Tau muaj ib tsab ntawv cej luam tshiab los ntawm lub koom haum Diabetes Australia tau ceeb toom tias teb chaws Asutralia no yuav muaj neeg tau tus mob ntshav qab zib ntau tuaj ntxiv, thiab kuj tau muaj cov kev nqua hu kom tej neeg muaj peev xwm siv tau tej tshuaj noj kom cev yuag zoo tshaj qub ntxiv thiab tsub se rau tej dej qab zib.
Tam sim no ces muaj neeg Australia txog li ntawm 2 million tus mob ntshav qab zib thiab tej hluas (hnoob nyoog txij 21 - 39 xyoos ntau tuaj ntxiv txog 2 npaug) yog cov tab tom tau tus mob no ntau tuaj ntxiv. Tej hluas hnoob nyoog qes dua 20 xyoo los kuj tau tus mob no ntau tuaj ntxiv txog 17 feem pua lawm thiab. Tsis tas li ntawd los Australia tej neeg txum tim los kuj yog cov uas mob ntshav qab zib hom ob ntau tshaj plaws hauv ntiaj teb. Thiab kuj muaj tej poj niam mob ntshav qab zib lub caij muaj me nyuam coob tshaj plaws tuaj ntxiv lawm.
Ces thiaj tau muaj cov kev nqua hu kom tsub se rau tej dej qab zib (soft drink) 20 feem pua uas tus coj lub koom haum Australian Beverages Council tsis pom zoo vim txog xyoo 2025 yeej yuav xyaw piam thaj tsawg rau tej dej qab zib lawm.
Ua ke no los kuj muaj kev nqua hu kom tsoom fwv teb chaws npaj ib co tswv yim los siv tiv thaiv haiv neeg no kom tsis txhob tau tus mob no, tab sis Mark Butler uas yog tus nom tswj dej num noj qab haus huv hais tias tsoom fwv tseem tos tsab ntawv cej luam uas tsev soom fwv pawg rooj saib xyuas tseem mus txheeb txog tus mob no tso.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify
