ဝံးထိရံယါကီၢ်စဲၣ်အပူၤန့ၣ် လၢအနံၣ် ၂ဝ အတီၢ်ပူၤ ပှၤလီၤအုးသံထံအနီၣ်ဂံၢ်အါထီၣ်အဃိ ပှၤမၤပူၤဖျဲးသးသမူသ့ၣ်တဖၣ် ဟ့ၣ်သဆၣ်ထီၣ် ပှၤပှီၢ်ထံသ့ၣ်တဖၣ်လၢအကပာ်သူၣ်ပာ်သးဒီးတၢ်ကစီၣ်လၢအဘၣ်ဃးတၢ်ပူၤဖျဲးလၢထံအဂ့ၢ်အကျိၤသ့ၣ်တဖၣ်န့ၣ်လီၤ.
အဝဲသ့ၣ်စံးလၢ တၢ်ပူၤဖျဲးအတၢ်ကစီၣ်တၢ်ဂ့ၢ်တၢ်ကျိၤသ့ၣ်တဖၣ်န့ၣ် အရ့ဒိၣ်လၢပှၤကိးဂၤဒဲးကဒိးန့ၢ်ဘၣ်အီၤ ဃုာ်ဒီး ပှၤသုးလီၢ်အိၣ်ဆိးလၢအဟဲတုၤသီသ့ၣ်တဖၣ် မ့ၢ်လၢပှၤလီၤအုးသံထံအနီၣ်ဂံၢ်စရီအပူၤန့ၣ် အါတက့ၢ်မ့ၢ်ပှၤသ့ၣ်တဖၣ်အံၤအဃိန့ၣ်လီၤ.
အီစထြ့လယါကီၢ်ပူၤအံၤ ၂ဝ၂၃ နံၣ် လါဒံၤစဲဘၢၣ် ၁ ဒီး ၂ဝ၂၄နံၣ် လါယနူၤအါရံၤ ၂၂သီ အဘၢၣ်စၢၤ ပှၤလီၤအုးသံထံအနီၣ်ဂံၢ်န့ၣ် ယဲၢ်နံၣ်အတီၢ်ပူၤ တၢ်ထိၣ်ဃူအနီၣ်ဂံၢ်န့ၣ် မ့ၢ်တၢ်လၢအအါကတၢၢ်တဘျီ ဒီး ပှၤအီၤအုးထံကဲထီၣ်အသးန့ၣ် အစှၤကတၢၢ်အိၣ်ဝဲဒၣ် ၆၆ ဘျီန့ၣ်လီၤ.
မ့ၢ်ထိၣ်သတြီၤဒီးအပူၤကွံာ်တနံၣ်န့ၣ် ပှၤလီၤအုးထံအနီၣ်ဂံၢ်အံၤဟဲအါထီၣ်ဝဲ ၁၉ မျးကယၤန့ၣ်လီၤ.
နီၣ်ဂံၢ်ပာ်ဖှိၣ်စရီသ့ၣ်တဖၣ်အံၤအပူၤန့ၣ်ပၣ်ဃုာ်ဒီး ပှၤအ့ဒံယါထံဖိကီၢ်ဖိ ၄ဂၤ လၢအလီၤအုးသံထံ ဖဲအဝဲသ့ၣ် ဂဲၤလိာ်ကွဲပီၣ်လဲၣ်ထံဖဲ Phillip Island ကီး လၢအအိၣ်ဖဲမဲလ်ဘၢဝံၣ်မုၢ်ထီၣ်ကလံၤထံးတကပၤန့ၣ်လီၤ. ပှၤလွံၢ်ဂၤအံၤန့ၣ် လဲၤပှီၢ်ဝဲဒၣ်ပီၣ်လဲၣ်ထံဖဲပီၣ်လဲၣ်ကၢၢ်နံၤ လၢအတအိၣ်ဒီး ပှၤဘၣ်မူဘၣ်ဒါလၢအအိၣ်ခိးကွၢ်တၢ်ဘၣ် ဒီး တၢ်ကဲထီၣ်သးအံၤမ့ၢ်ဝဲဒၣ်ဖဲ လါယနူၤအါရံၤ ၂၄သီအနံၤန့ၣ်လီၤ.
စးထီၣ်လၢ ၂ဝဝ၅နံၣ်န့ၣ် တၢ်ကဲထီၣ်သးဖဲဝံးထိရံယါကီၢ်စဲၣ်အပူၤတဘျီအံၤန့ၣ် မ့ၢ်တၢ်လၢ အလီၤပျံၤလီၤဖုးဒိၣ်ကတၢၢ်တဘျီန့ၣ်လီၤ.
