၂ဝ၂၄ နယူဆီၣ်သ်ဝံကီၢ်စဲၣ် ပှၤသးစဲလၢပှၤဂ့ၢ်ဝီတၢ်လိၣ်ဘၣ် အတၢ်ဖံးတၢ်မၤ တၢ်ဟ့ၣ်လၤကပီၤခိၣ်ဖးစရီအပူၤန့ၣ် ပၣ်ဃုာ်ဒီး သရၣ် Aung Kyaw Htut Saw လၢအမၤတၢ်ဒ်သိး ပှၤမၤစၢၤပှၤဘၣ်ကီဘၣ်ခဲအပှၤတဝၢ ပှၤမၤတၢ်ဖိတဂၤန့ၣ်လီၤ. အဝဲဖံးတၢ်မၤတၢ်ဒ်သိးပှၤမၤစၢၤပှၤဘၣ်ကီဘၣ်ခဲအပှၤတဝၢန့ၢ်အနံၣ် ၃ဝဘျဲၣ်ဝံၤအလီၢ်ခံ ဒိးန့ၢ်ဘၣ်ဝဲခိၣ်ဖးတၢ်လၤကပီၤအံၤန့ၣ်လီၤ.
သရၣ် Aung Kyaw Htut Saw လၢအမ့ၢ် Bilingual Community Educator ဖဲ Refugee Health, NSW Health Services တဂၤစံးဝဲဒၣ် အဝဲအတၢ်ဖံးတၢ်မၤသ့ၣ်တဖၣ် တၢ်ပာ်ပနီၣ်အီၤအဃိ အဝဲသးခုဒီး တကတီၢ်ဃီန့ၣ် အဝဲပာ်ဒၣ်အသးဒ်အမ့ၢ်ပှၤလၢအမၤတၢ်ဖဲဂံၢ်ထီၣ်ထံးတၢ်ဖံးတၢ်မၤအပူၤတဂၤဒီး တူၢ်လိာ်ဝဲခိၣ်ဖးအံၤပှဲၤဒီး တၢ်ယူၤယီၣ်ပာ်ကဲ ဒီးတၢ်ဆီၣ်လီၤသးန့ၣ်လီၤ.
NSW Humanitarian Award ခိၣ်ဖးတၢ်လၤကပီၤအံၤ ဘၣ်တၢ်ဟ့ၣ်လီၤအီၤလၢ နယူဆီၣ်သ်ဝံကီၢ်စဲၣ်ပဒိၣ်ဒီး ပှၤလၢအကြၢးဒိးန့ၢ်ဘၣ်ခိၣ်ဖးတၢ်လၤကပီၤသ့ၣ်တဖၣ်န့ၣ်ဘၣ်တၢ်ဃုထၢအီၤလၢ Treatment and Rehabilitation of Torture and Trauma Survivors (STARTTS) ဒီး အီစထြ့လယါကီၢ်ပှၤဘၣ်ကီဘၣ်ခဲကီၣ်ကးကရၢ, Refugee Council of Australia (RCOA) န့ၣ်လီၤ. ကရၢ ၂ဖုအံၤဘိးဘၣ်သ့ၣ်ညါလီၤဝဲ ပှၤဒိးန့ၢ်ဘၣ်ခိၣ်ဖးတၢ်လၤကပီၤသ့ၣ်တဖၣ်အမံၤစရီဖဲလါယူၤလံ ၁သီအနံၤန့ၣ်လီၤ
တနံၣ်အံၤ ပှၤလၢအဒိးန့ၢ်ဘၣ် ခိၣ်ဖးတၢ်လၤကပီၤအံၤ အိၣ်ဝဲဒၣ် ၉ဂၤ နာ်သက့ အဝဲသ့ၣ်အတၢ်ဖံးတၢ်မၤအသနၢၣ်သ့ၣ်တဖၣ်လီၤဆီလိာ်အသး, လၢအပၣ်ဃုာ် ပှၤလၢအဖံးတၢ်မၤတၢ် အဂ့ၤကတၢၢ်လၢတၢ်တိၤကျဲၤအဂ့ၢ်, ပနံာ်တၢ်ဖံးတၢ်မၤသနၢၣ်, ပဒိၣ်ဒီးသဲစးဂ့ၢ်ဝီသနၢၣ်, ပှၤဆီၣ်ထွဲမၤစၢၤပှၤဘၣ်ကီဘၣ်ခဲ, ပှၤမၤတၢ်ဖဲခိခိၣ်ဟီၣ်ကဝီၤ, သးစၢၢ်သနၢၣ်, တၢ်လိာ်ခိၣ်လိာ်ကွဲသနၢၣ်သ့ၣ်တဖၣ်န့ၣ်လီၤ.
