ကမျၢၢ်အါန့ၢ် ၇ဝဝဂၤ မၤဘူၣ်သကိး ကညီလုၢ်လၢ်ထူသနူလါခူးကံၢ်စုအမူးဖဲဝ့ၢ်ဘဲၢ်ဒံၢ်ကိၢ်

၂ဝ၂၃ လါအီကၢး ၂၆သီ မုၢ်ဘူၣ်နံၤ, တနံၤအံၤန့ၣ် ကညီဖိလၢအအိၣ်ဆိးသကုၤ ဝံးထိရံယါကီၢ်စဲၣ်, အီစထြ့လယါကီၢ်ပူၤသ့ၣ်တဖၣ် ပာ်ဖှိၣ်ထီၣ်အသးဒီး ဟဲမၤဘူၣ်သကိးဝဲ ကညီဖိလုၢ်လၢ်ထူသနူ လါခူးကံၢ်စုအမူး ဖဲဝ့ၢ်ဘဲဒံၢ်ကိၢ် လၢအအိၣ်ဖဲ ဝံးထိရံယါကီၢ်စဲၣ်ခၢၣ်သးဟီၣ်ကဝီၤန့ၣ်လီၤ.

Karen Wrist Tying in Bendigo, August 26, 2023. Source: BKYN

တၢ်မၤဘူၣ်သကိးမူးတဘျီအံၤ ကညီဖိဃုာ်ဒီး လီၢ်ကဝီၤပှၤလီၢ်အိၣ်လီၢ်ဆိးတနီၤ ဟဲပာ်ဖှိၣ်ထီၣ်အသးဖဲ Bendigo Neighbourhood Hub, ဒီး ပှၤဟဲထီၣ်မူးအံၤတဘျီအံၤအနီၣ်ဂံၢ် အိၣ်ဝဲဒၣ် နွံကယၤဘျဲၣ်န့ၣ်လီၤ.

ဘဲၢ်ဒံၢ်ကိၢ်ဝ့ၢ်ဖိအံၤ အိၣ်ဆီလီၤအသးဖဲ မဲလ်ဘၢဝ့ၢ်မုၢ်နုၤကလံၤစိၤ လၢအစီၤစုာ်ယံၤ ၁၅ဝ ကံလိမံထၢၣ်ဃၣ်ဃၣ်, ဒီးကညီဖိစးထီၣ်ဟဲတုၤအိၣ်ဆိးဝဲဒၣ်ဖဲဝ့ၢ်ဖိအံၤအပူၤန့ၣ် ဖဲ၂ဝဝ၇ဒီး အါတက့ၢ်န့ၣ်မ့ၢ်ဝဲပှၤဘၣ်ကီဘၣ်ခဲလီၢ်လံၤ လၢအဟဲန့ၢ်လၢ ဘၣ်ကီဘၣ်ခဲဒဲကဝီၤ လၢအအိၣ်ဖဲ ကၠီၣ်တဲၣ်ဒီးကီၢ်ပယီၤကီၢ်ဆၢသ့ၣ်တဖၣ်န့ၣ်လီၤ.

ဘဲၢ်ဒံၢ်ကိၢ်ဝ့ၢ်မ့ၢ်ဝဲဒၣ် ဝ့ၢ်ဖိလၢ ကညီဖိအနီၣ်ဂံၢ်ဟဲအါထီၣ်ကွ့ၢ်ကွ့ၢ်ဒီး ခဲကနံၣ်အံၤန့ၣ် ကညီဖိအနီၣ်ဂံၢ်ဖဲဝ့ၢ်ဖိအံၤအပူၤ အိၣ်အါန့ၢ် ၃၅ဝဝဂၤန့ၣ်လီၤ.

ဘဲၢ်ဒံၢ်ကိၢ်လၢအမ့ၢ် တၢ်ခူၣ်ထူဝ့ၢ်အံၤ ဖဲ ၂ဝ၁၉နံၣ်န့ၣ် ပှၤကညီအိၣ်ဆိးနီၣ်ဂံၢ်ခဲလၢာ်န့ၣ် အိၣ်ဝဲဒၣ် တကလီၢ် ခွံကယၤဘျဲၣ် အဃိ ကဲထီၣ်ဝဲဒၣ် အီစထြ့လယါဝ့ၢ် အဒိၣ်ကတၢၢ် ၁၉ဖျၢၣ်တဖျၢၣ် ဒီး ဖဲဝံးထိရံယါကီၢ်စဲၣ်အပူၤန့ၣ် မ့ၢ်ဝဲဝ့ၢ်အဒိၣ်ကတၢၢ် ၄ဖျၢၣ်ဒီး မ့ၢ်စ့ၢ်ကီးဝ့ၢ်လၢ ပှၤကညီနီၣ်ဂံၢ်အါကတၢၢ်လွံၢ်ဖျၢၣ်တဖျၢၣ်န့ၣ်လီၤ.

ဘဲၢ်ဒံၢ်ကိၢ်ဝ့ၢ်အံၤ ဟီၣ်ခိၣ်ကစၢ်ပှၤထူလံၤဖိန့ၣ်မ့ၢ်ဝဲဒၣ် Dja Dja Wurrung (Djaara) ပှၤထူလံၤဖိကလုာ်န့ၣ်လီၤ.

ဝ့ၢ်အံၤအပူၤတၢ်ထံၣ်န့ၢ် ထူအဆိကတၢ်လီၢ်န့ၣ်မ့ၢ်ဝဲ Bendigo Creek ဟီၣ်ကဝီၤအပူၤ ဖဲ ၁၈၅၁နံၣ်အခါန့ၣ်လီၤ.

လါခူးကံၢ်စုမူးတဘျီအံၤ ဘၣ်တၢ်ရဲၣ်ကျဲၤဆီၣ်ထွဲမၤစၢၤအီၤလၢ Karen Organisation of Bendigo — ကညီတၢ်ကရၢကရိဘဲဒံၣ်ကိၣ်, Bendigo Karen Youth Network, ဘဲၤဒံၤကိၤကညီသးစၢ်အပှာ်ဘျးစဲ ဒီး Karen Culture and Social Support Foundation ဃုာ်ဒီး လီၢ်ကဝီၤပှၤဘၣ်မူဘၣ်ဒါ City of Greater Bendigo ဒီး Bendigo Neighbourhood Hub သ့ၣ်တဖၣ်န့ၣ်လီၤ.