Zwj thaj tim 26 lub 5 hlis ntuj ces yog hnub tsoom hwv Australia tau los thov txim rau tej kev txhaum txheej tau ua rau Australia cov keeb cag neeg yav dhau los (National Sorry Day).
Lub plua National Reconciliation Week pib txij tim 27 lub 5 hlis ntuj txog tim 03 lub 6 hli ntuj no, yeej tau muaj tej koom txoos ntau yam rau tej neeg koom thiab xyoo no yuav los qhia txog Australia tej keeb cag neeg cov keeb kwm dhau los rau sawv daws tau kawm kom tej kev txhaum txheej uas tsoom hwv Australia tau ua rau Australia cov keeb cag neeg, kom thiaj li yuav los sib kho kom muaj kev sib haum xeeb koom ua ib haiv neeg ntawm lub teb chaws Australia no txuas ntxiv rau lub neej pem suab.
Nom tswv zos Paramatta yog ib lub zos ntawm nroog nyob sab hnub poob ntawm nroog Sydney tau coj ntau cov chij mus txho rau thiab txo chij ib nrab coj los ua cov kev cam hwm thiab tu siab rau tej xwm txheej uas tsoom hwv Australia yav nram ntej ub tau muab Australia tej keeb cag neeg cov me nyuam faib thiab tshem cai tawm ntawm lawv tsev neeg coj mus rau cov neeg Euopean tu.
Greg Simms uas yog ib tug coj ntawm Australian cov keeb cag neeg ntawm lub zos no hais tias "Kuv tsis xav tau cov kev thov txim, tab sis kuv xav kom tej neeg los lees paub tias tau muaj xwm txheej dab tsi tau tshwm sim rau ntawm peb lub teb chaws Australia no yav dhau los xwb."
Nws kuj tau hais ntxiv tias yuav tsum tau los cob qhia kom tej neeg paub txog tej hais no.
"Peb yuav tsum tau los kawm kom paub, tsis yog yuav thaub qab tab sis yuav pab kom peb ua tau lub neeg txuas ntxiv rau yav tom ntej xwb. Vim tag nrho tej neeg dawb nyob ntawm lub teb chaws tam sim no yeej yog ib feem ntawm peb lub teb chaws Australia no thiab. Peb yuav tsis cai tias yog cov neeg dub los yog neeg dawb dab tsi, vim peb sawv daws yeej yog neeg tib tug neeg tib yam xwb, txawm tej neeg yuav xav li cas los xij," raws li Greg Simms tau hais.
Koj mloog tau zaj xov xwm txog National Reconciliation Week ntawm no
Patrick Dodson, ces yeej tau ua ib tug coj rau Australia cov keeb cag neeg ntau lub koom haum, thiab tam sim no nws yog ib tug nom senator ua hauj lwm hauv tsev tsoom hwv Australia, thiab yog ib tug ntawm ntau tus neeg Australian Aboriginal and Torres Strait Islanders uas tau los tawm tsam kom muaj ib lub suab sawv cev rau lawv nyob hauv Australia lub tsev tsoom hwv. Nws tau qhia rau Australia lub chaw nthuav xov xwm Australian Broadcasting Corporation (ABC) tias:
"Yog yus pheej ua nruj ua tsiv thiab hais lus phem nrog tsoom fwv ces lawv yeej xav muab yus ua ntia tseg li tau tshwm sim rau yav tag los xwb. Yog li peb tej tsoom theej tswj thiaj yuav tsum tau los xyuas kom tsim tau ib yam dab tsi teev tseg rau tej txhooj cai tswj haiv kom peb cov keeb cag neeg muaj ib lub suab sawv cev rau hauv Australia lub tsev tsoom hwv thiab."
Jeremy Donovan uas yog Australia ib tug neeg paub txuj paj nruag los yeej pom zoo tias yuav tsum tau los qhia txog tej keeb kwm tau tshwm sim rau Australia tej keeb cag neeg ua raug lwm haiv neeg tuaj nam nias txeeb tswj hwm tsub muaj tsim txom thiab tsim kev piam sij puas ntsoog rau lawv los tau 200 xyoo no rau neeg Australia paub.
"Vim kev muaj peev xwm los qhia rau lwm tus neeg Australia kom paub txog tej xwm txheej no yam tsis ua rau rau lawv mloog tau tias lawv yog tus txhaum dab tsi thaum peb tham txog tej xwm txheej tsub muj tsim txog tua Australia tej keeb cag neeg npog nroj ntsuab, thiab tham txog phaum neeg uas raug nom tswv muab txeeb coj mus tu yog tej yam tseem ceeb. Vim rau qhov peb khaws tej keeb kwm no los ntev dhau thiab ntsawv peb siab heev li lawm uas peb tsis muaj peev xwm yuav nyiaj ntxeem tau ntxiv mus lawm. Peb xav kom pej xeem Australia tso tseg lawv txoj kev ua txuj xav tias kom peb kav tsij hnov qab txog tej xwm txheej no vim twb ntev dhau heev los lawm no tseg. Tab sis xav kom lawv yuav tsum lees tias yeej yog ib feem ntawm peb tej keeb kwm uas tsim nyog yuav tau qhia rau pej tej pej xeem Australia nrog paub thiab," raws li Donovan tau hais.#
Mloog tau xov xwm ua lus Hmoob ntxiv tau rau ntawm www.sbs.com.au/hmong ob hnub xws li hnub zwj Teeb (Thursday) 6pm AEDT-Australian Eastern Standard Time thiab hnub zwj Hnub (Sunday) 11 am AEDT.
Dwnload tau SBS Radio App tau ntawm App Store https://apple.co/2pLgvCX thiab ntawm Google Play http://bit.ly/2GuIRv nruab rau koj lub xov tooj ntawm tes kom koj mloog tau xov tooj cua SBS Radio Hmong Progran li hais los saum toj no.
Koj tseem muaj peev xwm download tau tej xov xwm kaw ua suab (Podcasts) ua lus Hmoob thiab lus Askiv tau ntawm www.sbs.com.au/podcasts/yourlanguage/hmong.
Ntxiv ntawd ho koom ua tub koom siab thiab koom mloog tau tau ntawm #SBSHmong lub Facebook page www.facebook.com/sbshmong tau thiab mloog tau SBS Radio cov xov tooj cua ntawm ntau thaj chaw thoob plaws teb chaws Australia no tau ntawm no https://www.sbs.com.au/radio/radiofrequencies?cid=trending.
