Giridharan Sivaraman uas yog tus coj Australia lub koom haum Race Discrimination Commssioner hais tias 'Peb yeej muaj tej tswv yim los daws tej xwm txheej faib cais ntxub ntxaug lwm tsav neeg lawm tsuas yog tias tsoom fwv yuav tau kub siab nqes tes los pab daws tej xwm txheej no xwb'.
Nws thiaj tau hais tej lus no rau lub caij uas tau muaj tej xwm txheej faib cais ntxub ntxuas lwm tsav neeg ntau tuaj ntxiv, uas lub koom haum Australian Human Rights Commission cov hauj lwm Seen and Heard yeej muaj lub hom phiaj yuav los dws tej xwm txheej no txij li tom qab tau muaj tej xwm txheej Hamas tua Israel ces thiaj tau muaj tsov rog Israel-Hamas kub ntxhov rau cheeb tsam Middle East lawm.
Txij tim tim 7 lub 10 hli ntuj xyoo 2023 los uas Hamas tua foob pob rau sab qab teb teb chaws Israel ua rau neeg Israeli tas sim neej coob tshaj 1,200 tus ces thiaj ua rau muaj tsov rog Israel-Hamas uas tam sim no twb ua rau muaj tej pej xeem neeg Palestinian tas sim neej tshaj 60,000 tus lawm raws li nom tswv tswj dej num kho mob ntawm Gaza tau qhia.
Mr Sivaraman thiaj tau hais kom tsoom fwv teb chaws Australia npaj ib co tswv yim los daws tej xwm txheej no li kom ua raws 63 cov kev taw qhia uas lub koom haum National Anti-Racism Framework taw qhia kom ua 9 hli dhau los.
Tsis tas li ntawd los nws kuj hais ntxiv tias tsoom fwv tej tswv yim daws tej xwm txheej no tau ua rau tej zejzog tib los sib tawm tsam.
''Tej tsov rog ntawm Gaza tau ua rau muaj tej xwm txheej tawm tsam tsis nyiam neeg Jews, neeg Arab, neeg Palestinian thiab tsis nyiam tej neeg ntseeg kev cai Islam ntau tuaj ntxiv yam txaus txhawj xeeb heev lawm.''
''Zoo li yeej tsis muaj cov kev lees paub tej neeg Jews uas raug Hamas tua tuag rau hnub tim 7 lub 10 hli ntuj (2023) thiab zoo li yeej tsis muaj cov kev kub siab txog tej pej xeem 60,000 tus ntawm Gaza uas tau tas sim neej li.''
Limtiam dhau los thawj pwm tsav Anthony Albanese thiaj tau hais tias ''Peb yuav tsis cia kom muaj tej kev tawm tsam faib cais tsis nyiam neeg Jews los yog tsis nyiam tej neeg ntseeg kev ntseeg Islam. Peb lub teb chaws yuav tsis pub muaj cov kev sib ntxub. Thiab peb tsis xav kom muaj cov kev tsis haum xeeb ntawm peb lub teb chaws no.''
Mr Sivaraman hais tias tsi tsim nyog peb tsis kub siab txog tej xwm txheej tshwm sim txawv teb chaws thiab, 'vim yeej tsim nyog peb kub siab txog tej xwm txheej phem lim hiam rau tib neeg tsis yuav tshwm sim rau qhov twg li.'
Bilal Rauf uas yog tus coj lub koom haum Australian National Immams Council thiaj hais tias ''Cov kev pheej hais rau ib tug twg tias tej xwm txheej tshwm sim txawv teb chaws yuav tsis muaj teeb meem rau nws yog tej yam tsis muaj tseeb thiab tsis muaj kev hlub tshua txog lwm tus li.''
Rauf thiaj xav kom yuav tau ua raws li ntau caum cov kev taw qhia uas tau hais kom tsoom fwv ua.
Nws hais ntxiv tias ''Tam li yog ib lub teb chaws ces tsuas nyog ntawm seb peb yuav sib pab los yog sib tawg tswj xwb, seb yuav koom npoj los sib cais xwb, vim rau qhov zoo li tej nom tswv tam sim no los tej tsoom fwv tsuas pab ib pawg neeg twg xwb tab sis ho tsis kub siab txog lwm pawg neeg, ces thiaj pom tias tsi tau txais txiaj ntsim rau peb sawv daws los yog tsis pov puag peb sawv daws thiab tsis lees paub tej xwm txheej uas peb raug teeb meem los yog raug kev tsim txom.''
Thiab Mr Sivaraman uas yog tus coj lub koom haum Race Discrimination Commissioner thiaj tau hais tias ''tsis yog pheej pab ib lub zejzog twg tab sis hos tsis pab lwm lub. Vim lub tswv yim no yuav pab tsis tau ib tug twg. Rau qhov zoo li tsis kub siab txog, tsis paub tsis pom txog tej neeg uas tab tom raug teeb meem thiab tsis lees paub qhov tseeb. Tej no thiaj ua rau zejzog tsis muaj kev ntseeg siab rau tsoom fwv thiab tej zejzog tsis muaj cov kev sib ntseeg siab.''
Txawm li cas los Peter Wetheim uas yog tus tswj lub koom haum Council of Australian Jewry los kuj hais tias tej zejzog yog cov ua rau muaj kev sib tawg tswj.
''Tsoom fwv yeej ua txhua yam raws li qhov nws muaj peev xwm ua. Tab sis vim tej zejzog muaj cov kev xav sib txawv ces thiaj muaj tej xwm txheej no. Tej no tsis yog tsoom fwv ua, tab sis yog tshwm sim ntawm ntiaj teb tej xwm txheej tsis yog tej yam pheej yuav tib tsoom fwv. Yog tej yam tej zejzog yuav tau daws thiab tsoom fwv yuav tau pab.''
Uas nws yeej pom zoo nrog tej tswv yim yuav los daws tej xwm txheej faib cais ntxub ntaug ntawm Australia tab sis yuav tsum yog tej zejzog nrog koom daws tej teeb meem no, thiab ''yuav tau daws ntawm lub chiv keeb hauv paus tuaj.''
Txawm li cas los tsoom fwv teb chaws tej nom kuj tsis kam tawm tswv yim dab tsi los yog qhia ib co ncauj lug dab tsi txog tej no rau lub caij SBS News nthuav zaj xov xwm no tawm.
