Tau muaj ib co kev teeb txheeb tshiab ntawm tsev kawm qib siab Monash University tau txheeb tau tias ib txhia zos (Australian Local Government Areas -GLAs) yog cov uas muaj neeg ntsib teeb meem mob plawv nres ntau tshaj plaws thiab tej neeg dua kev los yog cov neeg uas paub siv cov txuj cardiopulmonary resuscitation (CPR) coj los pab cawm tej neeg no tsawg tshaj plaws thiab. Tab sis tej kws kho plawv hais tias peb tsuas muaj sib hawm tsawg tsawg yuav los pab tau tej neeg plawv nres no xwb, yog li ntawd lub sij hawm thiaj tseem ceeb heev.
Yog li tej kws paub zoo txog tej hauj lwm no thiaj nqua hu kom tsim cov sob kawm qhia rau zej tsoom Australia kom thiaj paub siv tej txuj CPR los pab cawm tej neeg plawv nres kom ciaj dim ntau tuaj ntxiv txog li ob npaug.
Txhua xyoo twg ces yeej muaj neeg Australia txog li ntawm 26,000 tus ntsib cov teeb meem plawv nres rau ib qho chaw twg uas tsis yog hauv tsev kho mob ib xyoos twg thiab yeej muaj cib fim tas sim neej txog li 95 feem pua ua ntej yuav mus txog tsev kho mob.
Yog li St John Ambulance Australia thiaj hais tias yog muaj peev xwm tsim tej tswv yim los tiv thaiv, qhia kom tej neeg dua kev uas ntsib tej neeg mob plawv nres (heart attack) uas paub siv cov txuj CPR los pab thaum tseem ntxov ces yuav muaj peev xwm pab tau tej neeg no txog li ntawm 75 feem pua.
Kuj txheeb tau tias muaj 60 lub thaj chaw ntawm xeev New South Wales yog cov chaw uas yuav muaj neeg mob plawv nres thiab muaj tej pej xeem tag nrho tshaj 1.1 million tus. Thiab raws li lub koom haum journals.plos.org qhia ces yeej tau muaj tej tsheb ambulance mus thauj teb neeg mob no tshaj 62,000 tus ntawm 543 thaj chaw thoob teb chaws no.
Peb txheeb tau tais tej neeg uas mob plawv nres ntau dua yeej yog cov neeg muaj tej mob cuam tshuam txog plawv thiab hlab plawv (cardiovascular disease) thiab muaj ntau yam cuam tshuam li haus luam yeeb, ntshav siab thiab ntshav kub roj ntau. Tsis tas li ntawd los tseem yog tej neeg laus dua, khwv tau nyiaj tsawg dua, kawm qes dua piv rau tej chaw uas mob plawv nres tsawg dua.Senior author, Monash University Professor Janet Bray.
Yog li Dr Rashid Bashir uas yog ib tug kws kho plawv ntawm Victoria thiaj hais tias muaj 7 cov txheej txheem sau ua lo lus luv luv li 'Dr's ABCD' uas tsim nyog peb paub txog thiab ua coj los pab tej neeg mob plawv nres.
D ces yog danger uas peb yuav tau txheeb seb tus neeg ntawd puas poob rau tej xwm txheej phom sij thiab xyuas kom thaj chaw ntawd tau txais kev nyab xeeb rau tus neeg plawv nres ntawd.
R ces yog response los yog nco ntsoov txheeb tias seb tus neeg ntawd puas tseem hnov.
S ces yog send uas yog nrhiav kev pab cuam rau tus neeg ntawd.
A ces yog airway los yog cov kev txheeb nws tej hlab cua, piv txwv li saib seb puas muaj zaub mov txhaws los yog daig nws tej hlab cua, thiab yog txhaws ces nyem nws lub plab kom tej khoom daig ntawd tawm.
B ces yog breathing uas yog txheeb seb puas yog tus neeg ntawd puas tseem ua pa.
C ces yog cardiopulmonary resuscitation (CPR) uas yog nias tus neeg ntawd hauv siab.
D ces yog defibrillator uas yog tej twj uas laum los yog nias hauv siab kom tus neeg ntawd plawv rov qab ntoj thiab dhia los yog rov qab ua hauj lwm.
Dr Bashir thiaj hais tias 'peb muaj sij hawm li ntawm ob peb feeb (seconds) xwb, thiaj yuav tau maj los txheeb tej no kom sai, thiab qw thov neeg pab thiab kom hau xov tooj rau triple zero (000). Lub hom phiaj ntawm cov kev siv CPR ces yog pab cawm tus neeg plawv nres txoj sia ua ntej txog rau thaum kev pab tuaj txog.'
READ MORE
Kab mob qhov rooj plawv
Yog li Professor Bray thiaj cia siab tias 'cov kev teeb txheeb no yuav txhawb nqa kom muab cov kev qhia tej neeg kom paub ua CPR no coj los qhia rau tej lees kais thiab qhia rau tej tub kawm txhua tus ntawm high school kom paub thiab siv tau uas nyob nraim hauv nruab siab.'
Thiab ib qho tseem ceeb tshaj plaws uas Professor Bray xav kom peb kub siab txog thaum muaj neeg mob plawv nres thiab tej neeg pom ib tug twg mob plawv nres ces kom nkag siab tias 'tus neeg mob plawv nres ntawd tsis muaj peev xwm yuav foob tau peb. Thiab yeej muaj cai ntawm Australia teev tias yog yus raus tes pab ib tug neeg uas poob rau tej xwm txheej ti tes ti taw lawm ces lawv tsis muaj peev xwm foob peb. Yog li ntawd thiaj tsis muaj ib yam laj thawj dab tsi yuav los txwv txiav kom peb tsis txhob pab tus neeg ntawd. Vim rau qhov ib tug neeg uas plawv nres ces twg yog tus neeg uas tab tom yuav tuag lawm ntag. Yog li ntawd cov kev muaj peev xwm ua tau ib yam dab tsi los pab nws thiaj zoo tshaj qhov uas tsis ua dab tsi hlo li.'
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.
