ဖဲအပူၤကွံာ်တယံၤဒ်ဘၣ် တၢ်ဃိထံသ့ၣ်ညါဖဲ ပှၤဃ့လီၢ်အိၣ်ကဒုဒီး ပှၤဘၣ်ကီဘၣ်ခဲလၢအမ့ၢ် LGBTQIA+ သ့ၣ်တဖၣ်အကျါန့ၣ်, န့ဆၢၣ်န့ၣ် တၢ်သူတ့ၢ်အီၤအတမ့ၢ်ထဲလၢ တၢ်ထံၣ်အိၣ်ဖှိၣ်သကိးအလီၢ်တခါဘၣ်, နီၣ်နီၣ်တခီ မ့ၢ်ဝဲဒၣ် ခိၣ်ဃၢၤန့ဆၢၣ်တတီၤ, လၢပှၤနုာ်လီၤပၣ်ဃုာ်ဖဲတၢ်ဃိထံသ့ၣ်ညါအပူၤသ့ၣ်တဖၣ် တူၢ်ဘၣ်ဒ်သိး အအိၣ်ဒီး တၢ်ပူၤဖျဲး ဒီးတၢ်သံကွၢ်သံဒိး မ့တမ့ၢ် တၢ်စံၣ်ညီတဲာ်အီၤသ့ၣ်တဖၣ်တအိၣ်ဘၣ်န့ၣ်လီၤ.
ဖီးခးစ်တၢ်ကလုၢ်အဂုၤအဂၤသ့ၣ်တဖၣ်: https://www.sbs.com.au/language/ karen/ kar/collection/podcast/0ms9u5vjn
Ian Seal မ့ၢ်ဝဲဒၣ် Many Coloured Sky တၢ်ကရၢကရိ ပှၤပၢဆှၢရဲၢ်ကျဲၤတၢ်အခိၣ်, လၢအမ့ၢ် တၢ်ကရၢကရိတခါလၢအဆီၣ်ထွဲမၤစၢၤ ပှၤဘၣ်ကီဘၣ်ခဲဒီးပှၤဃ့လီၢ်အိၣ်ကဒု ဖဲမဲလ်ဘၢအပူၤ လၢအမ့ၢ် LGBTQIA+ ဖဲမဲလ်ဘၢအပူၤသ့ၣ်တဖၣ်န့ၣ်လီၤ. အဝဲတဲဘၣ် SBS Examines လၢ တၢ်အိၣ်သယုၢ်သညီန့ၣ် မ့ၢ်ဝဲတၢ်ကီတၢ်ခဲဖးဒိၣ်တမံၤ ဖဲပှၤတဝၢအံၤအပူၤန့ၣ်လီၤ.
အဝဲစံးဝဲဒၣ်, “ပှၤကညီလၢ အဝဲသ့ၣ်အနီၣ်ကစၢ် လုၢ်လၢ်ဆဲးလၤအထူအထံးအပူၤန့ၣ် မ့ၢ်ပှၤလၢ အဝဲသ့ၣ်တူၢ်ဘၣ် တၢ်ပူၤဖျဲးအိၣ်စှၤကတၢၢ်ဒီး တၢ်ဘျးစဲဒီးအဝဲသ့ၣ်အိၣ်စှၤကတၢၢ်, ခီဖျိလၢအဝဲသ့ၣ်န့ၣ် မ့ၢ်ဝဲလုၢ်လၢ်ဆဲးလၤတခါအခၢၣ်စး လၢပှၤကညီသ့ၣ်တဖၣ် ဘၣ်ဃ့ၢ်ထီၣ်ကွံာ်န့ၣ်လီၤ.”
“ပှၤတဝၢဖိအါဒံအါဂၤန့ၣ် တဲဘၣ်ဃး အဝဲသ့ၣ်ဘၣ်မၤတၢ်ဆၢတဲာ်တၢ်ခံမံၤအဘၢၣ်စၢၤ, မ့ၢ်ယကဆဲးအိၣ်ဘျးစဲဒီးယလုၢ်လၢ်ဆဲးလၤဒီးယထူယထံး, ဒီးယဟံၣ်ဖိဃီဖိဒီး ယပှၤတဝၢဧါ? မ့တမ့ၢ်ဘၣ်တခီ, ယကဘၣ်ဃုတၢ်လီၢ်တတီၤ ဖဲ LGBTIQ+ အိၣ်ဆိးအပှၤတဝၢအပူၤဧါ?”
Mim မ့ၢ်ပှၤလၢအအိၣ်ဟဲန့ၢ်လၢ ဘံယၢၢ်နါ ကီၢ်ဒီး ဟဲသုးအိၣ်ဆိးဝဲဖဲအီစထြ့လယါကီၢ် လၢအပူၤကွံာ် ၁၁နံၣ်အခါဒီး အဝဲဟဲတုၤအီစထြ့လယါကီၢ်ဝံၤန့ၣ် ဘၣ်ဟးဃုစ့ၢ်ကီးဝဲကျဲန့ၣ်လီၤ.
အဝဲတဲဘၣ် SBS Examines လၢ, “ဖဲန့ၣ်အခါန့ၣ်, ယမဲာ်ဆှးသ့သပှၢ်ဒီး ယသ့ဒၣ်အဲကလံးကျိာ်တစဲးဖိ. အါတက့ၢ်န့ၣ်ယအိၣ်ဖဲ ပပှၤဘံယၢၢ်နါ အပှၤတဝၢအပူၤ. ပာ်ခူသူၣ်စ့ၢ်ကီး ယမုၢ်ခွါတၢ်တူၢ်ခီၣ်ပာ်သးအတၢ်ပနီၣ်ဒီး ယနီၣ်ကစၢ်အတၢ်က့ၣ်ပနီၣ်န့ၣ်လီၤ.”
Mim ဃုာ်ဒီးပှၤအဂၤ ၃၆ဂၤ ဘၣ်တၢ်ကွဲးမုာ်အီၤလၢ ကနုာ်လီၤပၣ်ဃုာ်ဖဲ ပှၤဘၣ်ကီဘၣ်ခဲဒီး ပှၤဃ့လီၢ်အိၣ်ကဒု LGBTQIA+ န့ဆၢၣ်တၢ်ရဲၣ်တၢ်ကျဲၤအပူၤ လၢအယံၤဝဲဒၣ် ၈နွံန့ၣ်လီၤ.
ပှၤပၣ်ဃုာ်ဖဲတၢ်ရဲၣ်တၢ်ကျဲၤအပူၤသ့ၣ်တဖၣ် ဟးကွၢ်ကီသကိးထိၣ်ဖိလံၣ်ဖိ, ဟ့ၣ်နီၤလီၤအီၣ်ကိးတၢ်အီၣ် ဒီး က့ၤကွၢ်ကဒါ တၢ်ဟးဆူတၢ်ချၢအတၢ်တူၢ်ဘၣ်သ့ၣ်တဖၣ်, ဟးဝ့ၤဝီၤဖဲပီၣ်လဲၣ်ကၢၢ်နံၤမဲးမုၢ်ခိၣ်, ဒီး သူၣ်တၢ်ဖျးတၢ်ဖဲကရၢၢ်ပူၤန့ၣ်လီၤ.
ပှၤဃိထံသ့ၣ်ညါတၢ်အခိၣ် Nerkez Opacin တဲဘၣ်ဝဲ SBS Examines တၢ်ရဲၣ်တၢ်ကျဲၤလၢ, မ့ၢ်လၢတၢ်ရဲၣ်တၢ်ကျဲၤအံၤအဃိန့ၣ်, ပှၤလၢအနုာ်လီၤပၣ်ဃုာ်သ့ၣ်တဖၣ် တူၢ်ဘၣ်တၢ်အိၣ်သယုၢ်သညိ စှၤလီၤဝဲဒၣ်ဒီး မၤအါထီၣ် အဝဲသ့ၣ် တၢ်ဘျးစဲလိာ်သးဒီးန့ဆၢၣ်န့ၣ်လီၤ.
“န့ဆၢၣ်န့ၣ် မၤစၢၤတၢ်မၤဘၣ်လိာ်တၢ်လၢခံခီယၢ်ပၤအဂီၢ်, လၢတၢ်ဘျးစဲလိာ်အသးအဂီၢ်န့ၣ် အတအိၣ်ဒီးတၢ်စံၣ်ညီတဲာ်ဘၣ်.”
Mim စံးဝဲဒၣ် တၢ်ရဲၣ်တၢ်ကျဲၤအံၤ မ့ၢ်ဝဲကျိၤကျဲကပုာ်လုာ်တခါ လၢအဝဲသ့ၣ် ကထံၣ်လိာ်ဘျးစဲဒီးပှၤကညီသ့ၣ်တဖၣ်န့ၣ်လီၤ.
“န့ဆၢၣ်န့ၣ်အကူစါယါဘျါတၢ် ... ယတူၢ်ဘၣ်လၢယအိၣ်ပှဲၤဒီးတၢ်မုာ်တၢ်ခုၣ်.”
တၢ်ပာ်ဖျါအံၤမ့ၢ်ဝဲဒၣ် SBS Examines တၢ်ရဲၣ်တၢ်ကျဲၤ, လၢပဃုသ့ၣ်ညါဘၣ်ဃး န့ဆၢၣ်န့ၣ် အမၤစၢၤဒုးစှၤလီၤ တၢ်အိၣ်သယုၢ်သညိသ့ဒ်လဲၣ်အဂ့ၢ်န့ၣ်လီၤ.
