Yeej pom muaj tej tsheb siv hluav taws sob ntawm Australia tej kev tas mus li rau lub caij tsis paub tias tej nqe roj tsheb zoo li cas ntxiv thiab muaj tej neeg tsav tsheb coob tuaj ntxiv nrhiav tej xub ke pheej yig zog mus ntoj ncig. Nod yog tej uas tsim nyog koj paub txog yog tias koj tab tom xav tias yuav hloov mus siv tsheb siv hluav taws xob.
- Ib lub tsheb siv hluav taws xob raug tus npe li cas ntawm Australia?
- Puas yog tias tej nqe kho tej tsheb siv hluav taws xob pheej yig dua?
- Muaj peev xwm tsav tau tej tsheb siv hluav taws xob mus deb npaum li cas?
- Yus puas muaj peev xwm sam hluav taws xob rau ib lub tsheb siv hluav taws xob ntawm yus tsev?
- Tsim nyog yus paub txog dab tsi ua ntej yuav yuav ib lub tsheb siv hluav taws xob qub siv?
Raws li tej xov xwm ntawm tej lagluam qhia ces yeej muaj tej tsheb siv hluav taws xob (Electric Vehicles - EVs) txhua txhua ib (1) lub twg ntawm tej tsheb tshiab rau (6) lub twg uas tau muag rau tej neeg lub 4 hlis ntuj xyoo 2026. Lub caij uas tau muag tej tsheb ntau tuaj ntxiv no, thiaj muaj ntau cov lus nug uas nug txog tias seb tej neeg puas muaj peev xwm yuav, puas muaj peev xwm sam thiab seb tej tsheb siv hluav taws xob siv puas haum raws li qhov xav siv ntawm teb chaws Australia.
Ib lub tsheb siv hluav taws xob raug tus npe li cas ntawm Australia?
Tej tsheb siv hluav taws xob los yeej tseem tau them kim tshaj teb tsheb siv roj petrol thiab diesel, txawm tias tej nqe tsheb tau pheej yig zog vim muaj neeg yuav coob ntxiv tuaj thiab muaj ntau hom tsheb rau tej neeg xaiv yuav ntau tuaj ntxiv.
Zeskais (Professor) Hussein Dia uas yog tus paub zoo txog seem txuj Transport Technology thiab Sustainability ntawm tsev kawm qib siab Swinburne University of Technology hais tias tam sim no yeej muaj ntau hom tsheb uas tej neeg yeej muaj peev xwm yuav siv thiab.
Nws hais tias "Peb los yog plaub xyoos dhau los ces peb yeej tsis tshua muaj peev xwm nrhiav tau ib lub tsheb siv hluav taws xob tus nqe pheej yig dua $50,000 li. Tab sis niaj hnub no ces yeej muaj tej tsheb no tus nqe txij li $35,000 thiab tsoom fwv los yeej muaj ib co program txhawb kom tej neeg tig mus yuav tej tsheb no siv, thiab tej zaum tej tsheb no tseem pheej yig tshaj thiab los kuj tau."
Thiab tej zaum tej neeg tsav tsheb los kuj yog cov yuav muaj cai thov tau tsoom fwv tej kev pab no thiab tsuas nyob rau ntawm tias seb tej neeg no nyob qhov twg xwb.
Tej neeg ua hauj lwm los kuj muaj peev xwm siv cov salary packaging (tej nyiaj rho ntawm tej yus khwv tau) coj mus ntiav cov tsheb novated leasing vehicles uas ua rau yus thov txog tau cov se fringe benefits tax discount thiab.
Alex Forrest uas yog tus coj uas tswj tej hauj lwm tsheb thiab roj ntawm lub koom haum Royal Automobile Club of Western Australia tshab txhais tias:
"Yog tias yus siv cov kev ntiav tsheb siv hu ua novated lease ces yus yuav tau cov fringe benefits tax. Ces lub caij 5 xyoos uas yus ntiav lub tsheb no siv kuj muaj peev xwm pab yus txuag tau nyiaj ntau txheeb dollars rau ib xyoos twg thiab."
Puas yog tias tej nqe kho tej tsheb siv hluav taws xob pheej yig dua?
Yog muab tej tsheb siv hluav taws xob no piv rau tej tsheb siv roj petrol thiab diesel ces yeej kho pheej yig dua.
Thiab kuj tau kwv yees tias tej neeg tsav tej tsheb siv hluav taws xob no yuav muaj peev xwm txuag tau txog li ntawm 70 feem pua rau tej nqe roj tsheb thiab txuag tau tej nqe kho txog 40 feem pua ib xyoos twg.
Professor Dia hais tias yog muaj tej nqe siv tsheb siv hluav taws xob ntau yam sib ntxiv ua kev rau ib lub caij ntev ntxiv tuaj ces yuav tau them tsawg dua.
Tej nqe siv hluav taws xob yeej pheej yig dua tej nqe roj petrol rau ib kilometer twg ... thiab vim tias tej tsheb siv hluav taws xob los yeej kho tau yooj yim zog thiab tus nqe kho los yeej pheej yig dua.Professor Hussein Dia
Cov kev sam hluav taws xob rau ib lub tsheb siv hluav taws xob ntawm tsev yeej ib txwm pheej yig dua cov kev sam ntawm zej tsoom tej chaw sam, ces thiaj ua rau tej nqe kho ib nyuag pheej ygi zog rau tej neeg tsav tsheb uas tos siv zej tsoom tej chaw sam hluav taws xob.
Muaj peev xwm tsav tau tej tsheb siv hluav taws xob mus deb npaum li cas?
Professor Dia hais tias yeej muaj tej tsheb siv hluav taws xob ntau hom uas tam sim no yeej khiav tau deb txog li 400 - 500 kilometres thaum yus sam hluav taws xob tig zaug xwb.
Tab sis yog yus xav mus kev deb ces yus yuav tsum ua tib zoo npaj.
Nws hais tias "Kuj tseem pom tias tseem tsis tshua muaj peev xwm cai mus tau txawv xeev ... hais tsi ntsees rau lub caij yus caij tsheb siv hluav taws xob mus rau tej zos toj siab ntau thaj chaw. Vim rau hov tias yeej muaj tej chaw ntau txheeb kilometres uas tsis muaj tej chaw sam hluav taws xob kom puv sai siv li."
Yus puas muaj peev xwm sam hluav taws xob rau ib lub tsheb siv hluav taws xob ntawm yus tsev?
Yeej muaj tej tswv tsheb siv hluav xob ntau heev yeej txuas tej xov siv hluav taws xob sam hluav taws xob rau lawv tej tsheb ntawm tsev.
Alex Forrest thiaj hais tias tej zaum txoj xub ke no haum siv rau tej neeg uas tsav tsheb mus ze zog ib hnub twg.
Nws hais tias "Yog tias koj nres koj lub tsheb ntawm kev thiab muaj ib lub pob siv hluav taws xob ntawm koj lub chaw nres tsheb ces koj muaj peev xwm sam ntawm lub pob siv hluav taws xob ntawd."
Thiab tej neeg uas tsav tsheb mus kev deb los kuj yuav tau txais txiaj ntsim thiab yog tias lawv nruab ib lub pob sam hluav taws xob kom sam puv sai siv ntawm tsev.
Yog tias koj yuav tau tsav tsheb mus deb rau ib hnub twg, los yog pheej mus kev db thiab siv tej battery uas khaws hluav taws xob tau ntau dua ces tsim nyog nruab ib lub pob sam hluav taws xob uas sam kom pub sai ntawm tsev siv.Alex Forrest
Txawm li cas los tej neeg uas nyob ntawm tej tsev siab ntau tshooj (apartments) los tej zaum kuj yuav tau thov kev tso cai ntawm tus tswv tswj lub tsev ntawd ua ntej yuav nruab ib lub chaw sam hluav taws xob rau yus lub tsheb siv hluav taws xob thiab.
Tsim nyog yus paub txog dab tsi ua ntej yuav yuav ib lub tsheb siv hluav taws xob qub siv?
Australia tej kiab khw muag tej tsheb siv hluav taws xob qub uas twb raug siv ib zaug dhau los lawm kum tseem yog ib co kiab khw tshiab, tab sis yeej muaj tej neeg yuav tej tsheb no siv yeej muaj kev ntseeg siab ntau tuaj ntxiv rau cov kev siv tej tsheb siv hluav taws xob qub no lawm thiab.
Tej kws thiaj taw qhia kom ua tib zoo txheeb cov battery warranty, tej xub ke kho, thiab cov kev pab tom qab yuav lub tsheb lawm uas ntej yus yuav tej tsheb no siv.
Mr Forrest hais tias tsim nyog tej neeg xav yuav tej tsheb no siv yuav tsum tau mus ua yus ib co kev teeb txheeb txog cov kev yuav tej tsheb no siv thiab txheeb tej tsheb no seb zoo li cas tso.
"Yus yuav tau mus ua yus cov kev teeb txheeb txog tej tsheb no, tsis yog pheej mus txheeb txog tej tsheb no xwb, tab sis yuav tsum tau txheeb tias tej neeg yuav tej tsheb no xav li cas rau cov kev yuav tej tsheb no siv ... ua tib zoo xyuas kom yog yus them lawm kom tau lub raws li qhov yus xav tau siv tiag, los sis kom tau hom tsheb haum raws li qhov yus xav siv tiag."
Subcribe los yog caum mloog tej xov xwm kaw ua suab Australia Explained kom paub txog ntau yam xov xwm tseem ceeb thiab tej lus taw qhia koj koj pib tau lub neej tshiab ntawm teb chaws Australia.
Yog tias koj muaj ib co lus nug dab tsi los yog muaj ib co tswv yim dab tsi? Ces xa email rau peb rau ntawm australiaexplained@sbs.com.au
Mloog tau xov xwm tshiab ntawm SBS Hmong, download SBS Adio app thiab caum SBS Hmong Facebook page thiab mloog tau SBS Hmong Youtube.
