ကိးနံၣ်ဒဲးလါမးရှး ၈သီအနံၤန့ၣ် မ့ၢ်ဝဲဒၣ် တၢ်မၤလၤကပီၤ ဟီၣ်ခိၣ်ဒီဘ့ၣ်ပိာ်မုၣ်အမုၢ်နံၤ International Women's Day န့ၣ်လီၤ.
တနံၣ်အံၤတၢ်မၤလၤကပီၤ ဟီၣ်ခိၣ်ဒီဘ့ၣ်ပိာ်မုၣ်အမုၢ်နံၤန့ၣ် အခိၣ်တီမ့ၢ်ဝဲဒၣ် 'Inspire Inclusion' န့ၣ်လီၤ.
တၢ်အံၤအခီပညီမ့ၢ်ဝဲဒၣ် တၢ်မၤလၤကပီၤ တၢ်လီၤလိာ်သးအကလုာ်ကလုာ်ဒီး ဟ့ၣ်စိဟ့ၣ်ကမီၤပိာ်မုၣ်သ့ၣ်တဖၣ် န့ၣ်လီၤ.
ဖဲမုၢ်နံၤလၢတၢ်မၤလၤကပီၤဒီးဟ့ၣ်ဂံၢ်ဟ့ၣ်ဘါ ပိာ်မုၣ်သ့ၣ်တဖၣ် အတၢ်ဖံးတၢ်မၤ အတၢ်မၤသကိး အဆၢကတီၢ်အံၤ ကညီပိာ်မုၣ်ကရၢ ကရၢခိၣ် နီၣ်ကညီဖီစံးဝဲဒၣ် လၢ ကညီတဝၢအပူၤ ပိာ်မုၣ်သ့ၣ်တဖၣ် အတၢ်နုာ်လီၤပၣ်ဃုာ်မၤသကိးတၢ်လၢ ဂံၢ်ခီၣ်ထံးတုၤလၢ ထံရူၢ်ကီၢ်သဲး အပတီၢ် အတၢ်အိၣ်သးန့ၣ် တၢ်ဆီတလဲ ဟဲအိၣ်ထီၣ်တဆံးတက့ၢ် နာ်သက့ လၢတၢ်လဲၤထီၣ်လဲၤထီအဂီၢ် ကဘၣ်မၤတၢ်မၤအိၣ်ဒံးအါမးန့ၣ်လီၤ.
ဖဲကညီတဝၢအပူၤ ကညီတၢ်ပၢၢ်ဆၢတၢ်ဖံးတၢ်မၤအပူၤ ဒ်သိးပိာ်မုၣ်သ့ၣ်တဖၣ် ကသ့ၣ်ညါလီၤက့ၤအဝဲသ့ၣ်ခွဲးယာ်ဒၣ်ဝဲအဂီၢ်မ့ၢ်ဂ့ၤ, ကသ့အိၣ်ဒီးတၢ်ဒီသဒၢလီၤနီၣ်ကစၢ်အသးဒီး အိၣ်တၢ်နာ်န့ၢ်လီၤနီၣ်ကစၢ်အသးဒၣ်ဝဲအဂီၢ်မ့ၢ်ဂ့ၤ, ပိာ်မုၣ်သ့ၣ်တဖၣ်ကနုာ်လီၤပၣ်ဃုာ်အါထီၣ်လၢပှၤတဝၢတၢ်ဖံးတၢ်မၤအပူၤ, ပၣ်ဃုာ်အါထီၣ်ဖဲထံရူၢ်ကီၢ်သဲး တၢ်ဖံးတၢ်မၤတၢ်ဆၢတဲာ်အပူၤအဂီၢ် ကညီမုၣ်ကရၢ ဂုၤကျဲးစၢးမၤဝဲဒၣ်အိၣ်လံနံၣ်ဆံဖှိၣ်အါမးလံန့ၣ်လီၤ.
