntsuam seb puas txheeb tau tias muaj tus mob uas tsis muaj tej yam ntxwv mob qhia yus no.
"Peb yuav tsum tau mus sim ntshav, ntsuam seb puas muaj ntshav siab thiab sim zis ua peb yam no ua ke mas thiaj yuav txheeb tau kom paub tias seb puas mob raum. Ces peb thiaj xav pom kom tej neeg mus txheeb lawv lub raum thiab nkag siab tias yuav muaj teeb meem dab tsi ua rau mob raum kom thiaj nrhiav tau tej xub ke raws li qhov tsim nyog coj los kho tus mob no."
