Tau muaj ib co kev teeb txheeb tsis ntev los no tau qhia tias ntau caum xyoo ntxiv no ces yuav muaj neeg Australia tau cov mob qhov rooj plawv tsis ua hauj lwm zoo ntau tuaj ntxiv.
Raws li tau muaj ib cov kev teeb txheeb tsis ntev los no ces kuj txheeb tau tias txog rau xyoo 2051 no ces yuav muaj neeg Australia tau tus mob qhov rooj plawv ntau tuaj ntxiv txog li 435,000 tus lawm.
Tej teeb meem yuav muaj tau los ntawm lub qhov rooj plawv tsis ua hauj lwm zoo thiab tsis muaj peev xwm xa tau ntshav mus yug yus lub cev yuav ua rau 'plawv tsis ua hauj lwm zoo, mob stroke, los yog muaj qee zaus kuj yuav tas sim neej tau thiab' yog tias tsis mus tshuaj ntsuam thiab kho.
Tej yam ntxwv mob ces yuav ua rau txog txog siav, plawv dhia, kiv taub hau thiab nkees nkees.
Tej laj thawj tos ho muaj tus mob no los vim yog ib yam mob tsis muaj tej yam ntxwv qhia tias tau tus mob no mus txog rau thaum uas twb mob loj lawm mam li paub. Tsis tas li ntawd los thaum laus tuaj lawm ces lub qhov rooj plawv kuj tsis tshua ua hauj lwm zoo lawm thiab, dua ntawd los yog tej neeg muaj keeb kwm mob plawv, hlab ntsha o, mob pob qej txha (rheumatic fever) dhau los yog cov uas tej zaum yuav muaj cib fim raug kev phom sij tau.
Yog li tej kws paub zoo txog tej teeb meem no thiaj xav kom yuav tau qhia kom tej neeg paub txog tus mob no thiaj tiv thaiv tau, los yog kom mus ntsib kws kho mob thiab txheeb thaum ntxov, thiab kom kub siab txog tus mob no ua ntej yuav lig dhau heev lawm.
Mloog tau ntau yam xov xwm txog kab mob plawv thiab hlab plawv tau raws li hauv qab no:
READ MORE
Kab mob plawv
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.
