Ntsiab lus:
- Kab mob khaub thuas ces yog kis tau lawm yeej muaj peev xwm ua rau mob sab heev thiab tej zaum kuj yog ib co mob yuav tsim tau kev phom sij tau rau txoj sia.
- Yeej tau muaj cov kev taw qhia kom txhua tus neeg hnoob nyoog txoj 6 hlis thiab siab tshaj ntawv mus hno tshuaj tiv thaiv kab mob khaub thuas txhuas xyoo.
- Tej me nyuam yaus ntawm Australia los yeej muaj peev xwm siv tau tej tshuaj vaccine uas tsis siv koob hno li cov spray flu vaccine uas txuag rau qhov ntswg thiab.
- Yeej tau txais kev nyab xeeb thiab siv tau hauj lwm zoo heev rau cov kev siv tej tshuaj vaccine tiv thaiv khaub thuas, thiab xav kom sab laj nrog koj tus kws kho mob yog tias koj muaj tej lus nug los yog ib co kev txhawj xeeb dab tsi.
Mloog tau SBS Hmong ntawm no.Mloog tau SBS Hmong ntawm no.Mloog tau SBS Hmong ntawm no.
- Tus mob khaub thuas no yuav tsim tau kev phom sij loj npaum li cas rau yus?
- Leej twg yog cov yuav mob sab heev los ntawm tus mob khaub thuas no?
- Kuv yuav pov puag kuv tus kheej ntawm tus kab mob khaub thuas no li cas?
- Puas tsim nyog kuv hno tshuaj vaccine tiv thaiv khaub thuas thiab kuv puas tau them?
- Puas muaj tej tshuaj vaccine tiv thaiv khaub thuas uas tsis tas siv koob hno ntawm Australia?
- Mus hno tshuaj tiv thaiv khaub thuas thaum twg zoo tshaj plaws?
- Puas tsim nyob kuv txhawj xeeb tsam hno tsis haum cov tshuaj tiv thaiv khaub thuas (Flu vaccine)?
Tus kab mob khaub thuas (Influenza los yog flu) ces yeej yog ib tug kab mob virus uas muaj thawm niaj thawm xyoo, txhais tias yus yeej muaj peev xwm kis tau ib lub caij twg ntawm lub xyoo.
Ntawm Australia no ces, tau muaj neeg kis tau kab mov khaub thuas ntau tuaj ntxiv rau thaum lub caij nplooj zeeg (uas yuav pib lub caij ntuj no) thiab tau muaj neeg kis coob heev rau lub 6 hli mus txog lub 9 hlis ntuj.
Tus mob khaub thuas no yuav tsim tau kev phom sij loj npaum li cas rau yus?
Tej yam ntxwv mob ces yeej mob sab sua thiab mob ntev dua tej khaub thuas ib txwm mob.
Uas yeej ib txwm muaj tej yam ntxwv mob li ua npaws kub ib ce, mob nqaij thiab tej pob qej txha, mob taub hau thiab mob qab.
Tej neeg feem coob uas tau kis tau tus kab mob khaub thuas influeza no ces yeej zoo rau lub caij li ntawm ob peb hnub xwb. Tab sis ib txhia neeg mob ces yog cov kis tau lawm yuav mob sab heev thiab muaj ntau yam mob cuam tshuam.
Ntawm Australia no ces xyoo 2025 yog xyoo muaj neeg kis tau tus mob no coob thiab phom sij tshaj plaws raws li tau teev tseg ces twb muaj tej neeg tshaj 1,700 tau tas sim neej lawm.
Dr Michael Wright ces yog ib tug kws kho mob ntawm Sydney thiab kuj yog tus coj lub koom haum Royal Austrlalian College of General Practitioners hais tias "Yeej muaj peb coob tus heev xav tias tus mob no zoo li tus khaub thuas xwb, tab sis tus mob no yeej tau ua rau ntau puas tus neeg Australia tas sim neej txhua txhua xyoo.''
"Yeej muaj neeg Australia ntau txheeb tus tau raug coj mus kho ntawm tsev kho mob vim kis tau tus khaub thuas influenza rau qhov ua rau lawv mob ntsws hnyav heev."
Leej twg yog cov yuav mob sab heev los ntawm tus mob khaub thuas no?
Txawm yog tej neeg tau txais kev noj qab nyob zoo kiag los yog tias kis tau lawm ces tus khaub thuas no yuav ua rau lawv mob sab heev thiab.
Cov neeg uas yog tias kis tau tus mob no yuav mob sab heev thiab yuav raug coj mus kho ntawm tsev kho mob ces yog tej me nyuam yaus hnoob nyoog qes dua tsib (5) xyoos, tej neeg hnoob nyoog tshaj 65 xyoos, tej neeg txum tim Aboriginal thiab Torres Islander ntiag tug, thiab tej neeg muaj ntau yam mob uas twb mob los ntev, nrog rau tej poj niam xeeb (muaj) me nyuam.
Dr Wright hais tias "Tej neeg no ces yuav mob ntsws ntau dua, thiab yuav tau coj lawv mus kho ntawm tsev kho mob.''
Kuv yuav pov puag kuv tus kheej li cas ntawm tus kab mob khaub thuas no?
Tus mob khaub thuas influenza no ces kis tau raws li tej teev qaub ncaug los yog cov kua ntswg uas muaj tus mob no ntawm tus neeg mob lub qa thiab qhov ntswg (thaum hnoos thiab txham uas ya mus rau lwm tus).
Cov kev tu yus tus kheej kom huv si li nquag ntxuav tes, thiab siv tissue los yog ntaub coj los npog/khwb yus lub qhov ncauj qhov ntswg thaum txham thiab hnoos yuav muaj peev xwm pab kom tsis txhob kis tau tus mob no rau lwm tus los yog tsis txhob muaj cib fim kis tau tus mob no ntawm lwm tus rau yus.
Tab sis txoj xub ke zoo tshaj plaws tiv thaiv tus khab mob khaub thuas no thiab kom tsis txhob uas rau yus mob sab yog thaum yus kis tau tus mob no es ces yog yuav tau mus hno tshuaj vaccine tiv thaiv khaub thuas txhua xyoo.
Dr Wright tshab txhais tias "Tej txiaj ntsim ntawm cov kev tau hno tshuaj vaccine ces yog pab kom yus mob tsawg dua, thiab ua tib zoo xyuas kom yog thaum yus kis tau tus mob no los yuav ua rau yus mob tsis tshua sab heev."
Tej neeg ntiag tug uas tau hno tshuaj vaccine pov puag lawv tus kheej yog cov yuav kis tau tus mob khaub thuas rau lwm tus tsawg dua.
Cov kev hno tshuaj vaccine yog ib yam zoo tshaj plaws uas muaj peev xwm pov puag yus tus kheej, yus tsev neeg thiab yus tej zejzog.Dr Michael Wright
Puas tsim nyog kuv hno tshuaj vaccine tiv thaiv khaub thuas thiab kuv puas tau them?
Cov kev hno tej tshuaj vaccine tiv thaiv khaub thuas yog ib co tseem ceeb heev rau ib tug twg, hais tsi ntsees rau cov neeg ntawm tej zejzog uas lub cev tsis muaj zog.
Dr Stephanie Williams hais tias "Peb thiaj xav kom txhua leej txheej tus uas muaj hnoob nyoog tshaj 6 hli rov sauv mus hno ib hom tshuaj flu vaccine twg txhua txhua xyoo."
Dr Williams ces yog tus neeg pab tus coj uas tswj tej kab mob sib kis ntawm ib ceg kaum haum Australian Centre for Disease Control.
Nws hais tias “Yeej muaj qee pab pawg neeg uas tau hno tej tshuaj vaccine tiv thaiv khaub thuas no raws li Australia cov program hno tshuaj National Immunisation Program uas tau hno dawb xwb thiab:
- Uas yog tej me nyuam hnoob nyoog 6 hli mus txog 5 xyoos.
- Tej laus hnoob nyoog 65 xyoos los yog siab tshaj ntawd.
- Tej poj niam muaj (xeeb) me nyuam.
- Tej neeg txum tim Aboriginal thiab Torres Strait Islander ntiag tug uas muaj hnoob nyoog 6 hli thiab siab tshaj ntawd.
- Tej neeg uas muaj ntau yam mob tsi ntsees twg.''
Yog tias koj yog cov neeg uas tsis muaj cai hno tej tshuaj flu vaccine dawb, ces koj kuj muaj peev xwm yuav tej tshuaj no ntawm tej chaw muag tshuaj coj los hno koj thiab.
Dr William hais tias "Koj yeej muaj peev xwm hno tau tej tshuaj vaccine no ntawm ntau cov chaw kho mob tsis hais yus tus kws kho mob ntawm yus zos, nom tswv zos lub chaw hno tshuaj vaccine, tej koom haum kho mob zejzog, neeg txum tim tej chaw kho mob thiab ib txhia khw muag tshuaj thoob Australia no."
Tsis tas li ntawd los tej zaum koj tej nom tswv xeev los sis koj tus tswv lagluam kuj yuav npaj ib cov program hno tshuaj flu vaccine pub dawb rau koj hno thiab.
Puas muaj tej tshuaj vaccine tiv thaiv khaub thuas uas tsis tas siv koob hno ntawm Australia?
Xyoo 2026 ntawm Australia no ces kuj yuav tau siv cov tshuaj flu vaccine uas tsis tas siv koob hno lawm, vim yog ib co tshuaj spray uas cia li txuag rau tej qhov ntswg lawm xwb.
Thiab tau txais kev tso cai pom zoo siv ntawm lub koom haum Therapeutic Goods Administration (TGA) vim siv tau txais kev nyab xeeb thiab siv tau hauj lwm zoo uas yuav coj los siv rau tej me nyuam hnoob nyoog txij 2 xyoos txog 17 xyoo.
Thiab yeej muaj tej tshuaj no iv ntawm ib co chaw twg thoob Australia, uas ib co chaw ces yog tej nom tswv xeev uas coj los siv dawb rau tej me nyuam yaus hnoob nyoog txij 2 txog 5 xyoos.
Dr Wright hais tias "Peb paub tias tej me nyuam muaj hnoob nyoog li hais ntawd yog cov tsis nyiam kom siv koob hno tshuaj rau lawv, thiab lawv niam lawv txiv los yeej tsis tshua xav coj lawv tej me nyuam mus hno thiab."
Thiajom xav kom nug koj tus kws kho mob tias seb puas muaj koj lub xeev cov program siv cov tshuaj flu vaccine uas txuag rau qhov ntswg siv ntawm koj lub zos.
Mus hno tshuaj tiv thaiv khaub thuas thaum twg zoo tshaj plaws?
Dr Meru Sheel uas yog ib tug zeskais paub zoo txog kab mob sib kis thiab ntiaj teb cov kev noj qab haus huv ntawm tsev kawm qib siab University of Sydney tshab txhais tias cov kev tau hno tshuaj flu vaccine 3 txog 4 hlis ua ntej yuav txog lub caij muaj neeg kis kab mob khaub thuas coob heev yog cov kev yuav muaj peev xwm pov puag tau koj zoo tshaj plaws.
Nws hais tias "Vim li ntawd peb thiaj xav kom tej neeg mus pib hno tej tshuaj flu vaccines rau lub caij nplooj zeeg uas yog lub sij hawm pib caij ntuj no ntev ntau hli."
"Thaum uas muaj tej tshuaj coj los muag ntawm tej kiab khw li ntawm lub 4 hlis ntuj thiab 5 hlis ntuj no, los yog thaum yus khoom thiab thaum muaj cov tshuaj no coj los hno rau ntawm tej chaw ua hauj lwm, ces yog lub sij hawm zoo tshaj plaws rau yus hno."
Puas tsim nyob kuv txhawj xeeb tsam hno tsis haum cov tshuaj tiv thaiv khaub thuas (Flu vaccine)?
Tom qab tau hno tshuaj vaccine lawm, yeej muaj ib txhia neeg yuav muaj qee cov yam ntxwv mob me ntsis rau ob peb hnub thiab.
Dr Sheel hais tias "Tag nrho tej tshuaj vaccines ces yeej ib txwm muaj ntau cov kev cuam tshuam uas peb pom tas mus li xws li ua rau mob, o, thaj chaw hno ntawd liab liab, thiab ua npaws kub taub hau me ntsis."
"Cov tshuaj hno tiv thaiv khaub thuas (Flu vaccine) no ces yeej txais kev nyab xeeb thiab siv tau zoo heev, thiab tej yam ntxwv tsis haum feem ntau no ces nws kuj txawj zoo nws lawm thiab."
Txawm li cas los kuj tsuas muaj tej neeg fab hno tsis haum tej tshuaj no tsawg tsawg xwb thiab.
Thaum koj mus hno tshuaj vaccine ces tus kws kho mob los yog tus kws tshuaj ntawd yeej yuav hais kom koj tos li ntawm 15 txog 20 ntiag tiv (minutes) tom qab tau hno lawm, vim tsam ib pliag yus ho hno tsis haum tej tshuaj vaccine ntawd.Dr Meru Sheel
Dr Wright xaus lus tias koj tus kws kho mob yuav pab yus nrhiav tej tshuaj vaccine hno tiv thaiv khaub thuas kom haum raws li yus tej hnoob nyoog, yog yog yus cov kev noj qab haus huv thiab yuav teb txhua yam lus nug uas yus muaj.
"Yog tias koj muaj ib co kev txhawj xeeb los yog ib co kev ntxhov siab dab tsi uas tej zaum ua rau koj tsis tshua xav mus hno tshuaj vaccine, ces koj tus kws kho mob yeej yog tus tsim nyog muaj peev xwm tshab txhais rau koj tias hom tshuaj vaccine twg yog cov tsim nyog koj hno."
Subcribe los yog caum mloog tej xov xwm kaw ua suab Australia Explained kom paub txog ntau yam xov xwm tseem ceeb thiab tej lus taw qhia koj koj pib tau lub neej tshiab ntawm teb chaws Australia.
Yog tias koj muaj ib co lus nug dab tsi los yog muaj ib co tswv yim dab tsi? Ces xa email rau peb rau ntawm australiaexplained@sbs.com.au
Mloog tau xov xwm tshiab ntawm SBS Hmong, download SBS Adio app thiab caum SBS Hmong Facebook page thiab mloog tau SBS Hmong Youtube.
