လါဖ့ၤဖြူၤအါရံၤ ၁၁သီန့ၣ် ဒ်အမ့ၢ်ကညီဒီကလုာ်မုၢ်နံၤအသိး ဖဲလါဖ့ၤဖြူၤအါရံၤ အသီ ၁ဝ မုၢ်ဘူၣ်အနံၤန့ၣ် ကညီဖိလၢအအိၣ်ဆိးဖဲမဲလ်ဘၢဝ့ၢ်မုၢ်နုာ်ဟီၣ်ကဝီၤသ့ၣ်တဖၣ် ပာ်ဖှိၣ်ထီၣ်အသးဒီး မၤလၤကပီၤဝဲဒၣ် ကညီဒီကလုာ်မုၢ်နံၤလၢအပှဲၤထီၣ် ၇၆ဝီတဝီန့ၣ်လီၤ.
ကညီဖိဃုာ်ဒီး လီၢ်ကဝီၤပှၤဘၣ်မူဘၣ်ဒါအခိၣ် တမှံၤသ့ၣ်တဖၣ် ဟဲထီၣ်မၤလၤကပီၤဝဲဒၣ်မုၢ်နံၤအံၤဖဲဟီၣ်ဖၢၣ်ခြီၣ်စ့ၣ်ကဝီၤဒ့တၢ်ပၢအပူၤခဲလၢာ်အိၣ်ဘူးထီၣ်လၢ ၁ဝဝ ဂၤဃၣ်ဃၣ်န့ၣ်လီၤ.
ဖဲတၢ်မၤလၤကပီၤကညီဒီကလုာ်မုၢ်နံၤတဘျီအံၤ ပှၤတီခိၣ်ရိၤမဲသုးကျဲၤမူးအံၤသ့ၣ်တဖၣ်အကျါတဂၤ လၢအမ့ၢ် မုၢ်နုာ်ကညီသးပှၢ်ကရၢ ပှၤဟ့ၣ်ကူၣ်ဟ့ၣ်ဖးတၢ် သရၣ်ကဲဘျုး တဲဖျါထီၣ်ဝဲဒၣ် ကညီဒီကလုာ်မုၢ်နံၤဟဲကဲထီၣ်သးအဂ့ၢ်အကျိၤ တၢ်စံၣ်စိၤတဲစိၤသ့ၣ်တဖၣ်န့ၣ်လီၤ.
ကညီဒီကလုာ်မုၢ်နံၤန့ၣ် ဘၣ်တၢ်စးထီၣ်ပာ်ပနီၣ်ဝဲဒၣ်အီၤဖဲ ၁၉၄၈နံၣ် လါဖ့ၤဖြူၤအါရံၤ ၁၁သီ ဖဲလၢကညီဖိလၢကီၢ်ပယီၤဒီတဘ့ၣ်အပူၤ လဲၤထီၣ် ပာ်ဖျါထီၣ်အသးဒီး ဃ့ကညီဖိအထံအကီၢ်န့ၣ်လီၤ.
ကညီဖိတၢ်လဲၤထီၣ်ပာ်ဖျါသးအပူၤ အိၣ်ဝဲဒၣ်ဒီးအတၢ်ကိးသထြီလွံၢ်ထံၣ်လၢအမ့ၢ်— ဟ့ၣ်ကညီကီၢ်တဘျီ, ကညီတဘးပယီၤတဘးဒုးနဲၣ်ဖျါ, ကလုာ်ဒူၣ်တၢ်သဘံၣ်သဘုၣ်ပတသးလီ, ထံလီၢ်ကီၢ်ပူၤတၢ်ဒုးတၢ်ယၤပတသလီ သ့ၣ်တဖၣ်န့ၣ်လီၤ.
စးထီၣ်ဖဲန့ၣ်လံၤလံၤ တုၤလီၤဆူစိၤခ့ခါဆၢကတီၢ်ခဲကနံၣ်အံၤ မ့ၢ်တုၤလီၤဖဲလါဖ့ၤဖြူၤအါရံၤ ၁၁သီအနံၤန့ၣ် ကညီဖိသ့ၣ်တဖၣ် မၤလၤကပီၤဝဲဒၣ်ကညီဒီကလုာ်မုၢ်နံၤန့ၣ်လီၤ.
ဘၣ်ဆၣ်သနာ်က့ မုၢ်မဆါတနံၤအံၤန့ၣ် မ့ၢ်လၢကညီဖိသ့ၣ်တဖၣ် အိၣ်ရၤလီၤအသးသကုၤဟီၣ်ခိၣ်ဒီဘ့ၣ်အဃိ လၢအဝဲသ့ၣ် တၢ်လီၢ် တၢ်ဆၢကတီၢ်ဒီး အတၢ်အိၣ်သးအဖီခိၣ် မၤလၤကပီၤဝဲဒၣ်ကညီဒီကလုာ်မုၢ်နံၤအံၤ ဖဲလါဖ့ၤဖြူၤအါရံၤအတီၢ်ပူၤတသီသီန့ၣ်လီၤ.
ဖဲမဲလ်ဘၢကညီတဝၢတၢ်မၤလၤကပီၤကညီဒီကလုာ်မုၢ်နံၤတဘျီအံၤ ကညီသးပှၢ်ကရၢပှၤဟ့ၣ်ကူၣ်ဟ့ၣ်ဖးတၢ်သရၣ်ကဲဘျုး ဟ့ၣ်သဆၣ်ထီၣ်ဝဲဒၣ် ကညီသးစၢ်သ့ၣ်တဖၣ်လၢကဟံးထီၣ်ဖီၣ်ထီၣ်က့ၤကညီဖိအမူအဒါဒီး ဆၢဂ့ၤဆၢဝါစ့ၢ်ကီးကညီဖိခဲလၢာ်န့ၣ်လီၤ.
တၢ်မၤလၤကပီၤကညီဒီကလုာ်မုၢ်နံၤတဘျီအံၤ ဘၣ်တၢ်ကရၢကရိရဲၣ်ကျဲၤမၤအီၤလၢ မုၢ်နုာ်ကညီသးပှၢ်ကရၢ, Westgate ကညီတၢ်ဘါသရိာ်ခိၣ်နၢ် ဃုာ်ဒီးအဝဲသ့ၣ်တၢ်ဒ့တၢ်အူကရူၢ်, ဒီး AKP — အီစထြ့လယါကညီဖီၣ်ကျၢၤမၤဂ့ၤထီၣ်စံၣ်စိၤဆဲးလၤကရၢ သ့ၣ်တဖၣ်န့ၣ်လီၤ.
မုဂါလဲၣ်လဲၣ်ဝ့ လၢအမ့ၢ် အီစထြ့လယါကညီဖီၣ်ကျၢၤမၤဂ့ၤထီၣ်စံၣ်စိၤဆဲးလၤကရၢအပှၤပၢၤလီၢ်ဆ့ၣ်နီၤဟ့ၣ်သဆၣ်ထီၣ်ဝဲဒၣ် မိၢ်ပၢ် သ့ၣ်တဖၣ် လၢကဟ့ၣ်သဆၣ်ထီၣ်က့ၤအဖိအလံၤ သူၣ်ဘီၣ်သးစၢ်လၢ အဟဲဒိၣ်ထီၣ် မ့တမ့ၢ် အိၣ်ဖျဲၣ်ထီၣ်ဖဲထံချၢကီၢ်ချၢသ့ၣ်တဖၣ် ဒ်သိးကသ့ၣ်ညါ ပာ်ဒိၣ်ပာ်ကဲက့ၤ ကညီဖိအနံၤဒိၣ်နံၤထီသ့ၣ်တဖၣ်အဂီၢ်န့ၣ်လီၤ.
ပှၤဟဲထီၣ်မၤလၤကပီၤမူးအကျါ ကညီပိာ်မုၣ်ကရၢပှၤဘၣ်မူဘၣ်ဒါ သရၣ်မုၣ် ဆၢအဲၣ်ပ့ၣ်ဖီ လၢအဘၣ်တၢ်သ့ၣ်ညါအီၤအါလၢ သရၣ်မုၣ် ဝါန် စံးဝဲဒၣ် ကညီဒီကလုာ်မုၢ်နံၤန့ၣ် မ့ၢ်ဝဲမုၢ်နံၤတနံၤလၢ တၢ်ကြၢးမၤလၤကပီၤအီၤဒီး ကညီဖိသ့ၣ်တဖၣ် ကြၢးထုးဖှိၣ်ဝာ်ဖှိၣ်လိာ်က့ၤသးလၢတၢ်ဃူတၢ်ဖိးအဂီၢ်န့ၣ်လီၤ.
တၢ်မၤလၤကပီၤကညီဒီကလုာ်မုၢ်နံၤတဘျီအံၤ တမှံၤလီၢ်ကဝီၤပှၤဘၣ်မူဘၣ်ဒါဝ့မ်ဒၢဝ့ၢ်ခိၣ် Jennie Barrera ဟဲထီၣ်ဟ့ၣ်ဂံၢ်ဟ့ၣ်ဘါတဲလီၤစ့ၢ်ကီးတၢ်အသိး, အိၣ်စ့ၢ်ကီးဒီး ကညီလုၢ်လၢ်ထူသနူတၢ်ဂဲၤကလံၣ်ဒိဒီး ကညီသးစၢ်မုၣ်ခွါ တၢ်ဂဲၤကလံၣ်ဒီး တၢ်သူၣ်ဝံၣ်သးဆၢသ့ၣ်တဖၣ်န့ၣ်လီၤ.
ဖဲလါဖ့ၤဖြူၤအါရံၤ အသီ ၁ဝ တနံၤဃီန့ၣ် ကညီဖိလၢအဟဲတုၤအိၣ်ဆိးဖဲ ဘြံၣ်စဘဲဝ့ၢ်သ့ၣ်တဖၣ်စ့ၢ်ကီး ပာ်ဖှိၣ်ထီၣ်အသးမၤလၤကပီၤသကိးဝဲဒၣ် ကညီဒီကလုာ်မုၢ်နံၤစ့ၢ်ကီးန့ၣ်လီၤ.
