၂ဝ၂၄နံၣ် တနံၣ်အံၤ လါဖ့ၣ်ဘြူၤအါရံၤ ၁၄သီန့ၣ် တၢ်ကူၣ်မၤသံ ကညီဒီကလုာ်စၢဖှိၣ်ကရၢ နဲၣ်ရွဲၢ်ခိၣ်ကျၢၢ်လီၢ်လံၤပဒိၣ်မါရှၤ ပှဲၤထီၣ်၁၆နံၣ်လံ. အဝဲတအိၣ်လၢၤဘၣ် အနံၣ်ဆဲးဆၢ အဆၢကတီၢ်အံၤ SBS ကညီကျိာ်တၢ်ရဲၣ်တၢ်ကျဲၤ က့ၤပာ်ဖျါထီၣ်က့ၤ အပူၤကွံာ် ၂ဝ၂၂နံၣ် တၢ်ပာ်ဖျါလီၤဆီ, ဖဲတၢ်ကူၣ်မၤသံ ပဒိၣ်မါရှၤပှဲၤထီၣ် ၁၄နံၣ်အခါန့ၣ်လီၤ.
လါဖ့ၣ်ဘြူၤအါရံၤ ၁၄သီ တၢ်မ့ၢ်သ့ၣ်ညါပာ်ပနီၣ်အီၤဒ်အမ့ၣ် တၢ်အဲၣ်မုၢ်နံၤဘၣ်ဆၣ်သနာ်က့ မ့မ့ၢ်လၢကညီဖိသ့ၣ်တဖၣ်အဂီၢ်န့ၣ် မ့ၢ်ဝဲဒၣ် တၢ်သးအုးမုၢ်နံၤ အမုၢ်တနံၤန့ၣ်လီၤ.
ဖဲမုၢ်နံၤအံၤန့ၣ် ကညီခိၣ်နၢ် ပဒိၣ်မါရှၤလါဖါ လၢတၢ်အဲၣ်ဘၣ်အီၤအါမးတဂၤ ဘၣ်တၢ်ကူၣ်မၤသံကွံာ်အီၤန့ၣ်လီၤ.
ခ့ၣ်အဲၣ်ယူၣ်—ကညီဒီကလုာ်စၢဖှိၣ်ကရၢနဲၣ်ရွဲၢ်ခိၣ်ကျၢၢ်လီၢ်လံၤ ပဒိၣ်မါရှၤ ဘၣ်တၢ်ကူၣ်မၤသံအီၤဖဲ ၂ဝဝ၈နံၣ် လါဖ့ၣ်ဘြူၤအါရံၤ ၁၄သီ ဟါခီ, ဖဲဝ့ၢ်မဲၢ်ဆီး ကၠီၣ်တဲၣ်ကီၢ်န့ၣ်လီၤ.
တနံၣ်အံၤလါဖ့ၣ်ဘြူၤအါရံၤ ၁၄သီန့ၣ် တၢ်ကူၣ်မၤသံပဒိၣ်မါရှၤ ပှဲၤထီၣ်ဝဲဒၣ် ၁၄နံၣ်လံ.
ဒ်သိးဒီးအမ့ၢ်တၢ်သ့ၣ်နီၣ်မၤလၤကပီၤ ပဒိၣ်မါရှၤအသိး SBS ကညီကျိာ် တၢ်ရဲၣ်တၢ်ကျဲၤအိၣ်ဒီး တၢ်ပာ်ဖျါလီၤဆီ ဒ်အမ့ၢ်တၢ်ပာ်ဖျါထီၣ်က့ၤ အဝဲအတၢ်စံးတၢ်ကတိၤလၢအဘၣ်ဃး ကညီတၢ်ပၢၢ်ဆၢဒီး ကီၢ်ပယီၤဒံၣ်မိၣ်ခြ့ၣ်စံၣ်အဂ့ၢ်အကျိၤသ့ၣ်တဖၣ်, ပဒိၣ်မါရှၤသံဝံၤအလီၢ်ခံ ပှၤ သးစၢ်လၢအဒိးန့ၢ်ဘၣ် ပဒိၣ်မါရှၤခိၣ်နၢ်သးစၢ်ခိၣ်ဖး တၢ်လၤကပီၤသ့ၣ်တဖၣ်အတၢ်စံးတၢ်ကတိၤဒီး အဖိလၢအအိၣ်လီၤတဲာ်တ့ၢ်သ့ၣ်တဖၣ် အတၢ်စံးတၢ်ကတိၤ လၢအဘၣ်ဃးဒီး တၢ်အဲၣ်, တၢ်သ့ၣ်နီၣ်ထီၣ်က့ၤ အဝဲသ့ၣ်အပၢ်အဂ့ၢ်အကျိၤသ့ၣ်တဖၣ်န့ၣ်လီၤ.
