KICတၢ်ကစီၣ်အဲးဒံထၢၣ်ခိၣ်ကျၢၢ်ဒိးန့ၢ်ဘၣ်အ့ရှၢၣ်မုၢ်ထီၣ်ကလံၤထံးပိာ်မုၣ်တၢ်တီခိၣ်ရိၤမဲတၢ်ကစီၣ်သန့တၢ်လၤကပီၤခိၣ်ဖး

ဖဲအပူၤကွံာ်တယံၤဒ်ဘၣ်န့ၣ် နါဖီဂ့ၤ လၢအမ့ၢ် ကညီတၢ်ကစီၣ်ဝဲၤလီၢ် ပှၤပၢဆှၢရဲၣ်ကျဲၤတၢ်အခိၣ်ဒိၣ်ဒီး အဲဒံထၢၣ်ခိၣ်ကျၢၢ် ဒိးန့ၢ်ဘၣ်ဝဲဒၣ် Women in News Editorial Leadership Award ခိၣ်ဖးတၢ်လၤကပီၤ လၢအဘၣ်တၢ်ဟ့ၣ်လီၤအီၤလၢ WAN-IFRA WIN တၢ်ကရၢကရိ ဒီး အဝဲဒိးန့ၢ်ဘၣ်ခိၣ်ဖးတၢ်လၤကပီၤအံၤဒ်သိးဒီးအ့ရှၢၣ်မုၢ်ထီၣ်ကလံၤထံးခၢၣ်တဂၤအသိးန့ၣ်လီၤ.

Nan Paw Gay, Director and Editor-in-Chief of the Karen Information Center. Source: SBS Karen.

နါဖီဂ့ၤမ့ၢ်မိၢ်လၢအအိၣ်ဒီးအဖိခံဂၤ နုာ်လီၤမၤသကိးတၢ်ဒီး Karen Information Center - KIC, ကညီတၢ်ကစီၣ်ဝဲၤလီၢ်ဖဲ ၂ဝဝဝနံၣ် အခါလံၤလံၤလံ ဒီး အဝဲဟံးထီၣ်ဖီၣ်ထီၣ်မူဒါလၢတၢ်တီခိၣ်ရိၤမဲတၢ်ကစီၣ်ကရၢအံၤန့ၣ်မ့ၢ်ဝဲဒၣ်ဖဲ ၂ဝဝ၈နံၣ်အခါန့ၣ်လီၤ.

From left to right: Beatrice Bandawe, Managing Editor, The Guardian Limited, Tanzania; Dima Khatib, Managing Director, AJ+, Palestine/Syria; and Nan Paw Gay, Director and Editor-in-Chief, Karen Information Center, Myanmar have been named 2024 Laureates for Africa, the Arab Region and Southeast Asia, respectively. Sources: WAN-IFRAN WIN

WAN-IFRA WIN တၢ်ကရၢကရိအံၤ အတၢ်ဟ့ၣ်လၤကပီၤခိၣ်ဖးအဟီၣ်ကဝီၤအိၣ်ဝဲဒၣ်သၢခါလၢအမ့ၢ် တၢ— အးဖြံၣ်ကးဟီၣ်ကဝီၤ, ခံ— အါရၣ်ဘ်ဟီၣ်ကဝီၤ ဒီး ဟီၣ်ကဝီၤသၢန့ၣ်မ့ၢ်ဝဲဒၣ် Southeast Asia — အ့ရှၢၣ်မုၢ်ထီၣ်ကလံၤထံးန့ၣ်လီၤ ပိာ်မုၣ်ဒီး တၢ်တီခိၣ်ရိၤမဲတၢ်ကစီၣ်ဒၢး တၢ်ဟ့ၣ်လၤကပီၤခိၣ်ဖးအံၤ ကရၢအံၤဟ့ၣ်လီၤတၢ်လၤကပီၤကိးနံၣ်ဒဲးဆူဟီၣ်ကဝီၤသၢဘ့ၣ်အံၤအပူၤ ဒီး တၢ်ဟ့ၣ်လၤကပီၤခိၣ်ဖးအံၤအိၣ်လံဝဲဒၣ်အနံၣ် ၁ဝလံန့ၣ်လီၤ.

တနံၣ်အံၤ ၂ဝ၂၄နံၣ် အ့ရှၢၣ်မုၢ်ထီၣ်ကလံၤထံးဟီၣ်ကဝီၤပှၤဒိးန့ၢ်ဘၣ် Women in News Editorial Leadership Award ခိၣ်ဖးတၢ်လၤကပီၤန့ၣ်မ့ၢ်ဝဲဒၣ် နါဖီဂ့ၤ လၢအမ့ၢ် ကညီတၢ်ကစီၣ်ဝဲၤလီၢ် ပှၤပၢဆှၢရဲၣ်ကျဲၤတၢ်အခိၣ်ဒီၣ်ဒီး အဲဒံထၢၣ်ခိၣ်ကျၢၢ်, မ့မ့ၢ်ဖဲအးဖြံၣ်ကးဟီၣ်ကဝီၤန့ၣ် မ့ၢ်ဝဲဒၣ် Beatrice Bandawe လၢအမ့ၢ် ပှၤတီခိၣ်ရိၤမဲတၢ်အဲဒံထၢၣ်ခိၣ်ကျၢၢ်ဖဲ The Guardian Limited တၢ်ကစီၣ်သန့လၢအအိၣ်ဖဲ Tanzania ကီၢ် ဒီး ဖဲအါရၣ်ဟီၣ်ကဝီၤအပူၤန့ၣ်မ့ၢ်ဝဲဒၣ် Dima Khatib လၢအမ့ၢ် ပှၤတီခိၣ်ရိၤမဲတၢ်ခိၣ်ကျၢၢ် ဖဲ AJ+ တၢ်ကစီၣ်ဒၢး လၢအမ့ၢ် Al Jazeera တၢ်ကစီၣ်ပှာ်ယဲၤအဝဲၤဒ့လၢအအိၣ်ဖဲ Palestine/Syria န့ၣ်လီၤ.

တၢ်ဟ့ၣ်လီၤခိၣ်ဖးတၢ်လၤကပီၤအမူးန့ၣ်တၢ်ကမၤအီၤဖဲ ကီၢ် Denmark အဝ့ၢ်ခိၣ် Copenhagen ဖဲလါမ့ၤ ၂၇ သီ တုၤ ၂၉သီ World News Media Conference — ဟီၣ်ခိၣ်ဒီဘ့ၣ်တၢ်ကစီၣ်တၢ်ကူၣ်လိာ်အိၣ်ဖှိၣ်ဖးဒိၣ်အပူၤန့ၣ်လီၤ.

ဘၣ်ဆၣ်သနာ်က့ ခီဖျိလၢတၢ်ကီတၢ်ခဲအကလုာ်အါမးအဖီခိၣ် နါဖီဂ့ၤစံးဝဲဒၣ်လၢအဝဲလဲၤထီၣ်ဟံးန့ၢ်ခိၣ်ဖးအံၤအနီၣ်ကစၢ်ဒၣ်ဝဲတသ့ဘၣ်.

တၢ်ဖံးတၢ်မၤအပူၤဒိးန့ၢ်ဘၣ်အဘူးအလဲမ့ၢ်တလၢပှဲၤဘၣ်, တၢ်ဖံးတၢ်မၤအပူၤ တၢ်သူၣ်လီၤဘှံးသးလီၤတီၤမ့ၢ်အိၣ်နာ်သက့ နါဖီဂ့ၤ လၢအမ့ၢ်စ့ၢ်ကီးမိၢ်တဂၤအံၤ အိၣ်ဆၢထၢၣ်ဝဲကျၢၤမုဆှုဒီး လၢတၢ်ဃံးတၢ်စ့ၤအပူၤန့ၣ်အဝဲ စိာ်မူစိာ်ဂဲၤဝဲဒၣ် ကညီတၢ်ကစီၣ်ဝဲၤလီၢ်အံၤန့ၣ်လီၤ.

ဖဲ ၂ဝ၂၄နံၣ် ခဲကနံၣ်အံၤန့ၣ် ကညီတၢ်ကစီၣ်ဝဲၤလီၢ် ခ့ၣ်အဲၣ်စံၣ် အပူၤ ပှၤမၤတၢ်ဖိခဲလၢာ်အိၣ်ဝဲဒၣ် ၂၆ ဂၤဒီး အကျါ ၁၂ဂၤန့ၣ်မ့ၢ်ဝဲဒၣ်ပိာ်မုၣ်သ့ၣ်တဖၣ် လၢအပၣ်ဃုာ် ပှၤလၢအဟံးမူဒါလၢဝဲၤဒၢးတၢ်ဖံးတၢ်မၤဂ့ၢ်ဝီသ့ၣ်တဖၣ်န့ၣ်လီၤ.

နါဖီဂ့ၤ အိၣ်ဖျဲၣ်ထီၣ်ဝဲဒၣ်ဖဲ ဝ့ၢ်ဖၣ်အၣ် ဒီး ဖျိထီၣ်ဝဲဒၣ် တီၤထီကၠိဖဲဝ့ၢ်ဖၣ်အၣ်န့ၣ်လီၤ နာ်သက့အဝဲဖျိထီၣ်တီၤထီကၠိဝံၤန့ၣ် မ့ၢ်လၢ ကီၢ်ပယီၤအပူၤ ၈ လွံၢ်ဖျၢၢ် ဒံၣ်မိၣ်ကခြ့ၣ်စံၣ်တၢ်ဂဲၤလိာ်အဃိ အဝဲတဆဲးထီၣ်ဘၣ် ပတီၢ်ထီတၢ်မၤလိလၢၤဘၣ်ဒီးဘၣ်အိၣ်ဘှံးဆိကတီၢ်ကွံာ်အတၢ်မၤလိတကတီၢ်ဖိန့ၣ်လီၤ. ဖဲအဝဲအိၣ်ဘှံးအဆၢကတီၢ်န့ၣ် အဝဲနုာ်လီၤမၤသကိးတၢ်ဖဲကတီၤဆိကၠိ လၢအဝဲထီၣ်တ့ၢ်အီၤဖဲအနီၣ်ဆံးဒံးအခါ ဒ်သိးဒီး မုာ်သးမၤကလီသရၣ်မုၣ်တဂၤအသိးန့ၣ်လီၤ.

ဖဲန့ၣ်အလီၢ်ခံ ဖၣ်အၣ်ခီလ့ၣ်ကၠိ လၢအမ့ၢ် Pa-an Reginal Collage ကၠိအိးထီၣ်တဘျီဖဲ၁၉၉၁ နံၣ်န့ၣ်အဝဲစးထီၣ်ထီၣ်ဘၣ်ဝဲဒၣ် ပတီၢ်ထီတၢ်မၤလိ တၢတနံၣ် ဒီး ဆဲးမၤလိစ့ၢ်ကီး ခံနံၣ်တနံၣ်တၢ်မၤလိဖဲခီလ့ၣ်ကၠိအံၤန့ၣ်လီၤ.

ဖဲန့ၣ်အခါ ဝ့ၢ်ဖၣ်အၣ်အပူၤ ဖၠၣ်စိမိၤကၠိတအိၣ်ဘၣ်အဃိ တၢ်မၤလိ သၢနံၣ်တနံၣ်ဒီး အလီၢ်ခံကတၢၢ် လွံၢ်နံၣ်တနံၣ်န့ၣ်အဝဲလဲၤဆဲးမၤလိအီၤဖဲ မီၣ်လမၠဲၣ် ဖၠၣ်စိမိၤကၠိ Mawlamyaing University န့ၣ်လီၤ. ဖဲ ၁၉၉၅နံၣ်န့ၣ် အဝဲဖျိထီၣ်ဖၠၣ်စိမိၤကၠိဒီး Bachelor of Science (Chemistry) — B.Sc န့ၣ်လီၤ.