တၢ်ဆီၣ်ထွဲပှၤဂ့ၢ်ဝီပှၤသုးလီၢ်အိၣ်ဆိးဒီးမုၢ်ကျိၤဝဲၤကွာ်တၢ်န့ၢ်ဘျုးလၢတၢ်တမုၢ်လၢ်ပာ်အီၤဘၣ်တဖၣ်

ဖီးခးစ်တၢ်ကလုၢ်အဂုၤအဂၤသ့ၣ်တဖၣ်: https://www.sbs.com.au/language/ karen/ kar/collection/podcast/0ms9u5vjn

ဖဲလၢ ထးလံးဘၤ နုာ်လီၤပၢန့ၢ်အဝဲအဝ့ၢ်ဒီး ဆီတလဲကွံာ်အဝဲတၢ်အိၣ်မူအခါန့ၣ် ဟးကၤမး မ့ၢ်ဒံးဒၣ်သးစၢ်မုၢ်ဖိတဂၤန့ၣ်လီၤ.

“တၢ်အိၣ်သးန့ၣ်အၢသီဒိၣ်မးဒီး ပဘၣ်အိၣ်ဖဲ ထးလံးဘၤ ပှၤဖီၣ်စုကဝဲၤအတၢ်ပၢအဖီလာ်, လၢပဘၣ်အိၣ်ကးတံၢ်ဃာ်သးဖဲဟံၣ်ပူၤန့ၣ် ယံၤဝဲနွံနံၣ်ဃၣ်ဃၣ်န့ၣ်လီၤ. မ့ၢ်ဝဲတၢ်သ့ၣ်နီၣ်လၢအလီၤအသးအုးဒိၣ်မးန့ၣ်လီၤ.”

ပှၤခဲၣ်တၢ်ဂီၤဖိ, ပှၤကွဲးလံာ်ဖိဒီး ပှၤဂဲၤလိာ်တၢ်လၢ ပှၤဘၣ်ကီဘၣ်ခဲအဂီၢ်တဂၤအံၤ ဟဲဆူအီစထြ့လယါကီၢ် ဃုာ်ဒီး အဒီပုၢ်ဝဲၢ်သၢဂၤ ဖဲအဝဲသးနံၣ်အိၣ် ၂၃နံၣ်အခါန့လီၤ.

အဝဲဟဲတုၤအခါန့ၣ် အိၣ်ဝဲဒီးတၢ်မုၢ်လၢ်ကွၢ်စိ တၢ်မံမီၢ်သ့ၣ်တဖၣ်ဒီး တၢ်သူၣ်ဆူၣ်သးဆူၣ် လၢတၢ်မၤလိ တၢ်ကူၣ်ဘၣ်သ့, နာ်သက့ အတၢ်လဲၤကျဲန့ၣ် တမ့ၢ်တၢ်လၢ အညီကဒၣ်ဖိဘၣ်.

ဟးကၤမးအံၤ ကတိၤအဲကလံးကျိာ်တဘၣ်ဘၣ်အမဲာ်ညါ တသ့ၣ်ညါစ့ၢ်ကီးဝဲပှၤနီတဂၤဘၣ်.

“တၢ်မၤလိကျိာ်အဂီၢ်မ့ၢ်ဂ့ၤ, တၢ်ဖံးတၢ်မၤလၢအဲၣ်ဒိးမၤအီၤသ့ၣ်တဖၣ်ဃုမၤန့ၢ်အီၤကန့ၢ်အဂီၢ်မ့ၢ်ဂ့ၤ, ပှၤကရၢကရိအံၤအပူၤ ယတၢ်ခွဲးတယာ်အိၣ်ဒ်လဲၣ်န့ၣ် ကသ့ၣ်ညါဘၣ်အီၤအဂီၢ်မ့ၢ်ဂ့ၤ, ဒီးတၢ်ဆီၣ်ထွဲမၤစၢၤမနုၤသ့ၣ်တဖၣ်အိၣ်လဲၣ်န့ၣ် ကသ့ၣ်ညါဘၣ်အီၤအဂီၢ် တၢ်ကီတၢ်ခဲသ့ၣ်တဖၣ်အိၣ်ဝဲ ဒီး ဘၣ်ကျဲးစၢးထဲးဂံၢ်ထဲးဘါ သပှၢ်ပှၢ်န့ၣ်လီၤ. ဘၣ်ဃးတၢ်သ့ၣ်တဖၣ်အံၤန့ၣ် ယတသ့ၣ်ညါဘၣ်သူၣ်ပာ်သးဘၣ်အီၤနီတခါဘၣ်.”

ဖဲန့ၣ်အလီၢ်ခံ အဝဲဘၣ်ကွၢ်ဆၢၣ်မဲာ်စ့ၢ်ကီး တၢ်တာ်တၢ် တၢ်ကီတၢ်ခဲ လၢအဘၣ်ဃး တၢ်ဃုမၤန့ၢ်ဟံၣ်ဃီ, တၢ်ကူၣ်ဘၣ်ကူၣ်သ့, ဒီး ဝဲၤကျိၤလၢအရ့ဒိၣ်ဒီး အလီၢ်အိၣ်လၢတၢ်ဘၣ်သူအီၤသ့ၣ်တဖၣ် လၢအမ့ၢ်ဒ်သိး တၢ်အိးထီၣ်စ့တၢးစရီ, တၢ်မၤန့ၢ် မဲဒံၢ်ခဲ, ဒီး တၢ်ဒိးန့ၢ်ဘၣ် Centrelink — ပဒိၣ်ပှၤဂ့ၢ်ဝီတၢ်ဆီၣ်ထွဲမၤစၢၤဝဲၤကျိၤ, လၢအမ့ၢ်သနူကျိၤကျဲတခါ လၢတၢ်ပာ်လီၤပာ်အီၤဒ်သိး ကမၤစၢၤအီၤလၢ တၢ်ဃုမၤန့ၢ် တၢ်ဖံးတၢ်မၤအဂီၢ်န့ၣ်လီၤ.

“ယနီၣ်ဘၣ်ဒံး, ဖဲန့ၣ်အခါန့ၣ်, အဝဲဃုန့ၢ်ယၤတၢ်မၤတခါ, ယတၢ်မၤလီၢ်ဒီး ဆ့ၣ်ဒနံၤယအိၣ်တၢ်လီၢ်န့ၣ် ယဘၣ်လဲၤအီၤ သၢနၣ်ရံၣ်ကျဲ, လၢကမၤဘၣ်တၢ်မၤ — လၢအစးထီၣ်ဖဲဂီၤခီ ၇နၣ်ရံၣ် တုၤ မုၢ်ဃ့ၢ်လီၤ ၁နၣ်ရံၣ်အဂီၢ်န့ၣ်လီၤ.”

လၢတၢ်ဆၢကတီၢ်ယံၤထီၣ်ကွ့ၢ်ကွ့ၢ်အသိး ဟးကၤမး မၤလိဝဲအဲကလံးကျိာ်, ဒီးဖျိထီၣ်ဝဲ ၁၂တီၤ, သူၣ်ထီၣ်ဝဲ အတၢ်အိၣ်မူ ဒ်သိးပှၤသ့ဒွဲလၤပီညါတဂၤအသိး, နာ်သက့ ကနုာ်လီၤမၤန့ၢ်ဘၣ် တၢ်ဆီၣ်ထွဲမၤစၢၤသ့ၣ်တဖၣ်ဒ်လဲၣ်န့ၣ် အဝဲမုၢ်လၢ်လၢ အဝဲသ့ၣ်ညါတ့ၢ်အီၤန့ၣ်လီၤ.

“ဖဲန့ၣ်အခါ ယမ့ၢ်အိၣ်ဒီးပှၤတဂၤ လၢမၤစၢၤယၤဘူးဘူးတံၢ်တံၢ် ဒ်သိးပှၤနဲၣ်လိယၤကျဲတဂၤအသိး မ့တမ့ၢ် ပှၤဆီၣ်ထွဲမၤစၢၤတၢ်ဖိတဂၤအသိးန့ၣ်, ကဒုးအိၣ်ထီၣ်ဝဲတၢ်ဆီတလဲဒိၣ်ဒိၣ်မုၢ်ဒီး ယတၢ်အိၣ်မူ, ဒီး ယမၤလၢပှဲၤထီၣ်ဘးအါထီၣ်ဘၣ် ယတၢ်ပညိၣ်ဖီတၢၣ်သ့ၣ်တဖၣ် မ့တမ့ၢ် ကဲထီၣ်ပှၤလၢအဆူၣ်အကျၢၤဒိၣ်န့ၢ်တၢ်အံၤ, မ့တမ့ၢ်ကဲထီၣ်ပှၤအရ့ဒိၣ်တဂၤလၢယတၢ်အိၣ်မူအဂီၢ်မ့ၢ်ဂ့ၤ, ယပှၤတဝၢအဂီၢ်မ့ၢ်ဂ့ၤ မ့တမ့ၢ် လၢပှၤကရၢကရိအံၤအဂီၢ်မ့ၢ်ဂ့ၤန့ၣ်လီၤ.”

ဖဲလါစဲးပထ့ဘၢၣ် ၈သီ တၢ်ထုးထီၣ်ရၤလီၤ တၢ်ဃိထံသ့ၣ်ညါအသီ အတၢ်ပာ်ဖျါအံၤအပူၤန့ၣ် ထိၣ်ဒွးဝဲ ပှၤကရၢကရိဒီး မုၢ်ကျိၤဝဲၤကွာ်အတၢ်န့ၢ်ဘျုး လၢတၢ်ဒိးန့ၢ်ဘၣ်အီၤခီဖျိ တၢ်ဆီၣ်ထွဲမၤစၢၤ ပှၤဂ့ၢ်ဝီ ပှၤနုာ်လီၤအိၣ်ဆိးဖဲကီၢ်ပူၤအံၤသ့ၣ်တဖၣ်န့ၣ်လီၤ.

Deloitte Access Economics အတၢ်ဃိထံသ့ၣ်ညါအပူၤန့ၣ်, အနံၣ်တဆံအတီၢ်ပူၤ — ၂ဝ၁၃နံၣ်ဒီး ၂ဝ၂၃နံၣ် အဘၢၣ်စၢၤန့ၣ် ဃုထၢမၤန့ၢ်ဝဲ ကရူၢ်တဖုဃီ လၢအအိၣ်ဒီးပှၤအဂၤ ၉,၆၇ဝ အတၢ်ထံၣ်တၢ်ပာ်သးသ့ၣ်တဖၣ်န့ၣ်လီၤ.

တၢ်ပာ်ဖျါအံၤ ဘၣ်တၢ်ဟံးမူဒါရဲၣ်ကျဲၤမၤအီၤလၢ အီစထြ့လယါကီၢ်ပှၤသုးလီၢ်အိၣ်ဆိးကီၣ်ကးကရၢ—Settlement Council of Australia, လၢအရၢခိၣ်န့ၣ်မ့ၢ်ဝဲ Maria Dimopoulos န့ၣ်လီၤ.

“ယဆိကမိၣ် တၢ်ဃိထံသ့ၣ်ညါအံၤ အတၢ်ဂ့ၢ်မိၢ်ပှၢ်န့ၣ်မ့ၢ်ဝဲဒၣ် တၢ်နုာ်လီၤကျဲၤဃူမၤစၢၤတၢ်ဆိဆိန့ၣ် ဘၣ်ဘျးလိာ်အသးဒီး တၢ်န့ၢ်ဘျုး လၢအအိၣ်ဒီးတၢ်ဂံၢ်ဆူၣ်ဘါဆူၣ်သ့ၣ်တဖၣ် လၢအမ့ၢ်တၢ်သူၣ်ထီၣ်န့ၢ်လၢတၢ်ဆၢကတီၢ်အဖီခိၣ်န့ၣ်လီၤ. တၢ်အဝဲန့ၣ်မ့ၢ်တၢ်ဂ့ၢ်ခိၣ်သ့ၣ်န့ၣ်လီၤ. ယဆိကမိၣ် တၢ်နုာ်လီၤကျဲၤဃူမၤစၢၤတၢ်ဆိဆိန့ၣ် အတမ့ၢ်ထဲလၢအဘၣ်ဃးဒီး တနံၤညါအံၤအတၢ်လိၣ်ဘၣ်အဂီၢ်ဘၣ်, မ့ၢ်ဝဲတၢ်လၢ အဒုးအိၣ်ထီၣ်တၢ်ဆီတလဲဒီး တၢ်ကဲထီၣ်သးသ့လၢခဲမုၢ်ဆ့ၣ်အဂီၢ်န့ၣ်လီၤ. အဃိတၢ်သုးလီၢ်အိၣ်ဆိးအဂီၢ် တၢ်ဟ့ၣ်လီၤတၢ်ဆီၣ်ထွဲမၤစၢၤဆိဆိန့ၣ် ကဲထီၣ်တၢ်မၤစၢၤလၢ တၢ်တ့ထုးထီၣ် တၢ်ပီးတၢ်လီဒီးဝဲၤကျိၤတၢ်ဖံးတၢ်မၤသ့ၣ်တဖၣ်အဂီၢ်န့ၣ်လီၤ.”

အဝဲစံးဝဲဒၣ် တၢ်ပာ်ဖျါအံၤ ဒုးနဲၣ်ဖျါဝဲ တၢ်နုာ်လီၤကျဲၤဃူမၤစၢၤတၢ်ဆိဆိ - လၢအမ့ၢ်ဖဲဟဲတုၤသီတနံၣ်အတီၢ်ပူၤန့ၣ် — ဟ့ၣ်လီၤဝဲမုၢ်ကျိၤဝဲၤကွာ်အတၢ်န့ၢ်ဘျုးသ့ၣ်တဖၣ်ဒိၣ်မးန့ၣ်လီၤ.

“တၢ်ဂ့ၢ်ခိၣ်သ့ၣ်တနီၤန့ၣ်ယဆိကမိၣ်မ့ၢ်ဝဲဒၣ်, ပှၤလၢအသူဝဲၤကျိၤတၢ်မၤစၢၤဆိဆိသ့ၣ်တဖၣ် အတၢ်ဒိးန့ၢ်ဘၣ်အါထီၣ်တၢ်ဖံးတၢ်မၤတၢ်နၣ်ရံၣ်, ဒီးအခီပညီမ့ၢ်ဝဲ — အနံၣ် ၁ဝ အတီၢ်ပူၤ ပှၤကညီတဂၤန့ၣ် ဒိးန့ၢ်ဘၣ်အါထီၣ်ဝဲ တၢ်ဖံးတၢ်မၤအဘူးအလဲ ၁၈,ဝဝဝ န့ၣ်လီၤ. ခဲကနံၣ်အံၤ, ပှၤကညီတရူၢ်ဃီအံၤအပူၤ, အတၢ်ဒိးန့ၢ်ဘၣ်အါထီၣ်တၢ်ဖံးတၢ်မၤအဘူးအလဲန့ၣ် အိၣ်ဝဲဒၣ် ဒီလၣ် ၁၃၅ ကကွဲၢ်န့ၣ်လီၤ. အဃိတၢ်မၤန့ၢ်ကျိၣ်စ့သ့ၣ်တဖၣ်အံၤ မ့ၢ်တၢ်မၤဂ့ၤထီၣ် ဟံၣ်ဒူၣ်ဃီဒူၣ် အတၢ်ဘံၣ်တၢ်ဘၢဒီး အဝဲသ့ၣ်န့ၣ် အိၣ်ဝးတရံးအသးဖဲလီၢ်ကဝီၤ မုၢ်ကျိၤဝဲၤကွာ်အပူၤ ဒီး အဝဲသ့ၣ်န့ၣ် မ့ၢ်ပှၤသ့ၣ်တဖၣ်လၢအနုာ်လီၤပၣ်ဃုာ်ဖဲ ပှၤအီစထြ့လယါဖိ တၢ်ဖံးတၢ်မၤလီၢ်အပူၤ လၢအပှဲၤဒီး တၢ်တုၤထီၣ်ထီၣ်ဘးဂ့ၤဂ့ၤန့ၣ်လီၤ.”

တၢ်ပာ်ဖျါအံၤ ဃုထံၣ်ဘၣ်စ့ၢ်ကီးဝဲလၢ ခီဖျိလၢတၢ်ဆီၣ်ထွဲမၤစၢၤအဃိန့ၣ်, ဖဲပှၤတကရူၢ်ဃီအံၤအပူၤန့ၣ် ပှၤမၤတၢ်ဖိလၢ အထီၣ်ဘၣ်တၢ်သိၣ်လိ ဒိးန့ၢ်ဘၣ်လံာ်အုၣ်သးမူးမူးနီၣ်သ့ၣ်တဖၣ်, တနံၣ်အတီၢ်ပူၤ ဟဲအါထီၣ်ဝဲ ၄၂ဝ ဂၤ— အဃိအနံၣ် ၂ဝအတီၢ်ပူၤန့ၣ် ပှၤလၢအဖျိထီၣ်ကၠိတဂၤန့ၣ် မၤန့ၢ်ဝဲတၢ်န့ၢ်ဘျုးအိၣ်အါန့ၢ် ဒီလၣ် ၈ဝ,ဝဝဝ န့ၣ်လီၤ.

ခိၣ်ဒိၣ် ပှၤကွဲးလံာ်ဖိ Rachel Power မ့ၢ်ဝဲ ပှၤပၢဆှၢတၢ်ခိၣ်ကျၢၢ်သဃဲၤတဂၤဖဲ Deloitte Access Economics ကရၢန့ၣ်လီၤ.

အဝဲစံးဝဲဒၣ် တၢ်နုာ်လီၤကျဲၤဃူမၤစၢၤတၢ်ဆိဆိ အတၢ်န့ၢ်ဘျုးန့ၢ်ဖှိၣ်သ့ၣ်တဖၣ်န့ၣ် အိၣ်ဆဲးအသးန့ၢ်ဝဲ လၢနံၣ်ဆံဖှိၣ်အါမးအဂီၢ်န့ၣ်လီၤ.

“ပှၤဟဲတုၤအဆိကတၢၢ်တနံၣ် လၢအမၤန့ၢ်တၢ်မၤစၢၤမ့ၢ်ဂ့ၤ, တမၤန့ၢ်အီၤဘၣ်မ့ၢ်ဂ့ၤ, ဖဲပကွၢ်ဝဲဒၣ်အနံၣ်တဆံအတီၢ်ပူၤ တၢ်အဆၢအိၣ်ဖျါသ့ၣ်တဖၣ်အခါ, ပဆဲးထံၣ်ဘၣ်ဝဲတၢ်ဒိဘၣ်သ့ၣ်တဖၣ်အိၣ်ဒိၣ်ဒိၣ်မုၢ်မုၢ်. ဒီးဆဲးအိၣ်ဝဲန့ၢ်ဖးယံၤဒ်အံၤန့ၣ် မ့ၢ်ဝဲတၢ်ဂ့ၢ်တမံၤလၢ အထုးန့ၢ်ယသးအဒိၣ်ကတၢၢ်န့ၣ်လီၤ.”

ပှၤဂ့ၢ်ဝီတၢ်မၤစၢၤပှၤသုးလီၢ်အိၣ်ဆိး လၢအဟဲနုာ်လီၤကီၢ်ပူၤ ဒီးမၤလိန့ၢ် အဲကလံးကျိာ် ဆိဆိသ့ၣ်တဖၣ် သ့အဲကလံးကျိာ်ဘၣ်ဂ့ၤဒိၣ်ဝဲန့ၣ်လီၤ.

“ဖဲစးထီၣ်သီသီအခါန့ၣ်ပထံၣ်ဘၣ်လၢ ပှၤလၢအသူဝဲၤကျိၤတၢ်မၤစၢၤသီသီသ့ၣ်တဖၣ် ဖဲအသီခါန့ၣ်လိၣ်ဘၣ်ဝဲပှၤကတိၤကျိးထံတၢ်ဝဲၤကျိၤတၢ်မၤစၢၤ, နာ်သက့ တုၤလၢအပှဲၤထီၣ် အနံၣ် ၁ဝ န့ၣ် အဝဲသ့ၣ်လူၤထီၣ် ပှၤလၢအဒ်သိးဒီးအဝဲသ့ၣ်လၢအကတိၤအဲကလံးကျိာ်ဘၣ်သ့ၣ်တဖၣ်အခံချုးဝဲဒၣ်. အဃိန့ၣ် တၢ်အံၤဒုးနဲၣ်အသးလၢအမ့ၢ် တၢ်သုးလီၢ်အိၣ်ဆိး လၢအမၤန့ၢ်ဘၣ် တၢ်ဆီၣ်ထွဲမၤစၢၤဆိဆိန့ၣ် လၢခံန့ၣ် တလိၣ်ဘၣ်လၢၤ တၢ်မၤစၢၤအါအါလၢၤဘၣ်, ဒီး နုာ်လီၤဆူ သနူမိၢ်ပှၢ်အပူၤသ့ဝဲန့ၣ်လီၤ.”

Maria Dimopoulos စံးဝဲဒၣ်တၢ်ဃုထံၣ်သ့ၣ်ညါအံၤ ဒုးနဲၣ်ဖျါထီၣ်ဝဲဒၣ် ပှၤဂ့ၢ်ဝီပှၤသုးလီၢ်အိၣ်ဆိးသ့ၣ်တဖၣ် ပၣ်ဃုာ်ဖဲ တၢ်ဘှါရှဲ တၢ်ကီတၢ်ခဲ လၢအတကွီၣ်ဖးလဲၢ်သ့ၣ်တဖၣ် ဒ်လဲၣ်န့ၣ်လီၤ.

“ဘၣ်ဃးဒီးတၢ်ကူၣ်ဘၣ်ကူၣ်သ့အတၢ်ဃုထံၣ်သ့ၣ်ညါသ့ၣ်တဖၣ်. တၢ်ဃုထံၣ်သ့ၣ်ညါအံၤ တဲဘၣ်ပှၤဘၣ်ဃးဒီး တၢ်ဂ့ၢ်တၢ်ကျိၤလၢ အီစထြ့လယါကီၢ် ဘၣ်ကွၢ်ဆၢၣ်မဲာ်ဒီးတၢ်ကီတၢ်ခဲ ခဲကနံၣ်အံၤအဂ့ၢ် လၢအမ့ၢ် စဲးဖီကဟၣ်တၢ်ဖံးတၢ်မၤလီၢ်, လၢတမၤတသ့တၢ်ဘၣ်မၤအီၤနီၣ်နီၣ်သ့ၣ်တဖၣ်န့ၣ် တၢ်လၢတၢ်ပှဲၤတအိၣ်ဘၣ်, ဖဲပတဲသကိးဘၣ်ဃးတၢ်သူၣ်ထီၣ်အကျိၤအကျဲဒီး တၢ်အိၣ်သးလၢအဂ့ၤတကပၤအခါ, ပှၤမၤတၢ်ဖိလၢအအိၣ်ဒီးတၢ်သ့တၢ်ဘၣ် တအိၣ်လၢပှဲၤဘၣ် ဒီး ပှၤသုးလီၢ်အိၣ်ဆိးအဂ့ၢ်အံၤ ပမ့ၢ်တတၢၣ်ပီၣ်သကိးအီၤ တပူၤဃီဘၣ်န့ၣ် ပကဘၣ်တူၢ်ရှူကွံာ်ဝဲတၢ်ခွဲးတၢ်ယာ်သ့ၣ်တဖၣ်န့ၣ်လီၤ. တၢ်ဆီလီၤအိၣ်ဆိးဝဲၤကျိၤ လၢပမၤအီၤဖဲမုၢ်မဆါတနံၤအံၤန့ၣ် မ့ၢ်တၢ်ဟ့ၣ်လီၤပၣ်ဃုာ်မၤတၢ် အိၣ်ဒီးတၢ်တုၤထီၣ်ထီၣ်ဘးဂ့ၤဂ့ၤ လၢခါဆူညါ မုၢ်ကျိၤဝဲၤကွာ် တၢ်ဂုၤထီၣ်ပသီထီၣ်အဂီၢ်န့ၣ်လီၤ.”

ဖဲအပူၤကွံာ်တလါန့ၣ်, ကီၢ်စၢဖှိၣ်ပဒိၣ် အၢၣ်လီၤဝဲလၢ အကကၢၤဃာ်ဝဲ တၢ်တူၢ်လိာ်ပှၤဂ့ၢ်ဝီ ပှၤသုးလီၢ်အိၣ်ဆိး အတၢ်ရဲၣ်ကျဲၤ လၢအမ့ၢ် တနံၣ်န့ၣ် ကတူၢ်လိာ်ဝဲ ပှၤကညီအဂၤ ၂ဝ,ဝဝဝ န့ၣ်လီၤ.

Maria Dimopoulos စံးဝဲဒၣ် လၢကဆီၣ်ထွဲမၤစၢၤ တၢ်ဆီလီၤအိၣ်ဆိး ဝဲၤကျိၤသ့ၣ်တဖၣ်အဂီၢ် ကျိၣ်စ့တၢ်မၤစၢၤန့ၣ် မ့ၢ်ဝဲတၢ်အရ့ဒိၣ်တခါ လၢကထုးကွံာ် တၢ်တြီတံာ်တာ်လၢတၢ်တ့ထုးထီၣ်တၢ်အဂီၢ် ဒီး ပှၤကညီသ့ၣ်တဖၣ်အတၢ်နုာ်လီၤပၣ်ဃုာ်အဂီၢ်န့ၣ်လီၤ.

“ယဆိကမိၣ် တၢ်ဂ့ၢ်ခိၣ်သ့ၣ်လၢအမ့ၢ် တၢ်အိၣ်ဒီးတၢ်ဘျးစဲဆိဆိ အလုၢ်အပှ့ၤန့ၣ်မ့ၢ်ဝဲ မုၢ်ကျိၤဝဲၤကွာ်အတၢ်ဘျးစဲတခါန့ၣ်လီၤ. အဃိတၢ်ဖံးတၢ်မၤ အတၢ်အဆၢအိၣ်ဖျါထီၣ်န့ၣ် ဒိးသန့ၤထီၣ်အသးလၢ တၢ်မၤလိသ့သးလၢအဲကလံးကျိာ်န့ၣ်လီၤ. အဝဲသ့ၣ်န့ၣ် ဒိးသန့ၤအသးဒီး တၢ်ဆီၣ်ထွဲမၤစၢၤလၢအဘၣ်ဃးဟံၣ်ဃီ, ဒီး မ့ၢ်ဝဲတၢ်နဲၣ်ကျဲလၢ ကနုာ်လီၤဘၣ်ဆူ တၢ်ကရၢကရိသ့ၣ်တဖၣ်အပူၤန့ၣ်လီၤ. တၢ်အဝဲအံၤန့ၣ် မ့ၢ်ဝဲတၢ်လၢ ပှၤသုးလီၢ်ဆီလီၤ အပှၤမၤစၢၤတၢ်ဖိ မၤစၢၤအီၤသ့, ဃုသ့ၣ်ညါမၤလီၤတံၢ်ဝဲ တၢ်တြီတံာ်တာ်သ့ၣ်တဖၣ်, အိၣ်ဒီးတၢ်မၤစၢၤခံခီယၢ်ခီ, ဒီး ဆဲးကျိးန့ၢ်ပှၤကညီတဂၤန့ၣ် ဒီး တၢ်ဆီၣ်ထွဲမၤစၢၤလၢ အဘၣ်လိာ်သးဒီးအီၤသ့ၣ်တဖၣ်န့ၣ်လီၤ.”