Tom qab lub koom haum eSafety Commissioner tau muaj ib co kev taw qhia rau tsoom fwv Albanese thiaj tau txiav txim siab los txwv.
Julie Inman Grant uas yog eSafety Commissioner tau hais tias ''peb yuav tau kub siab txog tej pov thawj uas yeej tau qhia tias muaj tej me nyuam 4 tug ntawm 10 tus twg yeej raug teeb meem los ntawm YouTube. Internet ces zoo li hiav txwv uas muaj dej nqus lawv rau qhov chaw tob, thiab muaj ntses tom neeg uas txawv tej pas daj dej ntawm tsev. Tab sis peb muaj peev xwm tswj tej ntses tom neeg no.''
Muaj qho tus leej niam leej txi uas tau plam lawv tej me nyuam vim YouTube koj pom zoo nrog cov kev txwv tsis pub siv no, thiab hais tias ''cov kev txwv tsis pub qhib siv yog ib yam pib zoo, tab sis tseem xav los kho kom siv tau cov kev txwv no zoo tuaj ntxiv thiab.''
Txawm li cas los kuj muaj ib co neeg li tej YouTubers tsis pom zoo vim yuav ua rau tsis muaj neeg mus saib lawv tej videos lawm. Tsis tas li ntawd los Leo Puglisi uas yog tus tsim lub chaw nthuav xov xwm 6 News kuj qhia tias yuav ua rau tej hluas tsis muaj peev xwm saib tau tej xov xwm raws li qhov tsim nyog lawm thiab vim lawv tsis yog tej neeg uas pheej saib xov xwm ntawm tej chaw li lwm cov neeg ib txwm saib.
Ua ke no los Ted O'Brien hais ''Tsim nyog kub siab txog me yaus cov kev nyab xeeb ua ntej. Tab sis zoo li tus tsoom fwv Albanese no yeej tsis qhia meej txog tej no rau neeg Australia ua ntej yuav muaj cov kev xaiv tsa li. Tab sis tam sim no nws ho hloov siab los txwv.''
Sarah Hanson-Young uas yog tus nom tswj cov dej num Communications ntawm pab nom Greens hais tias ''tsim nyog Google ua tej hauj lwm no, tab sis nws tseem raug yuam kom ua, ces thiaj yog peb lub luag hauj lwm yuav tau tsim cai los yuam thiab yuav tsum kom lawv thov ntawv tso cai mas thiaj pub siv lub website no.''
Ces txij tim 10 lub 12 hlis ntuj xyoo 2025 no mus thiaj yuav txwv tsis pub tej hluas hnoob nyoog qes dua 16 xyoo qhib YouTube account siv lawm, tab sis lawv yeej tseem muaj peev xwm siv tau tej teej kawm cov YouTube account coj los pab lawv kawm ntawv.
