ကရ့ၣ်နံၣ် ပှၤဘၣ်ကီဘၣ်ခဲလီၢ်လံၤ စီၤဆၣ်ဘျုးထူခိ တၢ်မုၢ်လၢ်လၢကသူၣ်ထီၣ်ဖျၢၣ်ထူကရၢလၢအပှၤတဝၢအဂီၢ်

အဝဲတၢ်လိာ်ကွဲဖျၢၣ်ထူအံၤမ့ၢ်စးထီၣ်အသးဖဲကီၢ်ပယီၤဒီးကၠီၣ်တဲၣ်ကီၢ်ဆၢ ပှၤဘၣ်ကီဘၣ်ခဲဒဲကဝီၤအပူၤနာ်သက့ ခဲကနံၣ်အံၤန့ၣ် အဝဲကဲထီၣ်ဘၣ် ပှၤဘၣ်မူဘၣ်ဒါတဂၤလၢ အကရၢကရိရဲၣ်ကျဲၤန့ၢ် ပှၤတဝၢ တၢ်လိာ်ကွဲအမူးသ့ၣ်တဖၣ် ဒီးတကးဒ်ဘၣ် အနီၣ်ကစၢ်ဒၣ်ဝဲန့ၣ် နုာ်လီၤလိာ်ကွဲဝဲဒၣ်ဖျၢၣ်ထူဖဲ Wyndham FC (Wyndham Football Club) အပူၤန့ၣ်လီၤ.

---

အဝဲအနီၣ်ကစၢ်ဒၣ်ဝဲ မ့ၢ်ဘၣ်ပျၢ်ကွံာ် တၢ်ခွဲးတၢ်ယာ်သ့ၣ်တဖၣ်နာ်သက့ အဝဲကျဲးစၢးဒုးအိၣ်ထီၣ်ဝဲဒၣ်တၢ်ခွဲးတၢ်ယာ်လၢ အပှၤတဝၢ လီၤဆီဒၣ်တၢ်ပှၤသးစၢ် လၢအအဲၣ်တၢ်လိာ်ကွဲဖျၢၣ်ထူသ့ၣ်တဖၣ်အဂီၢ်န့ၣ်လီၤ.

စီၤဆၣ်ဘျုးထူခိ လိာ်ကွဲဖျၢၣ်ထူဖဲပှၤတဝၢတၢ်လိာ်ကွဲတခါအပူၤ Source: Hsa Blu Htoo Ko

တၢ်ခွဲးတၢ်ယာ်အါမးမ့ၢ်လဲၤပူၤကွံာ်အီၤဘၣ်ဆၣ် ဒ်သိးပှၤသးစၢ်လၢအအိၣ်ဒီးတၢ်ဂုၤကျဲးစၢးတဂၤအသိး စီၤဆၣ်ဘျုးထူ ဂုၤကျဲးစၢးဝဲတၢ်မၤလိတုၤအဖျိထီၣ်ဝဲဒၣ်ဖၠၣ်စိမိၤ အမဲာ်ညါန့ၣ် အဝဲကျဲးစၢးဃုဝဲဒၣ်ကျဲလၢ ကအိၣ်ဘျၤစဲလိာ်ဒ်အသးဒီးတၢ်လိာ်ကွဲဖျၢၣ်ထူန့ၣ်လီၤ.

အဃိဖဲအဝဲဖျိထီၣ်ဖၠၣ်စိမိၤကၠိဒီး ကဲထီၣ်ကၠိသရၣ် ခံနံၣ်ဘျဲၣ်ဝံၤအလီၢ်ခံအဝဲဃုမၤန့ၢ်ဝဲဒၣ်တၢ်ဖံးတၢ်မၤတခါလၢတၢ်မၤစၢၤပှၤတဝၢအတၢ်လိၣ်ဘၣ်သ့ၣ်တဖၣ်အဂီၢ်န့ၣ်လီၤ.

ခဲကနံၣ်အံၤ အဝဲမ့ၢ်ပှၤမၤသကိးတၢ်ဒီး ဝ့မ်ဒၢၣ်ပှၤတဝၢဒီးတၢ်ကူၣ်ဘၣ်ကူၣ်သ့ဝဲၤလီၢ် (Wyndham Community and Education Centre) ဒ်သိးဒီး တၢ်တိၤကျဲၤမူဒါခိၣ်တဂၤန့ၣ်လီၤ.