Txhua yam tsim nyog koj paub txog kev xa thiab thov se rov qab ntawm teb chaws Australia

Txhua yam tsim nyog koj paub txog kom koj thiaj paub thov se.

Source: Pixabay

Ua ntej koj yuav thov se ntawm Australian Tax Office (ATO) rov qab koj yuav tsum tau muaj qee yam li hauv qab no:

1) Yuav tsum muaj Tax File Number (TFN).

2) Muaj 2 yam caij rau koj thov se li txuas ntxiv no:

2.1) Yog koj thov rau ntiag tug ces muaj sij hawm txog tim 31 lub 10 hli ntuj.

2.2) Hos yog tias koj siv cov tax agent thov se rau koj ces koj muaj sij hawm txog tim 15 lub 5 hlis ntuj ntawm xyoo tshiab ntawd mus thov se.

3) Tag nrho txhua leej txhua tus uas ua hauj lwm khwv tau nyiaj lawm yuav tsum tau lodge tax return nrog ATO thaum xaus financial year txhua xyoo tsis hais neeg Australia los yog neeg txawv teb chaws uas muaj cai ua hauj lwm raug cai. Tsuas yog tias ntshe koj ho yog cov neeg khwv tau nyiaj tsawg dua 18,200 rov qab los hauv no, yog cov neeg so noj nyiaj laus (pensioners) los yog so tsis ua hauj lwm (retirees) los yog tej neeg tau cov benefits ntawm tsoom fwv xwb thiaj tsis tau them se. Tab sis yog khwv tau tshaj 18,200 rov sauv lawm ces yuav tau them se thiab lodge tax return nrog ATO.

4) Koj muaj peev xwm siv tau ATO cov tax online tools li my tax los yog siv cov tax agents pab lodge tax return tau rau koj. ATO thiaj xav taw qhia kom tej neeg tsiv teb tsaws chaw tuaj pib neeg tshiab ntawm teb chaws Australia siv cov tax agents pab lawv lodge tax return vim tej zaum yuav yog tej yam sib chab sib chaws heev rau lawv. Yog li yuav tau qhia tej bank account, peev txheej, tej vaj tse ua luam txawv teb chaws thiab yog koj tuaj nyob rau Australia tsis li ces tom qab yog ATO txheeb tau ces tej zaum koj yuav raug nplua los yog yuav raug txim. Vim tam sim no ntiaj teb tau siv cov digitalized tax system uas tsis muaj neeg zais npog los yog dag tau lwm tus ntxiv lawm.

5) Thov tau tej nqe yuav twj los yog ua ib yam dab tsi cuam tshuam txog txoj hauj lwm koj ua nkaus xwb tsis yog siv rau ntiag tug ua lwm yam, tab sis yuav tsum muaj records los yog receipts qhia tau qhov tseeb thiab yuav tsum khaws cia 5 xyoo tsam ATO txheeb ces thiaj muaj pov thawj qhia tau rau lawv.

6) Australia lub tuam chav sau se -Australian Tax Offic (ATO) yeej muaj ib lub ATO app uas koj muaj peev xwm tswj koj tej se (tax thiab tej nyiaj super).

7) Yog koj siv ib chav ntawm koj tsev los ua chaw ua hauj lwm ntawm tsev ces tsuas pub siv ua lub chaw ua hauj lwm nkaus xwb tsis pub siv ua lwm yam.

8) Kev ua ntau txoj hauj lwm tej zaum koj yuav tau them se ntau ntxiv tab sis kuj txhais tsis tau tias koj yuav thov tau se ntau rov qab thiab. ATO thiaj xav kom yog koj ua ntau txoj hauj lwm ces kav tsij npaj nyiaj me ntsis tseg tsam ho tau them se rau ATO vim tej zaum koj them se tsis txaus thiab. Txawm li cas los koj kuj muaj peev xwm claim tau ntau yam cuam tshuam txog koj tej hauj lwm thiab.

9) Koj muaj cai thov tau nqe roj siv tsheb mus ua ntau txoj hauj lwm los yog thov thov tau tej nyiaj yuav khaub ncaws, khaus, tsom iav, hnab looj tes thiab twj pab koj tau txais kev nyab xeeb los yog pab kom koj ua koj tej hauj lwm.

10) ATO xav kom tej neeg tuaj pib neej tshiab ntawm Australia xub siv tax agents pab thov se tso, yog tom qab paub thiab nkag siab zoo txog cov kev thov se lawm yus mam li mus thov se online hauv ATO los tau.

Mloog tau zaj xov xwm qhia txog 5 yam uas yuav pab koj thov se nrog ATO tau ntawm no:

Mloog tau SBSHmong, rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm Facebook, Google podcasts, Spotify, thiab Apple podcasts los yog download SBS Radio App thiab SBS Hmong podfollow kom koj mloog tau SBS Hmong.